Yinsa oniwaajisa alume alufu nne
8
1 Ziviriyeevo siikhu vattitthiiru, atthu akina awaatta khukusanyeya vamote na Yinsa. Mwaasa wa atthu apale khaarina etthu yoojiwa, khuwaakhuwela anakhiyoni awe khuwooza yoori: 2 “Kiniwoonela huruma atthu apa, maana ana siikhu ttatthu ari vamote na miiyo na khana hatha etthu yoojiwa. 3 Amana miiyo kiwooza olawa owaya najala zaya, yo antta okwa ntarikhi maana akina alankha peetiwene. 4 Anakhiyoni awe khujipu yoori: “Vayi khwa puuro eti niriiyo ya wiitthaleya ntthu anwahaaye opattha phaawu zoofiyela oja atthu apa?” 5 Yinsa khuuzela yoori: “Mweeyo mwina phaawu kavi?” Yo khujipu yoori: “Sapa.” 6 Ye khuwaaruma atthu apale yoori eekhale vathi. Elottelanaka khuthuula phaawu epile sapa, khunshukhurwela Nluku, khumeya khuwenkha anakhiyoni awe yoori awawanyele atthu apale. Yo khuretta etthiipile, 7 Aarina theenya swi kiina ttiitthittiitthi, khuthuula, khuparikhiya na khuwooza anakhiyoni awe yoori awawanyele atthu apale. 8 Atthu apale khuja mpakha orupala. Na khukusanya nyeenye zaasaliiyeeyo khwiitaala khelenke sapa. 9 Aarivo thamani ya atthu alufu nne, khuleezanana. 10 Nasaapiru khweetta mmwaatiya na anakhiyoni awe khusala alawa nti wa Talimanuuta.
Mafwarizeewu anveka alama moote
11 Mafwarizeewu khuta na khwaaza omuuzela Yinsa yoori amoone, na khunvekela alama ya pinkuuni. 12 Ye khusisimira nkatthi-nkatthi na khuri: “Mwaasa aya niini khapila eti evekaka alama moote ya minjuza? Miiyo kinhakikhi yoori hatha alama moote khanlawa winkhiwa.” 13 Aphano khuwaalikha apale aya, khurutela nkalawa khusala alawa phantte kiina.
Othowelelisana wa mafwarizeewu
14 Anakhiyoni apale eettiye osahawu othuula phaawu, aarina phaawu moote paasi nkalawa. 15 Yinsa khuwooza yoori: “Mwijeekesele na mwiiyane phoole na fwaramento za mafwarizeewu na ya Herooti.” 16 Yo khusala akheetisana araka: “Mwaasa aya woohiina phaawu.” 17 Yinsa ajuwiyeevo yoori antta okheetisana, khuwoozela yoori: “Mwaasa aya niini mwinkhetisanaka monkoni wa ohiina phaawu? Nalelo khiniweeleyani wala khamwinsiila? Rooho zenu mweetta wuumisa? 18 Mweeyo mwinaaye maasho ila Khamwinoona, mwinaaye mashiilo ila khamwinsiila, hatha khamwinfikhiri? 19 Wakathi opule kaameyiyeeyo phaawu khuwenkha atthu apale alufu thaanu, khelenke kavi za nyeenye zasaliyeeyo?” Anakhiyoni apale khujipu yoori: “Khumi na piiri.” 20 Khi wakathi opule kaameyiyeeyo phaawu sapa yoori kiwenkhe atthu apale alufu nne, zaasaliye khelenke kavi za nyeenye mwaakhupeliyeeyo? Anakhiyoni khujipu yoori sapa. 21 Ye khuwooza yoori: “Mweeyo nalelo khiniweeleyani?”
Ovonisiwa wa ntthu woohooni nti wa Betezayiita.
22 Aphano yo khufiya Betezayiita, atthu akina ottuukhule khuntanela Yinsa ntthu woohooni, khusala anvekela yoori ansape. 23 Ye khunthuula ntthu otule khunlawana othetekele wa mmuti mphule, khulawa khutthemela mmaasho na khunttheela makhono. Yinsa khumuuzela yoori: “Weeyo onwahi woona etthu?” 24 Ntthu otule khweekesa otulu khuri: “Kiniwoona atthu anumpuwa nkhama miitthi enttaaye weettetta. 25 Theenya, Yinsa khunttheela makhono ntthu otule na khufinikha maasho awe. Aphano maasho awe khufunuwa na khurutela woona zooshi saaneene. 26 Yinsa khunruma olawa owawe amuuzaka yoori: “Ohivire mmuti.”
Otukhuru wa Pheeturu
27 Yinsa na anakhiyoni awe khulawa nti waattamananiyeeyo Sezareeya ya Filiipe. Ntarikhi eettaka olawa, khusala awoozela yoori: “Atthu anri miiyo ki paani?” 28 Yo khunjipu yoori: “Akina anri weeyo o Yaahaya Namoosa, akina anri o Aliyaasi, akinoko aya anri weeyo ommote wa manapiyu.” 29 Yinsa khuwoozela yoori: “Khi mweeyo? Mwinri miiyo ki paani?” Pheeturu khujipu yoori: “Weeyo o Al-Masiihu!” 30 Yinsa khuwaaruma yoori ahimuuze hatha ntthu monkoni wawe ye.
Yinsa onlupa ofwa na osisimuwa wawe
31 Aphano ye khusala owaasomisa araka: Mwaana wa Pinaatamu aarina ya ohoochiwa pi vitthu zawaatta na okatthaliwa pi mahaakhimu a tiini na attunkhulu a tiini, anamanozela a kano na ooliwe, ila siikhu ya ttaatthu asisimuwe. 32 Ye khulupa woosileyavo monkoni aya opo. Aphano Pheeturu khunkhuwelela othetekele khusala anshowera. 33 Yinsa khurutela aphale aariivo anakhiyoni awe khusala aweekesa na khunshowera Pheeturu yoori: “Osale nyuma waka, Sheethwani! Weeyo khunuupuwela vitthu za Nluku, ila vitthu za eenaatamu. 34 Aphano khuwaakhuwela atthu na anakhiyoni awe khuwooza yoori: “Nkhama ntthu ontakha okilotta, ajikatthale mweenyewe, athuule nsalapa awe akilotte. 35 Maana otule antakhaaye wuusuru ohaayi awe ontta omwaashikha, ila otule onimwaashikhaaye ohaayi awe, mwaasa wa miiyo na mwaasa wa hapari zooshapweya ontta wuusurukha. 36 Ena fwayita-ni ntthu oshintta olumwenku wooshi, mwiisho waya khumwaashikha nafusi yawe? 37 Ama niini ntthu anwahaaye opatili na nafusi yawe? 38 Amana ntthu apatthiwa haaya khwa miiyo na mattakhuzi aka khwa khapila epi zoovonya na za twampi, Mwaana wa Pinaatamu onteela opatthiwa haaya khwa otu aya wakathi anttelaaye ota nsiifwa wa Papaawe na malayikha ttakatthiifu.”