Pwittipwitthi ya waashikha
15
1 Wakathi nkina anamariphisa lumpuru na anatwampi khusala ata oteela onsiila Yinsa. 2 Mafwarizeewu na anamanozela a kano khusala aapa araka: “Mwinyi otu oniwaapokherela anatwampi khusala aja vamote na-yo.”
3 Aphano Yinsa khuwooza nlikaniso mmote araka: 4 “Paani mmote wa mweyo anraaye arina pwittipwitthi zawe miiya khumwaashikha moote, khuhilikhi ntthuttu epile tiisiini na tiisiya zisaliyeezo, eettela etile moote emwaashikhiyeeyo mpakha opattha? 5 Amana asikana ontta ovikela ari woofurahi, 6 khusala arutela owawe. N'oofiya oniwaakhuwela maswaahipu zawe na anamwaattamanani awe awooze yoori: ‘Nlaweni nitthape, maana kapattha pwittipwitthi yaka etile yaakaashikhiyeeyo.’ 7 Khwa nanna etthiipo kiniwuuzani yoori onttela wiiyawo otthapa nwulweene pinkuuni mwaasa wa natwampi othupwiya, zayita atthu tiisiini na tiisiya anashariya ahinhithajiyaaye othupwiya.”
Nzurukhu wa waashikha
8 Kuvira araka: “Ama muukha-ni anraaye arina nzurukhu awe khumi, khumwaashikha mmote khuhikhozi khantteya aseela nnyupa mwawe, eekesa w'aakhilivo mpakha opattha? 9 Amana apattha oniwaakhuwela maswaahipu zawe na anamwaattamanani awe awooze yoori: ‘Nlaweni nitthape, maana kapattha nzurukhu aka opule waakaashikhiyeeyo.’ 10 Miiyo kiniwuuzani yoori eniiyavo furaha khuluyeene vakatthi wa malayikha a Nnyizinku mwaasa wa natwampi mmote othupwiya.”
Nlikaniso wa mwaana wa waashikha
11 Yinsa khurutela theenya yoori: “Aarivo mwinyi mmote aariina aanaawe awiri. 12 Otu nttiitthi aya khumuuza papaawe yoori: ‘Paapa, mwikinkhe lifunku la erathi yaka.’ Papaawe khuwaawanyela maali epile aanaawe.
13 Oviriyeevo wakathi vattitthiiru, mwaana otule nttiitthi khuthuula maali zawe epile aawanyeliweezo khulawa tuniya kiina ya woolepawo. Ottuukho khuharipu maali zawe epile khwa mwentto woololo. 14 N'ooharipu zooshi khupuwa jala ya waatta mmuti mwaya mphule, ye khusala ahankayikha. 15 Khulankha mpakha wa mwinyi mmote wa tuniya ethiitile khunvekela khaazi, ye khumwinkha oshukisa kuluwe zawe ntthuttu. 16 Ye aari ohithajiya oja vitthu epile zaari ojiwaazo pi kuluwe na khaavo aari omwinkhaaye etthu-yoojiwa.
17 Khujipayini khuri: ‘Anakhaazi a paapa ana etthu-yoojiwa yoowaafiyela, miiyo kiri okhuno entta okikhola jala. 18 Kintta olankha kilawe wa paapa khamuuze yoori: Paapa, kakosa mmakhono wa Nnyizinku na mmakhono mwenu. 19 Akinsuhi theenya wiitthiwa yoori ki mwanenu, mwikipokherele nkhama mmote wa anakhaazi enu.’ 20 Khulankha khusala alawa mpakha wa papaawe.
Nalelo ari peetiwene papaawe khumoona, khwiiyana huruma khuluyeene khusala antthirela khulawa khumpatikha na khumpejari.
21 Attaaphale mwaana otule khumuuza papaawe yoori: ‘Paapa, kakosa mmakhono wa Nnyizinku na mmakhono mwenu. Akinsuhi wiitthiwa yoori ki mwanenu.’
22 Ila papaawe khuwooza akarumeya awe yoori: ‘Mwaakuve, mwitiise kuwo zooziti oshapweya mwinwalise. Na peetthe mwinwalise nzaala mwawe na shapattho mmoolu mwawe. 23 Mwilawe onzizi mwanthuule mwaana wa mompe otule eesheliyeeyo oneneva mwite mwishije, nirette njampo la furaha. 24 Mwaasa yoori mwanaka otu aafwiiye apha ori haayi; aashikhiye apha apattikhana.’ Khwaaziwa njampo.
25 Epo zaari orettikhana mwaana otule nwulu ari omashapa. Khuta mpakha kharipu na vaje, khusala asiila koma zeettaka ovuma na atthu eettaka wiina. 26 Aphano ye khunkhuwela karumeya mmote wa vaje attaaphale khumuuzela niini yaari orettikhanaaye. 27 Ye khumuuza yoori: ‘Ttwiiyo ti ye arutiyeeyo, papaawo khunshijela mwaana wa mompe otule eesheliyeeyo oneneva, mwaasa wompokherela ari haayi.’
28 Mwaana otule nwulu khwiiphiiriwa khuhisala atakha oviramo. Attaaphale papaawe khusaruwa khusala ankhanyarela. 29 Ila ye khumuuza papaawe yoori: ‘Moone! Nyaakha za waatta kuurumeyelakani, wala akinakhijilele hatha nttakhuzi lenu limote. Ila khamwinakinkhe hatha puuzi moote yoori kirette njampo na ashirikha aka. 30 Arutiyeevo mwanenu oto aharipwiyeeyo vitthu zenu na amalempe, mwanshijela mwaana wa mompe otule wooneneva aya.’
31 Aphano papaawe khumuuza yoori: ‘Mwanaka! Wakhula siikhu oniiya vamote na-miyo, wakhula etile kiriina ti yaawo. 32 Ila yaari ohithajiya oretta njampo la furaha, mwaasa yoori ttwiiyo aafwiiye apha ori haayi, aashikhiye apha apattikhana.’”