Lupattha ya amisuri
14
1 Nnyizinku khumuuza Munsa yoori: 2 “Owooze meezirayiilu yoori asapuwe alawe amake kharipu ya Piharoote enakatthi-nakatthi ya Mikotooli na pahari. Mwamake nshini wa pahari omaasho ya Baale-Zefooma. 3 Paata ya toole Firawuuna khusala oopuwela yoori meezirayiilu antta ojeettettela athowelela n'yaara. 4 Khwa etthiipo kinlawa koomise rooho ya Firawuuna, ye onlawa awiikariseni, paata ya toowo miiyo kinlawa kattitthimisiwe vakatthi wa Firawuuna na anajanka awe ooshi. Amisuri anlawa ajuwe yoori miiyo ki Nnyizinku.” Meezirayiilu khuretta etthiipo.
5 Ila wakathi ooziweevo mfwalume wa Misuri yoori meezirayiilu atthira, ye na anakhaazi awe khuzukulisa akhili zaya na khulupa yoori: “Niini nirettiyeeyo? Nawaalikha meezirayiilu olawa anaashikha amwiitthwaana etthu!” 6 Aphano mfwalume khuruma weetteliwa nkukutta awe wa viittha na anajanka awe. 7 Khuthuula theenya mikukutta miiya sitha epile zookhomaala na mikukutta zooshi za Misuri na anamalokozela ooshi. 8 Nnyizinku khukhomaaza rooho ya Firawuuna mfwalume wa Misuri, khusala aweekarisa meezirayiilu aaliiyewo khwa nanna wooshinttavo. 9 Firawuuna khusala aweekarisa na khavalo zawe zooshi, mikukutta zawe zooshi na anakhavalo awe na anajanka awe, khuwaasikana amakiye nshini wa pahari kharipu ya Piharoote omaasho wa Baale-Zefooma.
Olokha pahari
10 Firawuuna asaleelaka owaasikana, meezirayiilu khweekesa nyuma khuwoona amisuri eettaka ota phantte etile aariiwo. Khuwaapattha woova channu, khusala ankhuwela Nnyizinku. 11 Na khumuuzela Munsa yoori: “Misuri zeetta othowawo vilalo tiito onilaziyeewo yoori nite nifwele n'yaara mphu? Niini eti weeyo oniretteliyeeyo, yoonilazawo okhu? 12 Tiito nawuuziyeeyo Misuri yoori: ‘Onilikhe niiye aviitthwaana amisuri! Afwataali wiiya amwiitthwaana amisuri ehiiyeeni ofwa n'yaara.”
13 Munsa khuwaajipu atthu apale yoori: “Mwihoove, mwiiye wookhomaala na moone nusura Nnyizinku anttelaaye wuutiselani leelo. Maana khamwinttela owoona theenya amisuri apa mwiniwoonaaye leelo. 14 Nnyizinku onttela wuumana mwaasa wa mweeyo, mwiiye woonyamala.”
15 Khulupa theenya Nnyizinku amuuzaka Munsa yoori: “Mwaasa aya niini mwikikhuwelaka miiyo? Owooze meezirayiilu avire alawaka. 16 Weeyo olanse pakhora yawo ojaphe maati, antta waawanyeya yoori meezirayiilu alokhe eri tuulu yawuuma. 17 Miiyo kinttela wuumisa rooho za amisuri, yo anttela wuulottelelani mpahari nttumpho. Miiyo kinttela wiiya woottitthimisiwa amana kinshintta mfwalume wa Misuri na anajanka awe ooshi na mikukutta zawe zooshi za nvittha na anakhavalo awe ooshi. 18 Amisuri anttela ojuwa yoori miiyo ki Nnyizinku amana kittitthimisiwa khwa Firawuuna na mikukutta zawe na anakhavalo awe.”
19 Aphano nlayikha la Nluku ntthile lawaalokoziyeeyo atthu a Ezirayiilu khuwaalikha khurutela nyuma waya; theenya nripu la liwiku khuwaalikha khurutela nyuma waya, 20 khwiiya vakatthi wa amisuri na meezirayiilu. Liwiku laari wiiya looripa phantte ya amisuri khusala liwaamwasikhela meezirayiilu; mwaasa wa ethiito khuhisala liwaattamanisa meezirayiilu na amisuri osikhu wooshi.
21 Munsa khookolela nkhono awe pahari, Nnyizinku khuvumisa pheevo zookhomaala za ntulayi osikhu wooshi mpakha pahari waawanyeya khupuwa mishaka zawuuma mwaasa wa waawanyeya wa maati. 22 Meezirayiilu khulokha vakatthi wa maati khwa mishaka zawuuma, khupuwa muuri phantte ya nkhono nlume na nkhono nkha.
23 Amisuri khusala aweekara na khavalo zaya zooshi, mikukutta zaya za nvittha na anakhavalo ooshi a Firawuuna khusala awaalotta mpakha vakatthi wa pahari. 24 Osaleelaka ocha nkatthi wa nripu la moottho na la liwiku, Nnyizinku khuwoona anajanka amisuri khuwaakarawela. 25 Khuretta etthu yoophara maroota za mikukutta za amisuri nkhama ahaari ojuwaaye weettettisa na khusala akhuwa araka: “Nlaweni niwaatthire meezirayiilu! Nnyizinku ontta wuumanana amisuri khwa zwaamu yaya yo.”
Amisuri anfwa mpahari
26 Nnyizinku khumuuza Munsa yoori: “Wookolele nkhono awo khwa pahari, yoori maati awaakhutele amisuri na mikukutta zaya na anakhavalo aya.” 27 Munsa khookolela nkhono awe pahari osaleelaka ocha, maati khurutela etthiipile aariizo. Wakathi amisuri aari ariiye atthire, khukutthanana maati a pahari, aphano Nnyizinku khuwaakhutela na pahari. 28 Maana maati aarutiye khukhutela mikukutta na anakhavalo, na anajanka ooshi a Firawuuna eeshukheliyeeyo mpahari; hatha mmote khaarutiye.
29 Ila meezirayiilu khulokha pahari etile eettaka oluwatthela mishaka, maati aari nkhama muuri phantte ya nkhono nlume na phantte ya nkhono nkha. 30 Etthiipile Nnyizinku khuwoosuru meezirayiilu siikhu etile mmakhono wa amisuri, na meezirayiilu khuwoona amisuri ari oofwa mmattima wa pahari etile. 31 Meezirayiilu khoona owahi nwulweene wa Nnyizinku na khumoova Nnyizinku aya na khunkhupali Nnyizinku na Munsa karumeya awe.