9
1 Khusala alupa theenya yoori: “Kiniwuuzani khweele yoori: Khwa apa ariiye apha, akina khanfwa ahooneeni ofwalume wa Nluku otakha na owahi.”
Yinsa, Munsa na Eliyaasi
2 Ziviriyeevo siikhu sitha, Yinsa khunthuula Pheeturu, Tiyaaku na Yaahaya paasi, khuwaalawana vamwaako woolepa woohiivo hatha ntthu nkina. Attaaphale Yinsa khwiiya woozukulisiwa ettaka omoona. 3 Kuwo zawe khwiiya zoottakattha nkhama etthu yawaara ameenaatho ahinwahaaye ofula khuttakatthisa nkhama toowo. 4 Khuwaapuwelela Aliyaasi na Munsa, khusala attakhulana Yinsa. 5 Aphano Pheeturu khumuuza Yinsa yoori: “Mwaaliimu ti yooshapweya wiikhala attaapha. Nintta ojeka heema ttatthu, moote yawo, moote ya Munsa na kiina ya Aliyaasi.” 6 Pheeturu khaari ojuwa etthu yoolupa, maana yo aari wa woova. 7 Elottelanaka khupuwa liwiku khuwaakhutela, na khusiileya huula yaari oraaye: “Otu Mwanaka wompheta waka; mwinsiileze”. 8 Nasaapiru, wakathi eekesiyeeyo nkerekhere, khuhimooni hatha ntthu nkina theenya woohiiyi Yinsa. 9 Eettaka wiishukha vamwaako aphale, Yinsa khuwooza yoori ahimuuze hatha ntthu etile oniyeeyo, mpakha Mwaana wa Pinaatamu asisimuwe muufwa. 10 Mwaasa opule khuthokorela atthaaporu paasi, khusalana okeetisana maana a “osisimuwa muufwa”. 11 Khumuuzela yoori: “Mwaasa wa niini, anamanozela a kano alupaka wiiya yoohithajiya Aliyaasi ota khapula?” 12 Yinsa khuwaajipu yoori: “Khweele Aliyaasi ona ya ota khapula, amana ata onrutisela opheeya vitthu zooshi. Khi mwaasa aya niini yaatikhiwaka yoori Mwaana wa Pinaatamu ona ya ohoowa channu, okatthaliwa na otarawiwa? 13 Ila, miiyo kiniwuuzani yoori Aliyaasi ata, yo khunrettela zooshi aatakhiyeeyo nkhama zaatikhiweezo monkoni wa ye”.
Ovonisiwa wa shapu aariina sheethwani
14 Wakathi afiyeevo aphale aariivo anakhiyoni apale akina, khoona khuntti khuluyeene ewaazukuleliye apale na anamanozela a kano eettaka okheetisana na anakhiyoni. 15 Atthu apale paata ya omoona Yinsa, khwiiya ooshanka khutthirela khunchelisa. 16 Yinsa khuwoozela yoori: “Mwinkhetisana niini?” 17 Mwinyi mmote aari vakatthi wa khuntti etile khujipu yoori: “Mwaaliimu, miiyo kootisela mwanaka ariina sheethwani aninkhattazaaye ottakhula. 18 Wakhula vahali aninsikanaavo, ontta onkwisela vathi. Khusala alaza maphovu na owina meeno, na wookowa. Kawaavekela anakhiyoni awo yoori amwiikare sheethwani aya oto, ila yo khuhinkhitiri. 19 Aphano Yinsa khujipu yoori: “Oo, atthu oohaamini, mpakha lini kiiyaka vamote na mweeyo? Mpakha lini kuuvilelakani? Mwikitiisele shapu oto.” 20 Aphano yo khuntiisa. Wakathi sheethwani amooniyeevo Yinsa, nasaapiru khuntothela mwaana otule ozoromowa woohusutivo khukwela vathi, khwaaza ojuupurusha alazaka maphovu. 21 Yinsa khumuuzela paapa wa mwaana otule yoori: “Zamwaaza lini epi?” Papaawe mwaana khujipu yoori: “Thanku avokoliwe. 22 Swaafu zawaatta, sheethwani oto, ontta onkwisela vamoottho na mmaati yoori amuule. Ila nkhama onwahi oretta etthu, noonele huruma onaawuni.” 23 “Onwahi?” Alupaka Yinsa. “Zooshi zinwaheya khwa otule ankhupalaaye.” 24 Nasaapiru paapa wa mwaana otule khunyakula araka: “Kinkhupali; okaawuni muuhikhupali mwaka!” 25 Wakathi Yinsa ooniyeevo yoori khuntti khuluyeene yeettaka okusanyeya, khunsukisa sheethwani araka: “Sheethwani woohittakhuli na ohisiili, miiyo kinuuruma yoori onlikhe na ohinrutele theenya.” 26 Sheethwani khunyakula, khunsakhinya woohusutivo khusaruwa, shapu khwiiya nkhama ntthu woofwa, khufiyelela atthu akina olupa yoori: “Afwa.” 27 Ila Yinsa khunkhola nkhono awe khunlansa, na khwiiya wa weemela. 28 Paata ya Yinsa orutela owawe, anakhiyoni awe khumuuzela othetekele yoori: “Mwaasa aya niini nahaakhitireliyeeyo omwiikara?” 29 Ye khuwaajipu yoori: “Eto oniikareya khwa lompa na ofuka paasi.”
Yinsa onlupa theenya ofwa wawe na osisimuwa wawe
30 Yo khulaawo okhule aariiwo na khulokhela Kalileya. Yinsa khaatakhiye atthu ojuwa ohali aariiwo, 31 maana eetta owaasomisa anakhiyoni awe na awoozaka yoori: “Mwaana wa Pinaatamu onsaleela winkheleliwa mmakhono wa anaatamu. Yo anlawa amuule, ila siikhu ya ttaatthu onlawa asisimuwe.” 32 Ila yo khayaaweleyiye etthu aari otakhaaye olupa na eetta woova omuuzela.
Nwulu muufwalume wa pinkuuni
33 Khufiya Kafwaranaawu. Ari owawe, ye khuwoozela anakhiyoni awe yoori: “Ntarikhi mwaari okheetisana niini?” 34 Ila yo khuhilupi hatha etthu, maana aari onyakulisana yoori anjuwe paani eeyiyeeyo nwulweene channu vakathi vaya. 35 Eekhaliyeevo, Yinsa khuwaakhuwela apale khumi na awiri khuwooza yoori: “Nkhama ntthu ontakha wiiya wa mwanzo, ona ya wiiya wawiishela na eeye karumeya wa ooshi.” 36 Khunthuula mwaana mmote khunttha vakatthi vaya, khunkholela nkhono awe na khuwooza yoori: 37 “Wakhula otule animpwekherelaaye nsimaana nkhama otu, khwa nzina laka, onikipwekherela miiyo, na otule anikipwekherelaaye khanikipwekherela miiyo, ila onimpwekherela otule akiperekhiyeeyo.
Otule ahiniiphiriwaaye ti fweeyo ori khwa fweeyo
38 Yaahaya khunkhuwela Yinsa khumuuza yoori: “Mwaaliimu, namoona mwinyi mmote eekaraka masheethwani khwa nzina lawo, fweeyo khunlikhisa mwaasa woohiiyi wa khuntti yeetthu.” 39 Yinsa khumuuza yoori: “Mwihinkhattaze, maana khina anrettaaye minjuza khwa nzina laka, elottelanaka khukittakhula wootakhalavo. 40 Maana otule ahiniiphiriwaaye ti fweeyo, ori khwa fweeyo. 41 Nakatalikha, kiniwuuzani khweele yoori: Otule aniwinkhaanini maati oonywa, koopho moote khwa nzina laka, mwaasa wa mweeyo wiiya atthu a Al-Masiihu, weekhweele khinteela omwaashikha phakari yawe.
Okwiselana ntwampi
42 “Amana ntthu ankwisa mmote wa apa attiitthi akikhupaliyeeyo miiyo, afwataali weeseleliwa mpahari afukeliwe liwe liwululene mmwisiko. 43 Na nkhono awo amana wuukosisa, oshije. Afwataali weetta muuhaayi ori woorakala, ehiiyeeni wiiyana makhono awo mawiri khweetta motthooni, ohali oriiwo moottho ohinzimaaye. 44 [Ottuukho nyunku yaya ehinfwaaye wala moottho aya ohinzimaaye.] 45 Na muulu awo amana wuuthowelelisa, oshije. Afwataali weetta muuhaayi ori woorakala, ehiiyeeni wiiyana moolu mawiri khweetta motthooni, 46 [ottuukho nyunku yaya ehinfwaaye na moottho aya ohinzimaaye.] 47 Na amana liisho lawo limote luuthowelelisa, olazemo. Afwataali weetta muufwalume wa Nluku na liisho limote paasi ehiiyeeni wiiyana oomawiri ila khweeseleliwa motthooni, 48 ottuukho nyunku yaya ehinifwaaye na moottho aya ohinzimaaye. 49 Maana wakhula mmote onlawa alukaniwe moottho. 50 Mwiinyu pi wooshapweya; ila mwiinyu aya amana olikha onyuunya, wala khunrutiseleya! Mwiiye mwiinyu mweeyo ena, na mwiikhale na heeri mmote na nzeenu.”