Nlikaniso wa aamwari khumi
25
1 “Siikhu yaya eto, Ofwalume wa pinkuuni onttela wiiya nkhama aamwari khumi athuuliye makhompe aya, khulawa okutthanana mposi. 2 Athaanu khwa apale khumi aari alolo, athaanu aari akhili. 3 Apale oololo khuthuula makhompe aya, khuhinthuuli patarooya, 4 ila apale a akhili olikha othuula makhompe-ru khunthuula theenya patarooya nttopwiyo. 5 Mposi khurupaza ofiya, na ooshi khuwaakhola osikizi khulala. 6 Ila osikhu layili, khusiileya nkhuwo waari oraaye: ‘Mposi afiya! Mwisaruwe mwampwekherele.’ 7 Aamwari apale ooshi khulankha khusala atthenkeza makhompe aya. 8 Apale oololo khusala awooza apale awiiyana akhili yoori: ‘Mwinimeele patarooya enu vattitthiiru, maana makhompe eetthu antta osizila.’ 9 Yo khujipu yoori: ‘Wala, khanfiyela onrumeyela mweeyo na fweeyo. Mwilawe mwamuuzanye patarooya. 10 Wakathi alawiyeevo omuuzanya patarooya, mposi khufiya, aamwari apale ajitthekiyeeyo khuvira vamote na mposi olawa oja njampo la harusi na nlako khufukiwa. 11 Wakathi vattitthiiru, khusala ata aamwari apale oololo khusala akhuwa araka: ‘Mbwana, mbwana, mwinifukulele nlako!’ 12 Ila ye khuwaajipu yoori: ‘Weekhweele kiniwuuzani yoori akinuujuwani.’ 13 Tiito kiniwuuzanini yoori mwijeekesele, maana mweeyo khamwinjuwa siikhu wala wakathi aya.
Nlikaniso wa nzurukhu
14 “Theenya Ofwalume wa pinkuuni onttela wiiya nkhama mwinyi mmote atakhaka oretta safwari, khuwaakhuwela akarumeya awe khuwaalikhela maali zawe. 15 Mmote khumwinkha milikhi thaanu za nzurukhu wa feeta, nkina khumwinkha milikhi piiri, nkina theenya khumwinkha milikhi moote, wakhula ntthu amwinkhiye khwa makhaamu awe. Elottelanaka khulankha khusala alawa safwari yawe. 16 Otule enkhiweeyo milikhi thaanu za nzurukhu wa feeta, khulankha nasaapiru olawa oretta zanshara khupattha milikhi thaanu kiina. 17 Otule aariina mizurukhu milikhi piiri khupattha milikhi piiri teenya. 18 Ila otule enkhiweeyo nzurukhu milikhi moote khulankha khulawa khuthipa liphotto vathi khutthaavo khuvitha nzurukhu wa mbwana awe. 19 Paata ya ovira wakathi mwinkeene, mbwana wa akarumeya apale khuruti khuretta thamani na apale aya. 20 Otule aapwekheriyeeyo nzurukhu milikhi thaanu wa feeta, khutiisa theenya nzurukhu milikhi thaanu wa feeta na khuri: ‘Mbwana, waakinkhiye nzurukhu milikhi thaanu wa feeta, woona kapattha theenya fwayita ya milikhi thaanu.’ 21 Mbwana khunjipu yoori: ‘Kemaani, karumeya wooshapweya na wawaamineya! Weeyo waamineya khwa ttiitthiiru, apho kintta owinkha yawaatta. Ote ofurahi vamote na mbwana awo. 22 Khuta theenya otule apwekheriyeeyo nzurukhu milikhi piiri wa feeta khuri: ‘Mbwana aka waakinkhiye nzurukhu milikhi piiri wa feeta, kapattha theenya milikhi piiri.’ 23 Mbwana awe khunjipu yoori: ‘Kemaani, karumeya wooshapweya na wawaamineya, weeyo waamineya khwa ttiitthiiru, miiyo kiniwinkha zawaatta. Ote ofurahi na Mbwana awo.’ 24 Mwiisho khuta otule apwekheriyeeyo nzurukhu milikhi moote khuri: ‘Miiyo kaajuwiye yoori mbwana o ntthu woozivala, onuurulaaye na epile ohikheyeeni na okusanya epile ohizaleeni. 25 Tiito keetta woova, khulawa khuvitha nzurukhu awo milikhi moote wa feeta khuthipela vathi. Woone, apha opu nzurukhu awo.’ 26 Mbwana khunjipu yoori: ‘Karumeya wootakhala na wooviliwa! Weeyo waajuwiye yoori kinuurula na epile kihikheyeeni na kinkusanya epile kihizaleeni. 27 Aphano weeyo waarina ya olawana nzurukhu aka opanko yoori amana kiruti kinkhiwe nzurukhu aka wa wiiyana fwayita. 28 Mwinnyakanye nzurukhu opo milikhi moote wa feeta, mwimwinkhe otule ariina milikhi khumi. 29 Maana otule ariina, onttela winkhiwa theenya na oniiyana zawaatta. Ila otule ahina, hatha etile ariina ontta onyakanyiwa. 30 Karumeya woohiina fwayita, mwimweeselele othetekele n'yiiza nttumpho oriimo olila na oluma meeno.’
Ophukiwa wa khapila
31 Amana Mwaana wa Pinaatamu ata nsiifwa mwawe na malayikha ooshi, onttela wiikhala vakhukulu vawe ya nuuru ya pinkuuni. 32 Khapila zooshi zinttela okusanyiwa aphale ariivo, avalule khapila khwa khapila kiina nkhama nshuki avalulaka pwittipwitthi zawe vakatthi wa puuzi. 33 Atthe pwittipwitthi nkhono nlume na puuzi nkhono nkha. 34 Aphano Mfwalume onttela owooza apale anttelaaye wiiya nkhono nlume yoori: ‘Mwite mweeyo ooparikhiyiwa ti Paapa! Mwipwekherele Ofwalume nkhama eritho mwitthenkezeliweeyo thanku wumpiwa wa olumwenku. 35 Maana miiyo yaakikholiye jala, mweeyo khukinkha etthu-yoojiwa; lakikholiye nnyottha, mweeyo khukimeela maati oonywa; kaari nletto mweeyo khukinkha puuro ya omaka. 36 Kathaaleliwe, mweeyo khukinkha kuwo; keetta olwaaziwa, mweeyo khukiinanela; kaari nkalapooso, mweeyo khukithotola.’ 37 Aphano makhaamili anteela onjipu yoori: ‘Mbwana, lini naawoniyeevo na jala khuwinkha etthu-yoojiwa, ama lookholiye nnyottha khuumeela maati? 38 Wakathi-ni nawooniyeevo ori nletto khuwinkha puuro ya omaka? Ama othaaleliwe, khuwinkha kuwo? 39 Wakathi-ni nawooniyeevo ori nlwele ama nkalapooso khuta khuuthotola?’ 40 Mfwalume khujipu yoori: ‘Kiniwuuzani khweele yoori, etile mweeyo mwiwaaretteliyeeyo mmote wa attwiizaku apa attiitthi, mwakirettela miiyo.’
41 Aphano ye onttela owooza apale a nkhono nkha awe yoori: ‘Anamalaanikha mwikaattuwe! Mweette omoottho wa mileele, waattaleleliweeyo Sheethwani na masheethwani awe. 42 Maana miiyo yaakikholiye jala, mweeyo khuhikinkhi hatha etthu-yoojiwa, laakikholiye nnyottha mweeyo khuhikinkhi hatha etthu yoonywa. 43 Kaari nletto mweeyo khihikinkhi hatha puuro yoomakavo, kathaaleliwe mweeyo khuhikinkhi kuwo, keetta olwaaziwa na ofukeliwa nkalapooso, mweeyo wala okithotola.’ 44 Yo anjipu yoori: ‘Mbwana, nawoona lini yuukholiye jala wala luukholiye nnyottha ama ori nletto ama ohina kuwo ama olwaaziwaka na ofukeliwe, fweeyo kuhiwaawuni?’ 45 Ye ajipu yoori: ‘Kiniwuuzani khweele yoori, etile mwihinretteleeni mmote wa apale attiitthi, khamwikiretteleeni na miiyo.’ 46 Apa aneetta ohukhumu khwa mileele, ila makhaamili anttela wiiyana ohaayi wa mileele.”