Wahati wa Nnyizinku khwa Eburamu
15
1 Paata ya vitthu epile, Nnyizinku anttakhulaniye Eburamu nkatthi wa ezimu amuuzaka yoori: “Eburamu ohoove! Miiyo ki namwaakisa awo, na tthuvo yawo enteela wiiya yooziti owula.”
2 Eburamu khujipu: “Mbwanaaka Nnyizinku ontakha okinkha-ni na miiyo akina hatha mwaana wa waarithi aka? Antakhaaye orithi vaje vaka ti Elizeeri wa Tamaashiku. 3 Khukinkheeni mwaana; apho, karumeya wa vaje vaka ti ye anttelaaye orithi vitthu zaka.”
4 Aphano Nnyizinku khunjipu: “Namarithi vitthu zawo khanttela wiiya oto, ila mwaana woovokoliwa ti weyo ti anttelaaye orithi.” 5 Khunsarulamo nheema mwawe khumuuza yoori: “Weekese otulu, waalake matthottowa nkhama anaalakeya. Peewu yawo enteela wiiya etthiipo.”
6 Ye khumwaamini Nnyizinku, na-ye khukhupaliwa ti Nnyizinku wiiya ntthu wa shariya.
7 Nnyizinku khumuuza Eburamu theenya: “Miiyo ki Nnyizinku kuulaziyeeyo Wuuri nti wa Babilooniya yoori kiwinkhe tuniya eti orithi.”
8 Eburamu khumuuzela yoori: “Oo Mbwanaaka Nnyizinku, kihakikhi toovi yoori kinteela orithi tuniya eti?”
9 Nnyizinku khujipu: “Okitiisele mwaana wa mompe, wa puuzi, na wa pwittipwitthi, zooshi za wiiyana nyaakha mittatthu, na theenya likhoko na jiwa moote”.
10 Ye khutiisa nyama epile zooshi, khusala ashija vakatthi wakhula nyama n'oothata wakhula erikitthili omaasho wa erikitthili kiina yaya. Ila likhoko na jiwa khuhishiji vakatthi. 11 Mirepoa khusala ziishukhela mphule zaariimo nyama epile zooshijiwa, ila Eburamu khusala eekara.
12 Njuwa leettelaka otupweela, Eburamu khunkhola osikizi wa waatta khusala oona yiiza ya waatta na woova. 13 Aphano Nnyizinku khumuuza yoori: “Ojuwache yoori peewu yawo enteela omaka nti woohiiyi waaya, enteela orettiwa omwiitthwaana na ohoochiwa nyaakha miiya nne. 14 Ila miiyo kinteela owaahukhumu atthu apo anttelaaye oretta omwiitthwaana, na enteela olaawo na maali za waatta. 15 Weeyo onttela wuuluvala ori wooparikhiyiwa na onteela ofwa na heeri. 16 Paata yoovira nyaakha epo miiya nne, peewu yawo enteela orutela tuniya eti, amana Amoori apa aniikhalaaye nttumphu atepa oretta vitthu zootakhala, miiyo kinteela owaahukhumu na kiweekare.”
17 Litupweeliyeevo njuwa, waariipiye vathi khupuwa loosi la njocho na mweeke wa moottho khuvira vakatthi wa virikitthili za nyama epile zaashijiweezo. 18 Siikhu ethiitile, Nnyizinku khuretta wahati na Eburamu, khumuuza yoori: “Tuniya eti kinteela winkha peewu yawo, waaza muuttho wa Misuri mpakha muuttho nwulu oniitthiwaaye Efwarathi, 19 otthaamo nti wa Akeni, wa Akenizi, wa Akatemoni, 20 wa Ahiiti, wa Aperizi, wa Arefayi, 21 wa Amoori, wa Akanaani, wa Akirikashi na wa Ayepuzi.”