Firawuuna oneekezela hukhumu
5
1 Paata ya toole Munsa na Arawu khulawa ottakhulana Firawuuna amuuzaka yoori: “Nnyizinku, Nluku wa meezirayiilu alupa toono: ‘Owaalikhe atthu aka alawe akirettele njampo n'yaara.”
2 Firawuuna khujipu araka: “Nnyizinku paani wonshututela miiyo khuwaalikha olawa meezirayiilu? Akininjuwa Nnyizinku aya na akiniwaalikha meezirayiilu olaamo mphu.”
3 Munsa na Arawu khukhanyarela araka: “Nluku wa meepereewu ettiye oniteela, safwatali onilikhe nilawe narette safwari ya siikhu ttatthu neettaka n'yaara, namwinkhe twaha Nnyizinku, Nluku etthu, noohiiyi etthiipo antta oniteela marati ama ontta onuula na phanka.”
4 Aphano mfwalume wa Misuri khumuuza Munsa na Arawu yoori: “Mwaasa aya niini mweeyo mwiwantipwaka atthu na khaazi zaya? Haya! Mwilawe mwakhole khaazi zoolipa.” 5 Theenya Firawuuna khulupa yoori: “Atthu apa pi awaatta ila mwintta owaalikhisa okhola khaazi zaya.”
6 Siikhu ethiitile Firawuuna khuwenkha nrumo anamalokozela awe na masuphayi anakhaazi, araka: 7 “Waaza leelo ethiiti mwihirutele owenkha malala awaattalana thizolo nkhama mwaari orettaazo; asala alawa weekesa eenyewe. 8 Ila mwiwaakhanyarele waattala thamani ethiitile aari waattalakaaye, mwihiwaavukule hatha etthu; apa aya anamaviliwa, ti eto aaziyeeyo okhuwa araka ‘ninttela omwinkha twaha Nluku etthu.’ 9 Mweekezele khaazi yaya yoolipa yoori ashikheye ahisiileze vitthu zoohatiwa.”
10 Anamalokozela na masuphayi khulawa khuwooza atthu apale yoori: “Firawuuna alupa toono: ‘Nilikhe owinkhani malala. 11 Mwilankhe mwilawe mwawooze yoori alawe akusanye malala nhali anwahaaye opatthamo, na khaazi yenu yoolipa khinteela ovukuwavo hatha etthu.” 12 Aphano atthu apale khumwazeyela nti wooshi wa Misuri khukusanya nyaani khwa zwaamu ya malala. 13 Anamalokozela a khaazi khuwaattitta awoozaka yoori: “Mwiishise khaazi khwa nanna mooziweezo okhola wakhula siikhu wakathi opule mwaari winkhiwaavo malala.” 14 Khujalitiwa masuphayi ameezirayiilu apale atthomiweeyo pi anamalokozela a anakhaazi a Firawuuna, na khusala oozeliwa yoori: “Mwaasa aya niini mwihiishisaka khaazi yenu ya waattala thizolo taana wala leelo nkhama mwaari orettazo raku?”
15 Aphano masuphayi a meezirayiilu khulawa ojiliza wa Firawuuna yoori: “Mwaasa aya niini owaatthanttaka toono akarumeya awo? 16 Malala khaninkhiwa na ninuuziwa waattala thizolo. Woone, nintta ojalitiwa; ila atthu awo pi ariina paathuli.”
17 Ila Firawuuna khujipu yoori: “Anamaviliwa! Mweeyo oviliwa! Tiito mwinraaye; ‘Nintakha olawa omwinkha twaha Nnyizinku.’ 18 Nasaapi ethiiti mwirutele okhaazi. Khamwinteela opokhera malala! Ila mwina yawuupa thizolo thamani ethiito mwaari wuupakaaye!”
19 Masuphayi apale a meezirayiilu khujuwa yoori aari nhukhumu, mwaasa woosiila yoori ahivukule thamani ya thizolo ooziweeyo waattala wakhula siikhu. 20 Paata ya masuphayi apale noolaavo aphale aariivo Firawuuna, khunsikana Munsa na Arawu eettaka owaaweja. 21 Yo khulupa yoori: “Nnyizinku ti awooneni na oophukeni; maana mweeyo mwaniretta fweeyo wiiya atthu awiiphira omaasho wa Firawuuna na wa akarumeya awe khuwenkha phanka mmakhono mwaya yoori anuule.”
Nnyizinku onlaleya otaphuliwa wa atthu
22 Aphano Munsa khuzukuluwela wa Nnyizinku khumuuza yoori: “Oo Mbwana, wawaahukhumwelani atthu apa? Khi wakirumeliyeeni? 23 Maana thanku kilawiyeevo ottakhulana Firawuuna khwa nzina lawo yoori ontta owaahukhumu atthu apa, weeyo khawaarettiye hatha etthu yoori owaataphule!”