Ovokoliwa wa Munsa
2
1 Mwinyi mmote wa lihimo la Leevi anraliye muukha wa lihimo limote na ye. 2 Khumwiimitthisa khunvokolela mwaana. Amooniyeevo yoori aari wooshapweya khunvitha khwa nyeezi mittatthu. 3 Nawoona yoori khayaari owaheya ovira anvithaka theenya, khuthuula khelenke ya tteketthe khumattha na piriniisi khuntthaamo mwaana otule, khulawa khunttha ntteketthe nkhome wa muuttho Niilu. 4 Nlupuwe mwaana otule eemeliye toole sirini yoori oone niini yaari weettelaaye onrettikhanela.
5 Mwaana wankha wa Firawuuna khwiishukhela mmuttho olawa woowa, ajaazi awe aarina khusala avira nkhome wa muuttho, ye khoona khelenke etile eri ntteketthe khunruma njaazi awe khweettela. 6 Afunuliyeevo, khunsikanamo mwaana eettaka olila. Khumoonela huruma khuri: “Mwaana otu tuwa meezirayiilu.”
7 Aphano, nlupuwe mwaana otule khumwaattama mwaana wa Firawuuna khumuuzela yoori: “Onuupuwela toovi? Ontakha miiyo kilawe kankhuwele nunu mmote mwiizirayiilu ate asala amwaamwisa?”
8 Mwaana wa Firawuuna khunjipu yoori: “Haya etta.” Aphano mwanankha khulawa onkhuwela maama wa mwaana othuutule. 9 Aphano, mwaana wa Firawuuna khumuuza yoori: “Onthuule mwaana otu omwaamwise zwaamu yaka, kintta wuuripha phakari yawo.” Nunu otule khunthuula mwaana khusala amwaamwisa. 10 Paata ya mwaana otule owula khuntiisela mwaana wa Firawuuna khunretta wiiya mwanawe. Khuntthaja nzina la Munsa, araka: “Maana koolaza mmaati.”
Munsa onimuula mmisuri na khutthirela Miitiya
11 Siikhu moote, wakathi Munsa apatthiyeevo omwinyi, khulankha khulawa wa attwiize meepereewu khoona khaazi yoolipa aari okholisiwaaye na theenya khumoona mmisuri aari ompiyaaye na onvulalisa mwiipereewu. 12 Khweekesa okhuno na okhuno nawoona yoori khaari otawo hatha ntthu, khumuula mmisuri otule khunttukuttha vanshaka.
13 Siikhu yaphiiri khuwaasikana meepereewu awiri oomanaka khumuuza otule aariina paathuli yoori: “Onimpiyela-ni nzaawo?” 14 Ye khumuuzela yoori: “Paani awinkhiyeeyo onamalokozela weetthu ama onamaphuka? Ontakha okuule nkhama omuuliyeezo mmisuri otule?” Munsa khoova khuri: “Ee, ajuwa etthu kirettiyeeyo!”
15 Firawuuna nawuuziwa vitthu epile khujilakelela omuula Munsa; ye khutthira khulawa mpakha nti wa Miitiya khwiikhala nshini wa nlipu. 16 Namalokozela a tiini wa Miitiya aarina aanaawe sapa aakha, yo khuteela ottekha maati atthe n'yopo mwaya enkhe nyama za papaaya. 17 Aphano khuta mishuki mikina khusala aweekara, ila attaaphale Munsa khulankha khusala awaakisa na khwinkha maati nyama zaya.
18 Wakathi aruteliyeevo wa papaaya Rewele,a ye khuwoozela yoori: “Leelo mwaruti supuyeene mwaasa wa niini?”
19 Yo khujipu yoori: “Mmisuri mmote ti anaakisiye mmakhono wa mishuki mikina na othuuto khunittekhela maati khunywisa nyama zeetthu.”
20 Khuuzeliwa ti papaaya yoori: “Apha yaya ori vayi? Mwanlikhelani? Mwankhuwele ate aje na fweeyo.”
21 Munsa khukhupalela na khutakha wiikhalana mwinyi otule, mwanawe aari wiitthiwaaye Zipoora khunlooza. 22 Zipoora khunvokola mwaana, Munsa khuntthaja nzina la Yeerisonib alupaka yoori: “Kasaafirela nti wa malaponi.”
23 Ziviriyeevo siikhu zawaatta khufwa mfwalume wa Misuri; atthu a Ezirayiilu khusala asisimira na okhuwa monkoni wa oviitthwaana, nkhuwo aya opule khunfiyela Nluku. 24 Nluku noosiila osisimira waya opule khufikhiri wahati aarettaniyeeyo Eburahiima, Esiyaakha na Yaakhumpa. 25 Nluku khuwoona meezirayiilu khumweeleya tafwawuthi aariinaayo.