Ovonisiwa wa namasheethwani
5
1 Yo khulokha pahari, khufiya Jerazeenu. 2 Wakathi Yinsa apakhuwiyeevo nkalawa, mwinyi mmote aariina sheethwani khusaruwa nvilalo khuta attaaphale. 3 Mwinyi aya oto aari wiikhala nvilalo, khina mmote aari owahaaye onkhola, hatha ari ntthentte. 4 Maana swaafu zawaatta aari wiiya ntthentte moolu awe na makhono awe, ila ye eetta opwechaka tthentte yaya na ovuja zuuma zaari otthiwaaye mmoolu mwawe. Khaarivo ntthu wookhomaala aari owahaaye onshintta. 5 Osikhu na nthana ye aari weettettaka nvilalo na nnyaako na ojishija na mawe. 6 Wakathi amooniyeevo Yinsa ari peetiwene, khutthira khulawa khukokhora omaasho wawe. 7 Khukhuwa na huula yawe yooshi araka: “Onikitakhelani miiyo, Yinsa mwaana wa Nluku Nwulu? Kinuuvekela khwa Nluku yoori ohikoopopise!” 8 Maana Yinsa aamuuziye yoori: “Oleemo mmwiili wa mwinyi otu, sheethwani.” 9 Aphano Yinsa khumuuzela yoori: “Nzina lawo enriwa paani?” Khujipu yoori: “Nzina laka enriwa khuntti, maana niri awaatta.” 10 Khusala anvekela wonkhanyarelavo yoori ahiwaarume olaamo mmuti mwaya mphule. 11 Liphanko liwululene la kuluwe laari oshukisiwaaye kharipu ya mwaako. 12 Masheethwani apale khusala anvekela Yinsa yoori: “Onirume yoori neette nkuluwe mphule.” 13 Yinsa khwinkha ruhusa masheethwani apale, khusaruwa khweetta nkuluwe. Liphanko laarina thamani ya alufu piiri za kuluwe, khwaaza otthira zilankhaka omwaako ziishukhelaka mpahari, zooshi khuzama khufwa. 14 Apale aari oshukaaye kuluwe zaya epile, khutthira khulawa olupa vitthu epile zaarettikhaniyeeyo waaza nsitati mpakha mmashapa, atthu khulankha olawa woona epile zaarettikhaniyeeyo. 15 Wakathi amwaattamiyeeyo Yinsa, khumoona mwinyi otule aamwitaliyeeyo masheethwani awaatta, eekhaliye awaliye saana na atthiiyemu akhili zawe, atthu apale khwiiya awoova. 16 Apale aari attaaphale, khuwooza atthu zooshi epile zanrettikhaneliyeeyo mwinyi otule aariina masheethwani, na theenya khulupa monkoni wa kuluwe. 17 Aphano atthu apale khusala anvekela Yinsa yoori aleemo mmuti mwaya mphule. 18 Wakathi Yinsa aari owelaaye nkalawa, mwinyi otule aariina masheethwani khunvekela Yinsa yoori anlikhe alawe na ye. 19 Yinsa khuhinkhupaleli, ila khumuuza yoori: “Olawe owawo wawuuze ajamaazo zooshi epile Mbwana ooretteliyeeyo na tthakaraka awooneliyeeyo.” 20 Aphano, mwinyi otule khulawa na khwaaza olupa nti wa Tekapoliishi etile Yinsa anretteliyeeyo. Atthu ooshi khwiiya ooshanka.
Owahi wa Yinsa monkoni wa marati na ofwa
21 Yinsa khupakhira theenya nkalawa alokhelaka kaapu kiina, khuntti khuluyeene khuta khwiitaala aphale aariivo Yinsa nshini wa nttima. 22 Aphano khuta attaaphale namalokozela mmote wa nsinakooka aari wiitthiwaaye Yaayiru, amooniyeevo Yinsa, khukokhora nshini wa moolu awe. 23 Khunvekela wookhanyarelavo yoori: “Mwanaka wankha onsaleela ofwa! Safwatali ote, wanttheele makhono yoori eeye woovona na eeye haayi. 24 Yinsa khusala alawa vamote na-ye, khuntti khuluyeene khusala enlotta na omphunya.
25 Attaaphale, aarivo muukha aariina nyaakha khumi na miwiri eettaka ohoowa mwaasa wa omwiittikha taamu. 26 Ye ahoowiye channu khwa oweekesa anamavonisa na khuharipu nzurukhu awe wooshi aariina, olikha ovona khusala eetta wootepa. 27 Asiiliyeevo ovuwa wa Yinsa, khuta nyuma wawe vahali wawaattiwavo na khusapa ajapi yawe. 28 Maana aari wuupuwela yoori: “Miiyo kisaparu paasi ajapi yawe, kintta ovona.” 29 Nasaapiru yeetta olikha wiittikha taamu etile na muukha otule khoona yoori mmwiili mwawe aari wootaphuliwa ohoowa opule. 30 Wakathi otthuupule, Yinsa khoona yoori wansaruwa owahi, khuzukuluwa khweekesa khuntti etile khuuzela yoori: “Paani asapiyeeyo ajapi yaka?” 31 Anakhiyoni awe khujipu yoori: “Woonaka khuntti khuluyeene eti ekusanyeyiyeeyo, khusala wuuzela yoori: ‘Paani akisapiyeeyo?’” 32 Ila Yinsa nalelo khusala eekesaka vakatthi wa khuntti etile yoori amoone otule aarettiyeeyo etthu yaya etile. 33 Aphano muukha otule, ajuwiyeevo etthu yaarettikhaniyeeyo, khumwaattama khukokhora nshini wa moolu awe eettaka othukumela mwaasa wa woova, khulupa haakhi yooshi. 34 Yinsa khumuuza yoori: “Mwanaka, amini yawo yoovonisa. Olawe na heeri, na wiiye wootaphuliwa ohoowa wawo.”
35 Nalelo Yinsa eettaka ottakhula, khutavo atthu a owawe Yaayiru, namalokozela wa nsinakooka khumuuza yoori: “Mwanawo afwa. Khinihithajiya onwuti theenya Mwaaliimu!” 36 Yinsa khumuuza namalokozela wa nsinakooka mphule yoori: “Ohoove; okhupali paasi.” 37 Na khuhinlikhi hatha ntthu onlotta, woohiiyi Pheeturu, Tiyaaku na Yaahaya ttwiiye Tiyaaku. 38 Wakathi afiiyeevo owawe namalokozela wa nsinakooka, Yinsa khoona tafwawuthi na atthu eettaka olila na ojiliza na huula ya onyakula. 39 Yinsa khuvira nnyupa na khuuzela yoori: “Tafwawuthi yaya eti ti-ya niini na mwinjilizelani? Mwaana khafweeni, ontta olala.” 40 Ila ooshi khwaaza ontheya Yinsa. Ye khurumisa yoori aleemo ooshi, khunthuula papaawe na mamaawe mwaana na anakhiyoni awe apale aariina na khulawa aphale aariivo mwaana. 41 Khunkhola nkhono awe khuri: “Talitha cumi!” liriina maana a “Mwanankha, miiyo kinuuruma yoori olankhe!” 42 Nasaapiru mwanankha otule, aariina hirimu ya nyaakha khumi na miwiri, khulankha na khwaaza weettetta. Ooshi aariivo khwiiya ooshanka. 43 Ila Yinsa khuwooza woosileyavo yoori: Ahiiyevo hatha ntthu anttelaaye ojuwa, na khuruma winkhiwa etthu-yoojiwa.