Ovonisiwa wa namaaharaja
8
1 Wakathi eeshukhiyeevo va mwaako, khuntti khuluyeene yeetta onlotta. 2 Nasaapiru khuta namaaharaja mmote khumwaattama, khumwaaputu akokhoriye khulupa yoori: “Mbwana, onwahi okitwaharesha!”
3 Yinsa khookola nkhono awe, khunsapa khuri: “Katakha, ti otwaharesheye!” Nasaapiru ye khwiiya wootwaharesheya khwa maaharaja. 4 Aphano Yinsa khumuuza yoori: “Vitthu epi ohinthatelele hatha ntthu. Ila olawe, wajithoonyeze wa namalokozela a tiini na olaze zaakha etile Munsa alupiyeeyo yoori yiiye oshaahiti.”
Najanka wa Rooma onthonyeza amini yawe
5 Wakathi Yinsa afiiyeevo sitati ya Kafwaranaawu, eetta oteeliwa ti nttunkhulu wa anajanka, anvekelaka yoori amwaawuni. 6 Khumuuza yoori: “Mbwana, karumeya aka ori onti, onaaye supiyaani, ontta ohoocheya venkivene.”
7 Yinsa khumuuza yoori: “Miiyo kinlawa kanvonise.”
8 Nttunkhulu wa anajanka otule khunjipu yoori: “Mbwana, miiyo akinsuhi wuupokherela vaje vaka. Ila olupe nttakhuzi limote paasi, karumeya aka ontta ovona. 9 Maana na-miyo ki ntthu kiriiye vathi wa ofwalume na ki nlokozi wa anajanka. Kinimuuza mmote yoori: ‘Olawe,’ khulawa; khumuuza nkina yoori: ‘Ote,’ ye khuta. Kinimuuza karumeya aka yoori: ‘Orette khata,’ ye khuretta.”
10 Yinsa noosiila epo zaya, khushanka, khuwooza apale aari onlottaaye yoori: “Kiniwuuzani khweele: Akinsikaneeni Ezirayiilu ntthu ariina amini nkhama eti. 11 Miiyo kiniwuuzani, atthu enkeene a khipula na malawa-juwa, anttela wiikhala va meeza na Eburahiima, Esiyaakha, Yaakhumpa muufwalume wa pinkuuni. 12 Ila apale aari weettelaaye orithi ofwalume wa Nluku anttela weeseleliwa oje, n'yiiza nhali onttelaaye wiiyamo olila na oluma meeno.”
13 Yinsa khumuuza nttunkhulu wa anajanka otule yoori: “Olawe owawo, entta orettikhana nkhama etthiipo okhupaliyeezo.” Wakathi otthuupule karumeya awe khwiiya woovona.
Owahi wa Yinsa monkoni wa masheethwani na marati
14 Yinsa khweetta owawe Pheeturu ottuukho khumoona nkhwewe Pheeturu arapaleliye ari nlwele hooma. 15 Yinsa khunsapa nkhono awe, hooma etile khumwiisha. Khulankha khusala anrumeyela.
16 Paata ya otupweela njuwa, khutiiseliwa anamasheethwani awaatta, ye khusala eekara masheethwani khwa nttakhuzi lawe khuwaavonisa alwele ooshi. 17 Khwa etthiipo khurettikhana epile zaalupiweeyo ti napiyu Ezaaya yoori:
 
“Ye athuula marati etthu
na apwechera moolwele etthu.”
 
Onlotta Yinsa, etthu yoolipa!
18 Yinsa noowoona atthu awaatta anzukuleliye, khuwaaruma anakhiyoni awe olokhela kaapu ya ntthatta. 19 Aphano namanozela wa kano mmote khumwaattama khumuuza yoori: “Mwaaliimu, kintta wuulotta wakhula vahali oneettaavo.”
20 Yinsa khunjipu araka: “Ananthala anaaye maphotto aya anyannyi anaaye vijaaro zaya, ila Mwaana wa Pinaatamu khana vahali woovumulisavo eeshwa yawe.”
21 Nakhiyoni awe mmote khuri: “Mbwana, waaze okilikha kilawe kanzikhe paapa.”
22 Yinsa khujipu araka: “Okilotte, owaalikhe ananfwa awaazikhe ananfwa aya eenyewe.”
Yinsa onnyamaza pheevo yawaatta.
23 Yinsa apakhiriyeevo mmwaatiya anakhiyoni awe khunlotta. 24 Nasaapiru, pheevo yawoopisa khusala evuma mpahari, mwaatiya khusala ozamisiwa ti mawipi, Yinsa ettaka olala. 25 Anakhiyoni awe khunsusela khusala anlansa, ankhuwelaka araka: “Mbwana, onuusuru nasaleela ofwa!”
26 Ye khuwoozela yoori: “Mwinoovani? Atthu oopushuwa amini!” Ye khulankha khushowera pheevo etile na pahari, zooshi khunyamala. 27 Ooshi khusala ashankiye na khulupa yoori: “Otu aya paani hatha anrumaaye pheevo na pahari khunshututela?”
Yinsa oniwaavonisa atthu awiri aashinttiweeyo ti masheethwani
28 Wakathi afiiyeevo phantte kiina, ya Jerazeenu, khunteela anamasheethwani awiri, alankhiyeeyo ovilalo. Yo aari oowali, khina aari oviraaye tarikhi ya etile. 29 Aphano, yo khusala anyakula araka: “Onnitakhelani fweeyo, Mwaana wa Nluku? Wata okhuno oteela onoopopisa, ohinafiye wakathi aya?”
30 Kharipu ya aphale vaya laarivo liphanko la kuluwe. 31 Aphano masheethwani apale khunvekela Yinsa yoori: “Nkhama onniikara, oniikarile nliphanko la kuluwe.”
32 Yinsa khulupa yoori: “Apho mwilawe!” Masheethwani apale khulawa khweetta nkuluwe, liphanko looshi khwiishukela va ntthatta khuttuluwa khufwa. 33 Atthu apale aari oshukaaye kuluwe epile khutthira khulawa mmuti, khulupa zooshi mpakha epile zaarettikhaniyeeyo khwa anamasheethwani apale awiri. 34 Atthu ooshi a mmuti mphule khusala alawa okutthanana Yinsa, nonsikana, khunvekela amuuzaka yoori aleemo mmuti mwaya.