Owaawuni anamathowiwa
6
1 “Mwiiyane phoole na oretta khaazi zenu za shariya vahali aniiyavo atthu akina yoori mwisifwiwe pi yo. Amana mwiretta toowo, khamwiniiyana hatha tthuvo ya Papeenu wa pinkuuni.
2 “Nakataalikha, amana mwinkha zimola mwihithuule nlope khusala mwilaleya, nkhama anrettaazo manaafikhi mmasinakooka na mmaliinya, atakhaka yoori asifwiwe pi akina aya. Miiyo kiniwuuza khweele yoori yo apokhera tthuvo yaya. 3 Ila amana weeyo winkha zimola, nkhono awo nkha ohijuwe etthu orettiyeewo nkhono nlume awo, 4 yoori zimola yawo yiiye siiri. Toowo, Papaawo otule anoonaaye epile enrettiwaaye sirini, ontta wuutthuva.
Nanna ya olompa
5 “Na amana mwilompaka, mwihiiye nkhama manaafikhi. Yo owaatuvela weemela khusala alompa nsinakooka, mmatarikhi, atakhaka yoori ooniwe pi akinoko aya. Miiyo kiniwuuzani khweele yoori yo apokhera tthuvo yaya. 6 Ila amana weeyo olompaka, weette okatthi wawo ofuke nlako awo, onvekele Papaawo ahinooneyaaye. Aphano, othuuto ontta wuutthuva. 7 Na amana olompaka, khahiyo orutela mattakhuzi mamoteru ooheleyi swaafu zawaatta, nkhama anrettaazo amalapo. Yo anaakhipwela yoori mwaasa wa waattisa ottakhula Nluku ti aniwaasiilaavo. 8 Mwihiiye nkhama atthaapo, maana khapula mweeyo mwihinaveke Papeenu onretta ajuwe etthu mwinihithajiyaaye. 9 Nakataalikha, mweeyo amana mwilompaka mwisala mwiri toono:
 
‘Papeetthu oriiye pinkuuni,
littitthimisiwe nzina lawo loottakatthifu,
10 wiishushe ofwalume awo,
mattakhelo awo arettikhane
vathi apha nkhama etthiipo enrettikhanaazo otulu!
11 Oninkhe wakhula siikhu etthu-yoojiwa ninihithajiyaaye.
12 Oniswaamihi koosa zeetthu nkhama etthiipi na-fweyo nininswaamihaaye wakhula otule annikosaaye,
13 na ohinilikhelele nizayiniwaka,
ila nuusuru khwa ntakhali,
[maana ofwalume, owahi,
na siifwa zooshi pi zawo, mileele. Amiina.]’
 
14 Maana amana mwiwaaswaamihi anaatamu koosa zaya, Papeenu wa pinkuuni naye ontta wuuswaamihini, 15 ila amana mwihiswaamihanaka, Papeenu wa pinkuuni naye khanuuswaamihini koosa zenu.
Ofuka
16 “Amana ofuka, ohithoonyeze wuuso wa huzuni nkhama anrettaazo manaafikhi, yo antta ozukulisa wuuso aya yoori akina aya apatthe ojuwa yoori afuka. Miiyo kiniwuuzani khweele yoori nooretta toowo apokhera tthuvo yaya. 17 Ila weeyo amana ofuka, osala woosa wuuso awo, na khushamula nyuuli zawo, 18 yoori akinoko ahijuwe yoori wafuka, ila Papeenu, anoonaaye vitthu za siiri, ye ontta ojuwa yoori wafuka na othuuto ontta wuutthuva.
Maali pinkuuni
19 “Ohikusanye maali vathi apha, oriivo oshuwa, na kuuthu enwahaaye oharipu, na ariivo manantarawu oophenya khwiiya. 20 Ila okusanye maali pinkuuni, ottuukho oshuwa na kuuthu ehinwahaawo oharipu wala nantarawu ahimphenyelaawo khwiiya. 21 Maana attaapho eniiyaavo maali zawo, rooho yawo nayo eniiya attaapho.
22 “Maasho khantteya ya mwiili. Amana maasho awo eeya ooshwapweya, mwiili awo oniiyana nuuru; 23 ila amana maasho awo eeya oohishapweyi, mwiili awo wooshi oniiya n'yiiza. Nakataalikha, amana nuuru oriinaaye ezukuluwa yiiya yiiza, yiiza yaya eto eniiya khuluyeene!
24 “Khaavo ntthu anwahaaye owaarumeyela a mbwana awiri, mwaasa yoori ontta omwiiphiirisa mmote, antuvelise otu nkina; ama oniiya wa waamineya khwa otu mmote, antarawu otu nkina. Khinwaheya onrumeyela Nluku na nzurukhu.
Tafwawuthi za ohaayi
25 “Tiito, kiniwuuzanini yoori: Mwihiiye woovelavelela ohaayi enu, khwa etthu-yoojiwa ama yoonywiwa; wala mwiili enu monkoni wa etthu ya owala. Ohaayi enu waziti etthu-yoojiwa. Na mwiili enu waziti kuwo. 26 Mwiwoone anyannyi otulu: Khanzala, khanuurula wala khana sakafu; ila Papeenu wa pinkuuni oniwaajisa. Nakataalikha mweeyo mwinaaye fwayita zayita anyannyi. 27 Paani wa mweeyo anwahaaye weekezela mansha awe hatha nkhama eetta oshukulikhela?
28 Khi mwinvelavelelani kuwo? Moone nanna enwulaazo miitthi za ntthuttu na maluwa aya: yo khazinkhola khaazi, wala khazinsona. 29 Ila wekhweele miiyo kiniwuuzani yoori, Seleyimaana na oshapweya wawe khawaleeni kuwo zooshapweya nkhama maluwa apa. 30 Moone, Nluku onwalisa nyaani za ntthuttu leelo ziniiyaavo meesho khulukuziwa, onuuwalisani mweeyo channu atthu oopushuwa amini! 31 Nakataalikha mwihishukulikhe, mwiraka: ‘Ninja niini?’ Ama ‘ninnywa niini?’ Ama ‘ninwala niini?’ 32 Maana amalapo pi anshukulikhelaaye vitthu nkhama epo; ila Papeenu ariiye pinkuuni onjuwa yoori enuuhithajiyani epo zaya. 33 Apho, mweekese khapula Ofwalume wa Nluku na shariya yaya, zooshi epo mwintta winkhiwa. 34 Nakataalikha mwihishukulikhele siikhu ya meesho, maana meesho entana tafwawuthi zaya. Wakhula siikhu eniiyana otakhala waya.