Attwiize Yuusufu anrutela Misuri theenya.
43
1 Jala etile yeetta otepa yaattaka mmuti. 2 N'ooweeshela tiriku etile aalaziyeeyo Misuri, papaaya khuwooza yoori: “Mwirutele theenya Misuri moozanye etthu-yoojiwa.”
3 Ila Yuuda khujipu araka: “Kiniwuuzani khweele, nttunkhulu wa Misuri anihirimiza channu yoori nihirutelewo nihinlawaneeni ttwiiyetthu otu w'eefutti. 4 Amana mwinlikha ttwiiyetthu olawa na-fweyo, ninlawa noozanye etthu-yooja yenu. 5 Ila amana mwihininkhi khaninlawa, maana nttunkhulu oto anuuza yoori amana nihinlawani ttwiiyetthu nihirutelewo.”
6 Ezirayeele khuwoozela: “Mwamuuzela-ni yoori mwinaaye ttwiiyenu nkina? Mwakitothela pala khuluyeene.”
7 Yo khujipu araka: “Mwiinyi oto eetta onuuzela yoori anijuwe fweeyo na ajamaazetthu. Khuvira anuuzelaka theenya yoori: ‘Papeenu ori haayi? Mwinaaye ttwiiyenu nkina theenya?’ Fweeyo naarina yoojipu epile aari onuuzelaazo. Fweeyo naajuwiye yoori onttela oniila onlawana ttwiiyetthu?”
8 Aphano Yuuda khumuuza papaawe yoori: “Mwinlikhe shapu otu kilawena miiyo nasaapi ethiiti, nihifwe jala fweeyo na-mweyo na aaneetthu. 9 Mwikikhupali miiyo, kinjaahiti omwiinanela na ontthantta. Amana kihinrutisi ari nkumi, kiniiyana paathuli ohaayi aka wooshi mmakhono mwenu mweeyo. 10 Eriwaka khanaarupaziye nka nilawiye niruteliyewo swaafu yaphiiri.”
11 Aphano Ezirayeele, papaaya khuwooza yoori: “Nkhama pi etthiipo khina nanna kiina. Mwithuule vitthu zooshapweya za mmuti mphu, waaza paalasamu, asali, viluko, mafuttha oonukhela, na vitthu kiina nkhama amentowa, mwilawe mwamwinkhe mwiinyi oto. 12 Mwithuule nzurukhu wa feeta swaafu piiri na opu mwisikaniyeeyo mvisurupa mwenu mwilawane, khinjuweya eettiye ovonyela. 13 Mwinthuule ttwiiyenu mwilawe mwakutthanane mwiinyi oto. 14 Nluku Woowahi Wooshi amwinkhe wiiyana huruma na-mweyo, yoori oorutiseleni ttwiiyenu otu nkina na anlikhe Bejami ate. Maana, amana miiyo akaashikha aanaaka kinsala etthiipo woohiina mwaana.”
15 Yo khuthuula vitthu epile enkhiweezo na nzurukhu vamote na Bejami khusala alawa Misuri wa Yuusufu. 16 Yuusufu n'oomoona Bejami ari vamote na attwiize khumuuza karumeyaawe nwulu yoori: “Owaathuule atthu apa owaalawane owaka, yashijiwe nyama yiipikhiwe, yo anttela oja na-miyo nthana opu.”
17 Ye khuretta etthiipile ooziweezo, khuwaathuula atthu apale khuwaalawana owawe Yuusufu. 18 Yo n'oofiya owawe Yuusufu khusala oova oopuwelaka yoori: “Talili natiiseliwavo mwaasa wa nzurukhu opule naarutiseliweeyo swaafu etile yamwanzo mvisurupa mwetthu. Ye ontakha onihukhumu, aniphuke anirette wiiya amwiitthwaana zawe, aninyakanye apuuru etthu.”
19 Khumweettela karumeya w'oowawe Yuusufu yoori anttakhulane vanlako. 20 Khulupaza yoori: “Safwatali mbwaneetthu! Swaafu etile naatiiyeeyo apha yamwanzo naateeliye wuuzanya etthu-yoojiwa. 21 Ila n'oofiya vahali naalaliyeevo, naafukuliye visurupa zetthu wakhula mmote wa fweyo khusikanamo omilomo waya nzurukhu opule naateeliyeeyo wuuzanyela etthu-yoojiwa ori woolikana. Apha, naateeliye orutisa, 22 na theenya natana nzurukhu nkinoko yoori nuuzanyele etthu-yoojiwa. Khaninjuweeni nlupa aatthiiyeemo nzurukhu aya opu mvisurupa mwetthu.”
23 Aphano karumeya otule khujipu araka: “Mwihoove na wala mwihisuthuwe. Nluku otu weenu mweeyo na otu wa papeenu ti ye atthiiyeemo nzurukhu mvisurupa mwenu, ila miiyo kaapokhereliye nzurukhu opule mwaataniyeeyo.” Karumeya khumfukulela Simiyooni khuntiisa attaaphale aariivo attwiize. 24 Nawiisha khuwaathuula khuwaavirisa nnyupa wa Yuusufu, khuwenkha maati khoosa moolu aya na khwinkha etthu-yoojiwa apuuru aya. 25 Attwiize Yuusufu khwaattalela tthuvo epile aataniyeezo khusala anwejela, maana aajuwiye yoori nthana aari oteela oja vamote na-ye.
26 Wakathi Yuusufu afiiyeevo owawe, yo khweettela tthuvo epile aatiisiyeezo khumwinkha khukokhoraza omaasho wawe khufiisa ajihi zaya vathi. 27 Ye khuwenkha hapari, nawiisha khuwoozela yoori: “Papeenu otule mwaakuuziyeeyo nalelo ori haayi?” Owaakho nkumi?
28 Yo khunjipu yoori: “Karumeyeenu papeetthu ori haayi, owaakho nkumi.” Yo khukokhora khwiinama.
29 Ye khulansa maasho awe khumoona ttwiiye Bejami mwaana wa mamaawe. Khuwoozela yoori: “Ttwiiyenu otu mwaari onlupaaye w'eefutti ti othuutu?” Ye khumuuza Bejami yoori: “Nluku awinkhe rehema mwanaka!” 30 Yuusufu khwiiyana furaha khuluyeene mwaasa wa ttwiiye, khusala atakha olila, nasaapiru khulaavo khweetta okatthi wawe khusala alila.
31 Nawiisha, khufuushula khurutela vansana ari woojiitthaaza khulupa yoori: “Mwininkhe etthu-yoojiwa.”
32 Khusaruliwa etthu-yoojiwa meeza mattatthu, mamote a Yuusufu, makina a attwiize na makina a Amisuri aari ottuukho. Mwaasa yoori yaari haraamu atthu a Misuri oja na Meebereewu. 33 Attwiize Yuusufu khwiikhala vameeza kharipu na-ye, khuthataanya waaza nttunkhulu mpakha efutti, khusala eekesana mmote na nzaawe ari ooshanka. 34 Yuusufu khuruma winkhiwa etthu-yoojiwa ethiitile enkhiweeyo vameeza vawe, sahani ya Bejami khuziti swaafu thaanu sahani za attwiize. Yo khuja, khunywa, khufurahi vamote na Yuusufu.