Esiyaakha na Rapekha nti wa Geraari
26
1 Yaapuwiye jala nti opule nkhama etthiipile yaapuwiyeezo wakathi wa Eburahiima. Ti eto Esiyaakha khulawa nti wa Geraari okutthanana Apimeleekhi mfwalume wa Afiliishiti. 2 Nnyizinku khunteela, khumuuza yoori: “Ohilawe tuniya ya Misuri; weekhale nti kintakhaaye owuuza. 3 Ottuukho miiyo kinttela wiiya vamote na-weyo na kinttela wuuparikhiya. Weeyo na peewu yawo kinttela owinkhani nti opo wooshi, kilipiselaka wahati opule kaalaphiyeeyo kimwaahitaka papaawo Eburahiima. 4 Kinttela waattisa peewu yawo nkhama matthottowa o'otulu, na kinttela winkha tuniya yooshi eti. Mwaasa wa peewu yawo, khapila zooshi za tuniya zinttela wiiya zooparikhiyiwa; 5 maana Eburahiima asiileza huula yaka, ashututela oruma waka, mwentto aka, kano zaka na masomi aka.”
6 Aphano Esiyaakha khusala eekhala nti wa Geraari. 7 Atthu a nti opule n'oomuuzela monkoni wa muukhaawe, ye khuri: “Nlupwaaka.” Mwaasa yoori Rapekha aari wooshapweya, Esiyaakha eetta woova olupa yoori muukhaawe. Ye aari wuupuwela yoori alume a mmuti mphule eetta omuula asale na Rapekha.
8 Esiyaakha eekhaliye Geraari siikhu za waatta. Siikhu moote, Apimeleekhi mfwalume wa Afiliishiti eetta othurumela veettakha khumoona Esiyaakha ampapasaka muukhaawe. 9 Aphano Apimeleekhi khunkhuwela Esiyaakha khumuuza yoori: “Otu, khweele muukhaawo! Khi apho waari oraaye nlupuwo?”
Ye khujipu yoori: “Kaari woova wuuliwa mwaasa wa ye.”
10 Apimeleekhi khuri: “Epo zaya niini oniretteliyeeyo? Khi eriwaka ntthu mmote wa fweyo eettiye olalana, weeyo waari onittha paathuli?”
11 Apimeleekhi khuwooza atthu ooshi yoori: “Wakhula otule antakhaaye onsapa mwinyi otu ama muukhaawe ontta ofwa.”
12 Esiyaakha khulima nshapa lawe nti otthuupule, mwaasa wa Nnyizinku omparikhiya mwaakha otthuupo khuurula vitthu swaafu miiya zooziti epile aazaliyeezo. 13 Ye khureela, khusala evira zeekezeleyaka mali zawe, khwiiya thaajiri nwuulweene. 14 Aarina maphanko a pwittipwitthi, puuzi, a mompe na aarina akarumeya a waatta, ti nanna Afiliishiti laawaatiyeeyo nrima. 15 Milipu zooshi epile aathipiyeeyo akarumeya a Eburahiima paapa wa Esiyaakha ari haayi, khusirelaza.
16 Siikhu moote Apimeleekhi khumuuza Esiyaakha yoori: “Oleemo mmuti mphu, maana wareela na kuvu waniziti fweeyo.”
17 Aphano ye khuthama nti opule, khulawa khumaka nttapo la Geraari khwiikhala ottuukho. 18 Khuthipa opheya milipu epile zaathipiweeyo wakathi wa Eburahiima, khusireliwa pi Afiliishiti paata yoofwa Eburahiima, Esiyaakha khwinkha mazina milipu epile atthaapale papaawe aatthajiyeeyo.
19 Siikhu kiina, akarumeyaawe khuthipa mmattapo nttumphule, khunsikana naattuuttu wa maati. 20 Amakhampuzi a Geraari khusala anyakulisana na amakhampuzi a Esiyaakha araka: “Maati apa pi eetthu,” ti eto Esiyaakha aatthajiyeeyo nzina la Eseki nlipu aya opule, mwaasa yoori weetta wuumaneliwa. 21 Akarumeyaawe khuthipa nlipu nkina, ila amakhampuzi apale a Geraari khupuwisa wuumani theenya, ye khutthaja nzina la Sitiina (milattu). 22 Aphano khulaavo aphale vaya khulawa khuthipa nlipu nkina, khuhiivo hatha ntthu mmote wa wuumanelana. Ye khutthaja nzina la Rehopoothi araka: “Aphano Nnyizinku aninkha puuro ya nafwaasi, na ninteela oruwera saaneene nti otthuupu.”
23 Attaaphale Esiyaakha khulawa Beerisheba. 24 Osikhu Nnyizinku khunteela khumuuza yoori: “Miiyo ki Nluku wa papaawo Eburahiima. Ohoove, kiri vamote na-weyo. Kintta wuuparikhiya kaattise peewu yawo mwaasa wa papaawo karumeyaaka.”
25 Attaaphale ye khunjeka alitaari, khwaaputu nzina la Nnyizinku. Khweemesa heema yawe na akarumeyaawe khuthipavo nlipu.
Osiilana wa Esiyaakha na Apimeleekhi
26 Apimeleekhi aalankhiye nti wa Geraari na shawuriiya awe Ahuzaathi na Fikhoole namalokozela wa anajanka olawa okutthanana Esiyaakha. 27 Esiyaakha n'oowoona khuwooza yoori: “Mweeyo khamwintuveliwa ti miyo mweettiye okiikara mmuti mwenu. Khi mwatela-ni?”
28 Yo khunjipu araka: “Neetta woona yoori Nnyizinku ori vamote na-weyo. Khuupuwela yoori enshapweya olapha na winkhana wahati weeyo na-fweyo. 29 Osiilana waya pi opu: Olaphe yoori khunnirettela zootakhala nkhama etthiipo na-fweyo nihuuretteleeni, noorettela zooshapweya na khuulikha olawa na heeri. Weeyo o wooparikhiyiwa ti Nnyizinku.”
30 Esiyaakha khuwenkha etthu-yooja yooshapweya khuja khunywela. 31 Mmeesho mwaya supuyeene khulaphisana. Esiyaakha khuwaaleeza, yo khusala alawa na heeri.
32 Siikhu ethiitile khuta akarumeya a Esiyaakha oteela omuuza hapari za nlipu opule aathipiyeeyo yoori: “Napattha maati.” 33 Nlipu aya opule Esiyaakha khutthaja nzina la Sheba. Mpakha leelo sitati yaya etile eniittheliwa Beeresheba.
34 Wakathi Ezawu apatthiyeevo nyaakha arupayiini khunrala Yudiithi mwaana wa nhiiti aniitthiwaaye Beeri, na Basemaathi mwaana wa nhiiti nkinoko aniitthiwaaye Elooni. 35 Aakha apo awiri, anshukulikhisiye Esiyaakha na Rapekha.