Yinsa oniwaaruma anakhiyoni awe sapiyiini na awiri
10
1 Paata ya toole, Mbwana khuwaathawula anakhiyoni awe akinoko sapiyiini na awiri, khuwaaruma yoori alawe awiri-awiri alokoze nsitati na mmiti wooshimo mphule aari weettelaaye oviramo. 2 Ye khuwooza yoori: “Wuurula pu wa waatta, ila anakhaazi vattitthiiru. Mwinvekele Mwennyewe nshapa yoori awaaperekhe anakhaazi a wuurula. 3 Mwilawe, kinuurumani nkhama pwittipwitthi zinttaaye vakatthi wa miiji. 4 Mwihithuule mfukho wala napampa, ama jampali wala mwiheemele ntarikhi mwichelisa.
5 Wakhula nyuupa mwimfiyaaye mwilupe khapula yoori: ‘Heeri yiiye vamote na-mweyo vaje apha.’ 6 Amana eeyavo ntthu wa heeri, heeri yenu enttela wiiya vamote na othuuto; amana ahiivo entta wuurutelani. 7 Mwiheettette nyuupa khwa nyuupa, ila mwiikhale nyuupa ethiito mwije mwinywe wakhula etile mwinttelaaye winkhiwa, maana nakhaazi eninsuhi phakari yawe.
8 Wakhula sitati mwimfiyaaye khupokhereliwa saana, mwije etthu-yoojiwa mwinttelaaye winkhiwa. 9 Mwiwaavonise alwele mwinttelaaye owaasikana na mwiwooze atthu yoori: ‘Ofwalume wa Nnyizinku ori kharipu na-mweyo.’ 10 Wakhula sitati mwineettaaye amana mwihipokhereliwi, mwileemo mwilawe ntarikhi mwiwooze yoori: 11 ‘Lifufu la sitati yenu ntthi liniphariyeeyo mmoolu mwetthu, nootathelani mwamwennyewe; ila mwijuwe yoori ofwalume wa Nnyizinku ori kharipu na-mweyo.’” 12 Yinsa khuwooza theenya yoori: “Kiniwuuzani yoori siikhu ya khiyaama, Nnyizinku onteela woonela tthakaraka Sotooma zayita sitati eto.
13 Olaanikha pu waawo weeyo Korazini, na weeyo Betesayita! Eriwaka minjuza epi zirettikhaniyeezo mphu, zeettiye orettikhana sitati ya Tiiro na Sidooni, athupwiyiye raku twampi zaya awala saakhu eekhala vafuutha. 14 Nakataalikha siikhu ya khiyaama, Nnyizinku onteela woonela tthakaraka Tiiro na Sidooni zayita mweeyo. 15 Weeyo Kafwaranawu onoona yoori onsifwiwa mpakha pinkuuni? Wala! Apho onteela wiishukhela motthooni.
16 Otule anuusiilezaanini, onikisiileza miiyo; otule anuukatthalaanini, onikikatthala miiyo. Otule anikikatthalaaye miiyo, oninkatthala otule akirumiyeeyo.”
Oruti wa anakhiyoni sapiyiini na awiri apale aarumiweeyo
17 Anakhiyoni apale sapiyiini na awiri khuruti ari oofurahi khulupa yoori: “Mbwana, hatha masheethwani aari onishututela amana nittakhulaka khwa nzina lawo.”
18 Yinsa khuwaajipu yoori: “Miiyo kamoona Epiliisi akwaka otulu nkhama ozerima. 19 Mwikisiileze! Kiniwinkhani owahi wooluwattha nyookha, wenye khuhuurettini hatha etthu, na oshintta owahi wooshi wa atuwia. 20 Mwihifurahi mwaasa wa masheethwani wuushututelani, mwifurahele mazina enu waatikhiwa pinkuuni.”
21 Wakathi otthuupule Yinsa khwiiya woofurahi nkatthi wa Rooho Ttakatthiifu, khuri: “Kinuusifu weeyo Paapa, Mbwana wa pinkuuni na vathi maana vitthu epi zeeya zoovitheya vakatthi wa ajuwi na asomi, khuwaathoonyeza asimaana; khweele Paapa, ti nanna waatakhiyeezo.
22 Zooshi kenkhiwa ti Paapa; na khaavo aninjuwaaye Mwaana woohiiyi Paapa, wala aninjuwaaye Paapa woohiiyi Mwaana, na otule Mwaana anintakhelaaye yoori anjuwise.”
23 Paata ya toole, khuwaakhuwela anakhiyoni aweru paasi khuwooza yoori: “Ooparikhiyiwa pi apale anoonaaye epi mwinoonaazo. 24 Kiniwuuzani yoori manapiyu a waatta na afwalume aari otakha woona vitthu etthiipi mwinoonaazo ila khuhooni na aari otakha osiila epi mwinsiilaazo ila khuhisiili.”
Nsamariiya wooshapweya rooho
25 N'ooretta toole, namanozela mmote wa kano khulankha yoori amweeze Yinsa khuri: “Mwanliimu, kirette-ni yoori kipatthe ohaayi wa mileele?”
26 Yinsa khumuuzela yoori: “Yaatikhiwa niini nkithaapu ya kano wala eniweeleya toovi amana osomaka?”
27 Ye khujipu araka: “‘Omphete Mbwana Nnyizinku awo na rooho yawo yooshi na nafusi yawo yooshi, na kuvu zawo zooshi na akhili zawo zooshi’ na ‘omphete namwaattamanani awo nkhama etthiipo onjiphetaazo omwennyewe’.”
28 Aphano Yinsa khumuuza yoori: “Wajipu saana. Orettaru etthiipo ontta opattha ohaayi wa mileele.”
29 Ila namanozela wa kano otule aari otakha ojihakikhi khumuuzela Yinsa theenya yoori: “Namwaattamanani aka ti paani?”
30 Yinsa khunjipu araka: “Aarivo ntthu mmote aari olankhaaye Yeruzaleemu eettaka Yeriko, khuvithaaleliwa pi malatarawu khunyakanyiwa vitthu zawe, khuvuliwa kuwo zawe, khupiiwa khulikhiwa asaleelaka ofwa. 31 Erettiyeevo toole, khuviravo haakhimu wa tiini mmote, n'oomoona ntthu otule khunwerawera. 32 Khuviravo theenya nleevib mmote, n'oomoona ntthu otule ari ntarikhi mphule khunwerawera. 33 Aphano khuviravo nsamariiyac mmote aari weettaaye safwari zawe, n'oomoona ntthu otule khumoonela huruma. 34 Khumwaattamela khoosa makhwatta awe na mafuttha na aalikoro khufuka na alikatuura, khunthuula khunttha vapuuru vawe khunlawana onyuupa ya aletto khumwiinanela. 35 Mmeesho mwaya, khulaza mizurukhu miwiri za feeta aariinaazo khumwinkha mwennyewe nyuupa khumuuza yoori: ‘Omwiinanele ntthu otu mpakha wakathi kinrutaavo, wakhula etile onttelaaye oharipu khwa ye, kintta ota kuuriphe n'ooruti.’”
36 Aphano Yinsa khumuuzela namanozela wa kano otule yoori: “Khwa atthu apa attatthu paani omooniyeeyo wiiya namwaattamanani awe nampiiwa pi malatarawu?”
37 Ye khujipu yoori: “Ti otule amooneliyeeyo huruma.” Yinsa khumuuza yoori: “Na-weyo olawe warette etthiipo.”
Owawe Maarata na Mariyamu
38 Yinsa na anakhiyoni awe eetta ovira alawaka khufiya mmuti, khupuwa muukha mmote aari wiitthiwaaye Maarata, khumpokherela.
39 Ye aarina ttwiiye aari wiitthiwaaye Mariyamu, eekhaliye nshini a moolu wa Mbwana Yinsa khusala asiila mattakhuzi apale aari olupaaye. 40 Ila Maarata eetta ojizukulela mwaasa wa waatta khaazi, khulawa aphale aariivo Yinsa khumuuza yoori: “Mbwana, khinuujali ttwiiyaku okilikhela khaazi za waatta otthome? Omuuze ate akikholise!”
41 Mbwana khunjipu yoori: “Weeyo Maarata washukulikha na wajikhaza na vitthu za waatta. 42 Ila eti moote ti yiiye yootafikhana. Mariyamu athawula phantte yooshapweya ahinnyakanyeyaaye.”