Wahati wa Nnyizinku na Nuuhi
9
1 Nluku khumparikhiya Nuuhi na aanaawe awoozaka yoori: “Mwivokolelane mwaattelane mwiitaale voolumwenku. 2 Nyama zooshi za voolumwenku, epi za ntthuttu, anyannyi o'otulu, epi zinjipurulaaye vathi, na swi za mpahari, zinttela wiiya zoowoovani mweeyo channu. Zooshi epo mwinttela oshintta. 3 Zooshi zinoonaaye na zineettettaaye zinttela wiiya etthu-yooja yenu, nkhama etthiipo kiwinkhiyeenini mathapa, zooshi kawinkhani.
4 Ila mwihije nyama na taamu yaya, maana taamu ohaayi. 5 Wakhula nyama enimuulaaye ntthu, na pinaatamu animuulaaye nzaawe, anttela ojipu mmakhono Mwaka.
 
6 ‘Mwaasa yoori Nluku amumpa pinaatamu ajilattanisaka mwennyewe,
otule animuulaaye pinaatamu
na-ye ontta wuuliwa ti pinaatamu.’
 
7 Ila mweeyo mwivokolelane mwaattelane mwiitaale voolumwenku.”
8 Aphano Nluku khumuuza Nuuhi vamote na aanaawe araka: 9 “Nasaapi eti Kinretta wahati aka na-weyo na peewu yawo, 10 na zooshi ziriinaazo ohaayi opakhuwaniyeeyo mmwaaraka ziriiye vamote na-weyo: anyannyi, mifuwo, nyama za ntthuttu na zumpe zooshi za ntuniya. 11 Kinretta wahati aka na-mweyo; akinteela opwetecha theenya zumpe zooshi na maati a nnyeri, wala tuniya khinteela ozama theenya na maati a nnyeri.”
12 Nluku khulupa theenya: “Eti alama ya wahati aka miiyo na-weyo na zumpe zooshi ziriiye vamote na-weyo, khwa mileele: 13 katthaamo nkhankanyama mmawiku yoori wiiye alama ya wahati miiyo na tuniya. 14 Amana kifinikha pinku na mawiku, khupuwa nkhankanyama, 15 phi kinttelaaye wuupuwela wahati aka miiyo na-weyo na zumpe zooshi. Khanrutela theenya maati a nnyeri ozamisa zumpe zooshi z'oohaayi. 16 Nkhankanyama n'oopuwa mmawiku, nka kifikhiraka wahati opule kirettiyeeyo wa mileele miiyo na zumpe zooshi z'oohaayi ziriiye vatuniya.”
17 Nawiisha Nluku khumuuza Nuuhi yoori: “Eti alama ya wahati kirettiyeeyo miiyo na zumpe zooshi ziriiye vatuniya.”
Atthu ooshi ariiye ntuniya peewu yaya yo
18 Aana a Nuuhi aapakhuwaniyeeyo mmwaaraka mphule pi apa: Sheemu, Haamu na Yafeeti. Haamu aari paapa wa Kanaani. 19 Apa attatthu aari aana a Nuuhi, atthu ooshi amwazeyeliyeeyo vatuniya avokoliwa khwa yo.
20 Nuuhi aari namalima, ye ti tthakuzi woozala mirayi za wuuva. 21 Siikhu moote, khunywa viinyu ya nshumo opule khunhapala khuvuleya kuwo zawe zooshi nheema mwawe. 22 Haamu, paapa wa Kanaani, khuvira nheema khoona owaazu wa papaawe. Khulawa khuwooza attwiize apale awiri aari vaje. 23 Aphano khulankha Sheemu na Yafeeti khuthuulaza juupa khuvikela mmafuzi mwaya khusala eettetta na enyokonyoko yoori ahoone owaazu wa papaaya n'oofiya khumfinikha.
24 Wakathi Nuuhi emwaamuwiyeevo viinyu etile, khujuwa mattakhuzi aaviriseliweeyo ti mwanawe otu w'eefutti. 25 Aphano ye khuri:
 
“Woolaanikha ti Kanaani,
onttela wiiya mwiitthwaana wa
amwiitthwaana a attwiize.”
 
26 Theenya khuri:
 
“Asifwiwe Mbwana Nnyizinku wa Sheemu,
anrette Kanaani wiiya mwiitthwaana wa Sheemu.
27 Nnyizinku anwulise Yafeeti;
khapila yawe yiiye vamote na ya Sheemu,
Kanaani eeye mwiitthwaana aya.”
 
28 Paata yawiisha nnyeri, Nuuhi eekhaliye nyaakha miiya ttatthu na hamusiini. 29 Nuuhi afwa arina nyaakha miiya tiisiya na hamusiini.