Yinsa ari wa Pilaatu
 
15
1 Supuyeene, khukusanyeya Mahaakhimu a tiini, attunkhulu a tiini, anamanozela a kano na Mashawuriiya ooshi, khunfuka Yinsa khunthuula khumwinkha Pilaatu. 2 Pilaatu khumuuzela yoori: “Weeyo o mfwalume wa mayaahuuti?” Ye khujipu yoori: “Weeyo ti onlupaaye.” 3 Mahaakhimu a tiini khunlokoveza vitthu zawaatta Yinsa. 4 Pilaatu khurutela omuuzela theenya yoori: “Weeyo khunjipu? Nkoona vitthu kavi anuulokovezaaye.” 5 Ila Yinsa khuhijipu hatha etthu Pilaatu khwiiya wooshanka.
Yinsa ahukhumweliwa ofwa
6 Yaari zowera yaya, wakathi wa Njampo la Paashikowa, Pilaatu onfukulela napherezu mmote, otule aari ovekiwaaye ti atthu. 7 Mwinyi mmote anitthiwaaye Baraba aafukeliwe vamote na anamakhijili mwaasa wa omuula ntthu wakathi wa nzuzu. 8 Khuntti ya atthu etile khuta na khunvekela Pilaatu yoori arette etile awaazoweziyeeyo owaarettela. 9 Aphano Pilaatu khuwoozela yoori “Mweeyo mwintakha yoori kinfukulele mfwalume wa mayaahuuti?” 10 Maana ye aari ojuwa saaneene, yoori mahaakhimu a tiini anleviye Yinsa mwaasa wa nrima. 11 Ila mahaakhimu a tiini awaakhanyareliye atthu apale yoori anvekele Pilaatu aaze onfukulela Baraba khwa otakha waya. 12 Pilaatu khuwoozela theenya yoori: “Kinrettele niini mwinyi otu mweeyo mwinimwiitthaaye mfwalume wa mayaahuuti?” 13 Yo khunyakula araka: “Akhomeliwe!” 14 Ila Pilaatu khuwoozela yoori: “Niini arettiyeeyo yootakhala?” Ila yo khusala atepa onyakula araka: “Akhomeliwe!” 15 Pilaatu eekesaka otuvelisa khuntti etile ya atthu, khunfukulela Baraba na khuruma ojaphiwa Yinsa na olawa okhomeliwa.
Anajanka aninveyisa Yinsa
16 Anajanka khunthuula Yinsa, khunlawana nlikokoro wa nyuupa khuulu ya nsatoro khukusanya khuntti khuluyeene ya anajanka. 17 Khunwalisa juupa yookhuttuwa, khuvaasha khaara ya miiwa khunwalisa mmwishwa. 18 Khusala anchelisa araka: “Wiiye haayi, mfwalume wa mayaahuuti!” 19 Khusala ampiya veeshwa vawe na nthala na ontthemela, akokhoraka na omwaaputu.
Okhomeliwa wa Yinsa
20 Paata ya onttukhana, anajanka apale khunvula kuwo yookhuttuwa khunwalisa kuwo za wiiya zawe. Aphano khunsarulela vaje yoori alawe ankhomele. 21 Khukutthanana mwinyi mmote wa Sireene aari wiitthiwaaye Simawu, papaawe Alishantere na Ruufu, aari olankhaaye omashapa. Khunkhanyarela othuula nsalapa wa Yinsa. 22 Yo khunthuula Yinsa khunlawana puuro eniitthiwaaye Kolokoota, eriina maana a puuro ya likurakuza la eeshwa. 23 Khusala atakha omwinkha viinyu yoophakanyaniwa mafuttha oonukhela, ila ye khuhinywi. 24 Aphano khunkhomela na khwaawanyana kuwo zawe khwa weekesa nasipu yoori ajuwe wakhula ntthu phantte ari weettelaaye osalana. 25 Aakhomelaniwe wakathi wa saa-ttaatthu, supu. 26 Pi etthiipo yaatikhiweeyo khwa olokoveziwa wawe yoori: MFWALUME WA MAYAAHUUTI. 27 Vamote na ye aakhomeliwe manantarawu awiri, mmote nkhono nlume, nkina nkhono nkha, 28 [na khurettikhana epile zawaatikhiwa zaalupiyeeyo yoori: “Ye aatthanttiwe nkhama namatapanya.”]
29 Apale aari oviraaye attaaphale, eetta onttukhana na osakhinya viishwa zaya araka: “Haya, weeyo ompwechaaye Nyuupa Yoosifwiwamo, khwa siikhu ttatthu khujeka. 30 Wiishukhe vansalapa apho na ojuusuru omweenyewe!” 31 Khwa nanna etthiipile, mahaakhimu a tiini na anamanozela a kano khusala alupa atthaaporu anveyisa yoori: “Awoosuru akina, ila khanwahi ojuusuru mweenyewe. 32 Wiishukhe vansalapa apho O Al-Masiihu, mfwalume wa Ezirayiilu, wiishukhe yoori niwoone na nuukhupali.” Apale aakhomeliweeyo, na yo eetta onttukhana theenya.
Ofwa wa Yinsa
33 Yaapuwiye yiiza olumwenku wooshi, waaza atuhuri mpakha alaasiri. 34 Payina ya alaasiri, Yinsa khukhuwa na huula ya onyakula, araka: “Elooyi, Elooyi, Lama sabatani?” Eto ena maana ya “Nluku aka, Nluku aka, mwaasa aya niini okanswaka? 35 Wakathi atthu apale aari attaaphale asiiliyeevo mattakhuzi apale, khulupa yoori: “Mwisiile, oninkhuwela Aliyaasi!” 36 Mmote aari attaaphale khutthira khulawa khunaanisa shiponja na vinaakiri, khupweha va muutthi na khumwinkha Yinsa yoori anywe na khuri: “Mwinlikhe, nimoone nkhama Aliyaasi onta anlazevo aphale vaya. 37 Ila Yinsa khunyakula channu khwiittha phuumu. 38 Phazira ya Nnyupa Woosifwiwamo khuvaruwa khwaawanyeya phantte piiri, waaza vatulu mpakha vathi. 39 Wakathi namalokozela wa anajanka aariiye omaasho wa Yinsa, ooniyeevo nanna afwiyeeyo, khuri: “Wekhweele mwinyi otu aari Mwaana wa Nluku!”
40 Aakha akina aari oretta eettaka woona vitthu epile zaari orettikhanaaye ari peetiwene. Khwa atthaapo aarivo Mariyamu Mataleena, Mariyamu mamaawe Tiyaaku, nsimaana wa Yuusufu, na Salome. 41 Aakha aya apo amperekhiye Yinsa na omwaawuni wakathi ariiyo Kalileya. Owaalikha apo aya, aarivo aakha akina awaatta aalawaniyeeyo Yeruzaleemu.
Ozikhiwa wa Yinsa
42 Njuwa leettelaka otupweela, mwaasa wa wiiya siikhu ya otthenkeza Saapatu, 43 Yuusufu wa Arimateeya, mwinyi wa fwayita na aari oretta phantte ya Mashawuriiya, oto naye aari oweja ota wa ofwalume wa Nluku, khulawa woominyalavo wa Pilaatu na khuveka mwiili wa Yinsa. 44 Pilaatu khwiiya wooshanka noosiila yoori Yinsa afwa. Khunkhuwela namalokozela wa anajanka khumuuzela nkhama Yinsa afwa. 45 Wakathi ooziweevo ti namalokozela wa anajanka, khumwinkha mwiili wa Yinsa Yuusufu. 46 Aphano Yuusufu khuuzanya kuwo yoolakala yoopeepheya, khwiishusha mwiili wa Yinsa vansalapa aphale, khumputaputela va kuwo etile yoolakala na khunttha nkhapuri yaathipiweeyo va mwaako. Nawiisha, khutthaavo liwe vanlako vaya. 47 Mariyamu Mataleena na Mariyamu mamaawe Yuusufu, aarettiye eettaka woona na khoona mwiili wa Yinsa vahali waatthiiweevo.