Yinsa vakatthi wa zowera za Eyahuuti
7
1 Mafwarizeewu na akina anamanozela a kano alankhiye Yeruzaleemu khukusanyeya na Yinsa. 2 Khusala awoona anakhiyoni awe akina eettaka oja na makhono aharaamu, enlupaaye yoori khanaweeni. 3 Mafwarizeewu na mayaahuuti ooshi khanja ahinaweeni wotwahareshiwavo, alottelaka zowera za attunkhulu a tiini. 4 Amana aruti oparasa, khannja ahaazeeni woosa makhono aya khapula. Anthokorela masomi makina a waatta, nkhama woosa pilawuri, mirinki, zoopo za malaatha na moolili. 5 Aphano mafwarizeewu na anamanozela a kano khumuuzela Yinsa yoori: “Mwaasa aya niini anakhiyoni awo ahilottelaka zowera za attunkhulu a tiini, khusala aja ahinaweeni?’” 6 Ye khuwaajipu yoori: “Manaafikhi! Ezaaya ahupiri saaneene monkoni weenu mweeyo nkhama etthiipo yaatikhiweeyo yoori: ‘Atthu apa anikishitahi na malimi, ila rooho zaya ziri peetiwene na miiyo. 7 Anikaaputu mahala na ansomisa mwentto wa oruma wa eenaatamu. 8 Mweeyo mwintarawu mirumo za Nluku na khusala mwilottela zowera za enaatamu. 9 Yinsa khwiishelana awoozaka yoori: “Mweeyo mwineekesa yoori mwitthe othetekele mirumo za Nluku mwaasa wa oshututela masomi enu! 10 Maana Munsa alupa yoori: ‘Onshitahi papaawo na mamaawo,’ na ‘antakhaaye onlaani papaawe na mamaawe ona ya ohukhumweliwa ofwa.’ 11 Ila mweeyo mwinkhupalela yoori amana ntthu amuuza papaawe ama mamaawe yoori: Wakhula etthu kiniwinkhaanini miiyo zaakha ya omwinkha Nluku,’ 12 khwa nanna eto mwiwerawere ojikhanyarela omwaawuni papeenu na mameenu. 13 Toowo mweeyo khamwinttha fwayita nttakhuzi la Nluku, khwa opatilana zowera zinlankhaaye wa paapa khwa aana aya. Na mwinretta vitthu zawaatta nkhama etthiipi.
14 Yinsa khuwaakharipusha theenya atthu apale khuwooza yoori: “Mwikisiileze mooshi na eweeleyeni epi saana yoori: 15 khina etthu moote ya oje wa pinaatamu enraaye nonvira khunttha oharaamu, ila epile zininlankhaaye nroho mwawe ti eninharamushaaye. 16 Nkhama ntthu onaaye mashiilo oosiila ti asiile! 17 Paata ya owaalikha atthu apale olawa owaya, anakhiyoni khunvekela yoori awooze maana a nlikaniso aya opule. 18 Yinsa khuwoozela yoori: ‘Kiri na mweeyo khiniweeleyani? Yoori khina etthu moote eninviraaye pinaatamu eninharamushaaye? 19 Maana khineetta nroho mwawe, ila mwiijohojoho mwawe, nawiisha khwiitthiwamo.” Khwa etthiipo mattakhuzi apale, Yinsa khutukhuru ottha wiiya halaali vitthu zoojiwa zooshi. 20 Khurutela olupa yoori: “Etile eninsaruwaaye pinaatamu ti eninharamushaaye. 21 Maana nrooho ti, enlakhaamo zawuupuweliwa zootakhala, oshawi akhapa, wiiya, wuula, 22 oraruwa, okhwiririwa,vitthu zootakhala, ohata, oralana woohiiyi wa halaali, nrima, waapa, ojoona na ololo. 23 Zootakhala zooshi zinlankha nroho wa ntthu na piitthiipo zininharamushaaye pinaatamu.”
Waamini wa muukha mmote weeletto
24 Yinsa khulaawo okhule waya khulawa phantte ya Tiiro na Sitooni, khweetta nyuupa yaya eto na khaatakhiye ojuwiwa ti ntthu, ila khuhiwahi ojittha sirini. 25 Ila nasaapiru muukha mmote, aarina mwanawe wa nnatti ariina sheethwani, asiiliyeevo monkoni wa ye, khuta khukokhora nshini wa moolu a Yinsa. 26 Muukha otule aari nkereeka ya siiro-fineesiya aavokoliweewo, khusala anvekela Yinsa yoori amwikare sheethwani otule aari mmwiili wa mwanawe. 27 Ila Yinsa khumuuza yoori: “Owaalikhe khapula aana aje arupale. Khahi yoolotteya othuula phaawu ya aana khuwenkha anapwa.” 28 Muukha otule khujipu yoori: “Khweele, Mbwana aka, ila hatha anapwa, annja tathela vathi wa meeza eniwaakwaayo asimaana. 29 Aphano ye khumuuza yoori: “Mwaasa wa nanna ojipwiyeezo, weeyo, etta; sheethwani ansaruwa mwanawo.” 30 Muukha otule khurutela owawe na khunsikana mwanawe arapaleliye voolili, sheethwani otule anlikhiye.
Yinsa oninvonisa ntthu woohittakhuli na woohisiili
31 Elottelanaka, Yinsa khulankha mmuti mphule wa Tiiro na khulokha Sitooni mpakha ntthatta la Kalileya nti wa Tekapoliishi. 32 Aphano khutiiseliwa mwinyi mmote woohisiili na wookukuma, khunvekela yoori anttheele makhono ye. 33 Yinsa khunlazavo vakatthi wa atthu apale awaatta na khunttha zaala omashiilo wawe. Elottelanaka khutthema na khusapa nlimi la mwinyi aya otule. 34 Aphano khweekesa otulu, khwiittha phuumu na khumuuza mwinyi otule yoori: “Efata” enlupaaye yoori: “Ofunule.” 35 Wakathi otthuupule mashiilo a mwinyi otule khufunuwa na nlimi lawe khuveya, ye khwaaza ottakhula woohiina tafwawuthi. 36 Yinsa khuwooza yoori ahimuuze hatha ntthu. Ila olikha toowo, khwa nanna aari owaakhattazaavo, yo aari otepa olaleya. 37 Atthu ooshi aari osiilaaye aari wiiya ootikinisiwa channu na khusala alupa yoori: “Ye onretta vitthu zooshi saana, mpakha oniwaattakhulisa apale ohittakhuli na owaasiilisa ananhisiili.”