Katapu ya Yuunusa na huruma ya Nnyizinku
4
1 Erettiyeevo toole, Yuunusa khuhintuveli etile yaya, na khwiiya wookatipukha. 2 Ye khusala amuuza Nnyizinku araka: “Oo Nnyizinku aka, khahiyo eti kaalupiiye nalelo kiri onti? Ti ethiito yaakipatthisiyeeyo otthira keettaka Taarisi. Miiyo kaajuwiye yoori weeyo o Nnyizinku wa tthakaraka na wa huruma, woovilela na woopheta channu, onaahitaaye ohukhumu ila khulevelela mmana wiiyavo othupwiya. 3 Aphano Mbwanaaka okilaze nafusi yaka, kinhithari ofwa kihiiyeeni wiiya haayi.”
4 Ye Nnyizinku khulupa: “Weeyo onaaye shariya yookatipukha?”
5 Yuunusa aalawiye khwiikhala mashaarikhi ya sitati ethiitile. Khujeka lipantta lawe, khwiikhala vamwiivuuli, khusala aweja etthu-ni yaari weettelaaye orettikhana sitati etile. 6 Aphano, Nnyizinku khootthisa nrayi khurapela vatulu valipantta aphale aariivo Yuunusa, yoori eeye vamwiivuuli na aawuneye haari. Nrayi opule waamwinkhiye furaha ya waatta Yuunusa. 7 Ila mmeesho mwaya supuyeene, Nluku khumperekha mwanyanyama khurafuna nrayi opule, khuuma. 8 Etthamu-tthamu ya njuwa, Nluku khuperekha pheevo ya mashaarikhi yoolukuza channu, naye njuwa khusala lipiyela veeshwa vawe Yuunusa, khusala asaleela ozileya. Eviriyeevo toole, ye khusala ajitakhela ofwa, na khuri: “Toono afwataali ofwa ehiiyeeni wiiya haayi.”
9 Ila Nluku khumuuzela Yuunusa: “Weeyo onaaye shariya yookatipukha mwaasa wa nrayi?” Ye khujipu: “Ayo, kinaaye! Na ki wookatipukha kintakha hatha ofwa.”
10 Aphano Nnyizinku khumuuza: “Weeyo onoonela huruma nrayi opo, ohikholeleeni khaazi wala ohiwuliseeni, woottha osikhu mmote na osikhu nkina khufwa. 11 Ila Neniive awaakho atthu anzitaaye eshiriini wa miiya alufu, ahinjuwaaye othawula etthu yooshapweya wala etthu yootakhala, na nyama za waatta. Miiyo akaari oteela wiiyana huruma na sitati khuluyeene etile?”