Pala ya thaanu: Ofwa wa nyama
9
1 Nawiisha Nnyizinku khumuuza Munsa araka: “Olawe wa Firawuuna wamuuze yoori: Nnyizinku, Nluku wa meepereewu, alupa toono: Owaalikhe atthu aka alawe akaaputu. 2 Amana weeyo nalelo ohitakhi owaalikha olawa na khukhanyarela owaakhattaza, 3 ojuwe yoori nkhono wa Nnyizinku ontta otiisa pala yawoopisa khwa nyama zawo ziriiye omashapa, khwa khavalo zawo, khwa apuuru awo, khwa nkamiiya zawo, khwa mompe zawo mpakha pwittipwitthi zawo. 4 Na Nnyizinku onteela ophakula nyama za amisuri na epi za meezirayiilu, yoori ehifwe hatha nyama moote ya meezirayiilu.”
5 Nnyizinku atthoma wakathi araka: “Meesho Nnyizinku ontta oretta mmuti mphu etile aahitiyeeyo.” 6 Mmeesho mwaya Nnyizinku khuretta etthiipo: nyama za amisuri zooshi khufwa, ila za meezirayiilu hatha moote khuhifwi. 7 Firawuuna khunruma ntthu olawa woona, khusikana hatha moote ya meezirayiilu ehifweeni; ye khuumisa rooho khuhitakhi owaalikha olawa atthu apale.
Pala yasiitha: Makhwatta a puupa
8 Aphano Nnyizinku khumuuza Munsa na Arawu yoori: “Mwisavule fuutha ya vamafiya yawiitaala mmakhono Munsa amwazele otulu, Firawuuna ari attaapho. 9 Entta othatuwa yiiye lifufu khwa nti wooshi wa Misuri, puupa entta owaapuwa atthu mpakha nyama, Misuri yooshi.”
10 Yo khuthuula fuutha ya vamafiya khulawa wa Firawuuna; Munsa khumwazela fuutha etile otulu, puupa khuwaapuwa atthu mpakha nyama. 11 Wala anamajintta khuhisala awahi omwaattama Munsa, mwaasa wa makhwatta, awaapatthiyeeyo vamote na amisuri ooshi. 12 Ila Nnyizinku khuumisa rooho ya Firawuuna, ye khuhinsiili Munsa na Arawu nkhama etthiipo Nnyizinku amuuziyeeyo.
Pala yasaapa: Vuula ya mawe
13 Nnyizinku khumuuza Munsa yoori: “Olankhe supuyeene olawe wakutthanane Firawuuna, omuuze oraka: Nnyizinku, Nluku wa meepereewu, alupa toono: “Owaalikhe atthu aka alawe akaaputu. 14 Olikha toowo, swaafu eti pala yaka yooshi kinuutiisela omweenyewe, na mashawuriiya awo na atthu awo, yoori ojuwe yoori khina eeyiye nkhama miiyo olumwenku wooshi. 15 Maana miiyo kinwahi wookola nkhono aka khuulwaaza weeyo na atthu awo khwa pala yaari owahaaye wuulazavo voolumwenku. 16 Ila miiyo kinuulikha weeyo ori haayi yoori kithoonyeze owahi waka, yoori nzina laka lilaleyiwe mmuti wooshimo. 17 Nalelo ontta ojikhutupulana atthu aka, khuntakha owaalikha alawa? 18 Ila meesho wakathi otthuupu, kinlawa kanyise vuula ya mawe ehinanyeke nti opu wa Misuri thanku owaziwe mpakha leelo. 19 Apho owaarume atthu awo alawe alokotthele nyama zawo ziriiye omashapa na vitthu zawo ziriiyo waaza atthu mpakha nyama ziriiyo. Amana ohilaziwo otana onti, khunyeliwa vuula ya mawe entta ofwa.”
20 Akarumeya a Firawuuna aari woovaaye nttakhuzi la Nnyizinku khwaakuva khulawa khuwaalazawo, aviitthwaana aya mpakha nyama zaya khulawa khupwehiwa. 21 Ila apale ahaari woovaaye nttakhuzi la Nnyizinku khuwaalikha amwiitthwaana aya na nyama zaya omashapa.
22 Aphano Nnyizinku khumuuza Munsa yoori: “Olanse makhono awo yoori ewaanyele vuula atthu, nyama, na miitthi zooshi za ntthuttu nti wooshi wa Misuri.” 23 Munsa khulansa pakhora yawe khuthoonyeza otulu, Nnyizinku khuvumisa taari na vuula ya mawe, Nnyizinku khwiishusha ozerima na taari khwa nti opule wa Misuri na vuula ya mawe khusala enya. 24 Vuula ya mawe na taari khuvuma yoopakhanyeya na mawe awoopisa ehinanyeke Misuri yooshi thanku ewaziwe. 25 Misuri yooshi vuula etile khutapanya vitthu zaari mmashapa, waaza atthu, nyama na mathapa mpakha miitthi zooshi za ntthuttu. 26 Khusala nti wa Gosheeni paasi, okhule aari wiikhalaawo meezirayiilu, okho khayaanyiyewo vuula ya mawe.
27 Aphano Firawuuna khuruma olawa okhuweliwa Munsa na Arawu khuwooza yoori: “Swaafu eti kakosa. Nnyizinku ti wa shariya, ila miiyo na atthu aka, na makaafiri. 28 Mwilompe wa Nnyizinku, maana ottitthima wa Nluku na mawe ankwaaye a vuula pi awaatta, miiyo kintta wuulikhani mwilawe mwiheekesele etthu kiina theenya.”
29 Munsa khujipu yoori: “Amana miiyo kilaamo nsitati mphu kintta wookolela nkhono aka wa Nnyizinku. Taari enyamale na vuula yaamuse yoori weeyo ojuwe yoori olumwenku pi wa Nnyizinku. 30 Ila weeyo na akarumeya awo, miiyo kinjuwa yoori khamwinimoova Nnyizinku Nluku.”
31 Alikutawu na ntthama zaharipweya mwaasa ntthama waarina phunje na alikutawu aaleyiye. 32 Naye tiriku khayaaharipweyiye maana yaari ehinootthe.
33 Munsa khulaavo aphale aariivo Firawuuna na nsitati mphule, khumookolela nkhono Nnyizinku, taari na vuula khwiisha. 34 Firawuuna nawoona yoori taari na vuula zeesha khurutela okufuru oomisaka rooho yawe na mashawuriiya awe. 35 Ari wawuumisa rooho etthiipo, khuhiwaalikhi meezirayiilu olawa, nkhama etthiipo Nnyizinku aamuziyeezo Munsa.