Yinsa oniwaaruma maaswihaapa awe khumi na awiri
9
1 Yinsa khuwaakusanya maaswihaapa awe khumi na awiri khuwenkha owahi na ofwalume wa wiikara masheethwani a wakhula nanna na woovonisa. 2 Khuwaaruma olawa olaleya ofwalume wa Nnyizinku na owaavonisa alwele. 3 Khuwooza yoori: “Mwilawaka mwihithuule hatha etthu, wala pakhora, wala mfukho, wala phaawu, wala nzurukhu, wala ajapi yaphiiri. 4 Nyuupa ethiito mwinttelaaye opokhereliwa, mwimake attaapho mpakha olaavo. 5 Amana mwihipokhereliwi saana, mwilaakamo nsitati mwaya mpho mwitathe lifufu la mmoolu mwenu khwa oshaahiti waya yo.” 6 Aphano yo khulankha khusala alawa aviraka mmamiti alaleyaka hapari zooshapweya na awaavonisaka alwele wakhula phantte.
Mishikili za Herooti
7 Nsatoro Herooti khusiila vitthu zaari orettikhanaazo ye khwiiya wootikinisiwa mwaasa atthu akina aari olupa yoori Yaahaya ti ye asisimuwiye muufwa. 8 Akina aari olupa yoori Aliyaasi ti ye awaapuweleliye, akina aari olupa yoori oto napiyu mmote wa raku eetta osisimuwa. 9 Ila Herooti khulupa yoori: “Yaahaya miiyo kaarumiye yoori ashijiwe, khi oto kininsiilaaye alupiwaka na anrettaaye vitthu epo ti paani?” Khusala atakhacha yoori amoone.
Yinsa oninkha khuntti ya atthu etthu-yoojiwa.
10 Maaswihaapa apale n'ooruti khumuuza Yinsa zooshi aarettaziyeezo. Aphano, ye khuwaathuula khusala alawa sitati moote yaari wiitthiwaaye Betesayita. 11 Ila khuntti ya atthu n'oojuwa khusala anlotta. Ye khuwaapokherela khusala awooza monkoni woofwalume wa Nnyizinku na awaavonisaka apale aari ohithajiyaaye ovonisiwa.
12 Njuwa leettelaka oveva, apale khumi na awiri khumwaattama Yinsa khumuuza yoori: “Owooze atthu apa alawe mmamiti mpho amake eekesaka etthu-yoojiwa, maana mphu niriimo makuluttu.” 13 Ye khuwaajipu yoori: “Mweeyeena mwiwenkhe etthu-yoojiwa.” Yo khunjipu araka: “Niriinaaye apha, phaawu thaanu na swi piiri paasi, woohiiyi olawa wuuzanya etthu-yoojiwa khiniwaafiyela atthu ooshi apa.” 14 Alume aariivo aari etthu ya alufu thaanu, ila ye khuwooza anakhiyoni awe yoori: “Mwiweekhaze atthu hamusiini wakhula khuntti.” 15 Yo khuretta etthiipo khuweekhaza ooshi. 16 Khuthuula phaawu thaanu na swi epile piiri khweekesa otulu, khuparikhiya khumeya khuwenkha anakhiyoni awe yoori awaawanyeze atthu apale. 17 Ooshi khuja khurupala, epile zaasaliiye khulokottheliwa khwiitaala khelenke khumi na piiri.
Otukhuru wa Pheeturu
18 Siikhu moote, Yinsa eetta olompa otthwe, anakhiyoni awe ari kharipu, nawiisha khuwoozela yoori: “Atthu anri miiyo ki paani?”
19 Yo khunjipu yoori: “Akina anri weeyo o Yaahaya Namoosa, akina Aliyaasi, akina theenya anlupa yoori weeyo o napiyu mmote wa raku weetta osisimuwa.”
20 “Khi mweeyo mwinri ki paani?” Pheeturu khujipu araka: “Weeyo o Al-Masiihu wa Nnyizinku.”
21 Yinsa khuwaahirimiza yoori vitthu epile ahimuuze hatha ntthu. 22 Khuwooza araka: “Mwaana wa Pinaatamu ona yoohoowa nkatthi wa vitthu za waatta na okatthaliwa pi anamalokozela a tiini na attunkhulu a mahaakhimu a tiini mpakha anamanozela a kano; onlawa afwe, siikhu yattaatthu asisimuwe.”
23 Khuvira awoozaka atthu ooshi yoori: “Nkhama ntthu atakha okilotta miiyo, ona yoojikatthala mwennyewe, khuvikela nsalapa awe wakhula siikhu khusala akilotta. 24 Amana ntthu atakha wuusuru ohaayi awe, ontta ompwetheya; ila otule onimpwetheyaaye ohaayi awe mwaasa wa miiyo, oto onteela wuusurukha. 25 Ona fwayita-ni ntthu opattha vitthu zooshi z'oolumwenku, ila khujipwetecha ama khujitapanya mwennyeweru? 26 Otule anikoonelaaye haaya miiyo na mattakhuzi aka, na Mwaana wa Pinaatamu onteela omoonela haaya mmana ataaka nnuuru mwawe na nnuuru wa Paapa na malayikha oottakatthiifu. 27 Kiniwuuzani khweele yoori awaapo apha akina ahinteelaaye ofwa mpakha oone ofwalume wa Nnyizinku.”
Ozukulisiwa wa Yinsa
28 Ziviriyeevo etthu ya siikhu naane paata yoolupa mattakhuzi apale, Yinsa khunthuula Pheeturu, Yaahaya na Yaakhumpa, Ye khuwela vamwaako olawa olompa. 29 Alompaka etthiipile omaasho wawe khuzukuluwawo, kuwo zawe khwiiya zoolakala na za waara nkhama ozerima. 30 Nasaapiru khumpuwelela atthu awiri khusala attakhulana, aari Munsa na Aliyaasi. 31 Aatiiye nnuuru ya pinkuuni khusala amuuza Yinsa khwa nanna aari weettelaazo ohoowa na ofwa Yeruzaleemu nkhama etthiipo Nnyizinku asharutheliyeeyo.
32 Pheeturu na ashirikha awe aarettiye eettaka olala, wakathi asisimuwiyeevo khoona nuuru ya Yinsa na atthu awiri amweemeleliye. 33 Atthu apale eettaka olawa Pheeturu khumuuza Yinsa yoori: “Mwanliimu, ti yooshapweya wiikhala attaapha! Nintta ojeka mapantta mattatthu, limote laawo, limote la Munsa, na limote la Aliyaasi.” Pheeturu khaari ojuwa etthu aari ottakhulaaye.
34 Attakhulaka etthiipile, khuta liwiku khuwaafinikha, anakhiyoni apale khwiiya awoova wakathi ooniyeevo liwiku liwaafinikhaka atthu apale. 35 Mmawiku mphule khupuwamo huula yaari oraaye: “Otu mwanaka woothawuliwa; mwinsiileze etile anlupaaye.” 36 Paata yoonyamala huula etile Yinsa khusalavo otthwe. Siikhu zaya epile anakhiyoni apale khwiiya oonyamala, khuhimuuzi hatha ntthu vitthu epile ooniyeezo.
Ovonisiwa wa shapu aariina sheethwani
37 Mmeesho mwaya nawiishukha vamwaako, khuta khuntti ya atthu a waatta oteela okutthanana Yinsa. 38 Vakatthi wa khuntti ya atthu atthaapale khupuwavo mwinyi aari okhuwaaye araka: “Mwanliimu, kinuuvekela yoori wamoone mwanaka, maana kina mmote othuuto paasi. 39 Sheethwani eetta onvelavelisa khusala anthukumelisa, onnyakulisa na onkwisela vathi n'oolaza maphovu, khaninlikha ahinvulaliseeni. 40 Kaawaavekeliye anakhiyoni awo yoori amwiikare sheethwani aya oto, yo khumoojeela.”
41 Yinsa khujipu araka: “Oo! Atthu oohaamini na ootakhala rooho! Mpakha lini kiiyaka vamote na-mweyo na kuuvilelakani? Ontiise apha mwanawo aya oto.”
42 Alawaniwaka etthiipile, sheethwani khunkwisela vathi khusala anthukumelisa, Yinsa khumwiikara sheethwani khuvona mwaana otule, khumwinkha papaawe. 43 Atthu ooshi khwiiya ooshanka mwaasa woowahi wa Nnyizinku.
Yo aashankeliye vitthu epile aari orettaazo Yinsa, ye khuwooza anakhiyoni awe yoori: 44 “Mwisiileze saana mattakhuzi apa kiniwuuzaanini: Mwaana wa Pinaatamu onttela winkheleliwa mmakhono wa anaatamu.” 45 Ila yo khuhisala ajuwa maana a mattakhuzi aya apale mwaasa yoori aari ovitheya yoori ahiweeleye na khusala oova omuuzela.
Nttunkhulu muufwalume wa pinkuuni
46 Khupuwa onyakulisana vakatthi wa anakhiyoni apale eekesaka onjuwa paani wa yo aari weettelaaye wiiya nttunkhulu. 47 Ila Yinsa khujuwa etthu aari wuupuwelaaye yo, khunthuula mwaana khumweemesa omaasho wawe. 48 Aphano khuwooza anakhiyoni awe yoori: “Otule animpokherelaaye mwaana otu khwa nzina laka, onikipokherela miiyo; otule anikipokherelaaye, onimpokherela otule akirumiyeeyo. Otule anjipushuwisaaye vakatthi venu mooshi, nttunkhulu ti othuuto.”
49 Yaahaya khulupa yoori: “Mwanliimu, namoona ntthu aniikaraaye masheethwani khwa nzina lenu. Fweeyo khunkhattaza mwaasa woohiiyi wa khuntti yetthu.”
50 Yinsa khuwooza yoori: “Mwihinkhattaze. Maana otule ahinvirikanaaye na-fweyo ori phantte yetthu.”
Asamariiya aninkatthala Yinsa
51 Osaleelaka ofiya wakathi wa Yinsa orutela pinkuuni, khujilakelela weetta sitati ya Yeruzaleemu. 52 Khuwaalokozisa akarumeya awe, yo alawaka khusapuwa nti wa Samariiya yoori amweekesele puuro yoomakavo. 53 Ila atthu a nti wa Samariiya khuhimpokhereli, maana aajuwiye yoori eetta ovira eettaka Yeruzaleemu. 54 Yaakhumpa na Yaahaya nawoona vitthu zaya epile khumuuza Yinsa yoori: “Mbwana, ontakha yoori nirume moottho wa pinkuuni owaalukuze, nkhama etthiipo Aliyaasi aaretiiyeezoa?” 55 Ila Yinsa khuzukuluwa khuwaamaruwela araka: “Mweeyo khamwinjuwa rooho mwiriinaazob. 56 Mwaana wa Pinaatamu khateeleeni opwetecha nafusi za atthu, aateeliye wuusuru.” Aphano khulankha khusala alawa nti nkina.
Monkoni wa apale aninlottaaye Yinsa
57 Eettaka olawa ntarikhi khupuwa ntthu mmote khumuuza yoori: “Kintta wuulotta wakhula vahali oneettaavo.”
58 Yinsa khunjipu araka: “Ananthala anaaye maphotto aya, anyannyi anaaye vijaaro zaya, ila Mwaana wa Pinaatamu khana vahali woovumulisavo eeshwa yawe.”
59 Yinsa khumuuza ntthu nkina yoori: “Okilotte.”
Ye khujipu araka: “Mbwana, okilikhe khapula kilawe kanzikhe paapa.”
60 Yinsa khumuuza yoori: “Owaalikhe anamfwa awaazikhe anamfwa aya; weeyo olawe walaleye ofwalume wa Nnyizinku.”
61 Khupuwa ntthu nkina theenya khumuuza Yinsa yoori: “Kintta wuulotta Mbwana, ila okilikhe khapula kawaaleeze ajamaazaku.”
62 Yinsa khunjipu yoori: “Otule aneesaaye makhono awe alimaka khusala eekesa nyuma khaneezela muufwalume wa Nnyizinku.”