Waaza wa twampi na ohoowa
3
1 Nyookha yaari nlavilavi zayita nyama zooshi za ntthuttu Mbwana Nnyizinku ompiyeeyo. Khumuuzela muukha eraka: “Atthi Nluku alupa yoori mwihije mishumo za miitthi zooshi ziriiye nwoorotha mphu?”
2 Muukha otule khujipu yoori: “Ninaaye ruhusa yooja mishumo za miitthi ziriiye nwoorotha mphu, 3 ila Nluku anuuza yoori: ‘Nshumo wa muutthi oriiye vakatthi wa woorotha mwihije wala mwihisape. Mwijaru mwintta ofwa.’”
4 Aphano nyookha khumuuza muukha otule yoori: “Hatha khamwimfwa! 5 Maana Nluku ajuwa yoori siikhu mwinttelaavo oja nshumo opo antta ofunuwa maasho enu, mweeyo mwinttela wiiya nkhama Ye, ojuwa yooshapweya na yootakhala.”
6 Muukha khoona yoori muutthi opule waari wooshapweya, mishumo zaya zaari zooshapweyela oja na zaarina fwayita yoojuwisa. Attaapho, khushuma khuja, khumwinkha mannawe na-ye khuja. 7 Paata ya toowo, oowiiri khufunuwa maasho aya khujuwa yoori ari waazu. Khurukela mathapa a muutthi oniitthiwaaye mfikeeraa khuretta wiiya kuwo zaya.
8 N'oosiila shintto ya Mbwana Nnyizinku eettettaka nwoorotha mphule, wakathi wa pheevo ya matulayi njuwa-looveva, pinaatamu na muukhaawe khujivitha na miitthi nwoorotha nttumphule yoori Mbwana Nnyizinku ahiwoone. 9 Mbwana Nnyizinku khunkhuwela pinaatamu khumuuzela yoori: “Ori vayi?”
10 Ye khujipu araka: “Keetta osiila shintto yawo nwoorotha mphu, miiyo khoova na khujivitha mwaasa wa wiiya waazu.”
11 Mbwana Nnyizinku khumuuzela theenya yoori: “Wooziwa paani yoori ori waazu? Nshumo wa muutthi opule kookhattaziyeeyo yoori ohije weetta oja?”
12 Pinaatamu khujipu yoori: “Muukha otu okinkhiyeeyo yoori asala akikhiza, ti ye akinkhiyeeyo nshumo aya opo miiyo khuja.”
13 Mbwana Nnyizinku khumuuzela muukha araka: “Niini eto orettiyeeyo?” Muukha khujipu yoori: “Nyookha ti ye ekittettekhiyeeyo miiyo khuja.”
14 Aphano Mbwana Nnyizinku khuuza nyookha yoori:
 
“Wiiya waretta vitthu epi,
woolaanikha ti weyo vakatthi wa mifuwo za vaje na nyama zooshi za ntthuttu,
nka weettettanaka erukulu na ojaka ottophe siikhu zooshi z'oohaayi awo.
15 Kinttela otthaavo wuumani weeyo na muukha;
peewu yawo na peewu ya muukha.
Peewu ya muukha nka yuuvulalisaka eeshwa yawo,
na weeyo nka ottovolaka ekwakuno yaya.”
 
16 Mbwana Nnyizinku khumuuza muukha yoori:
 
“Kintta ozitisa thwaapu yawo
amana wiimittha ompatthaka mwaana.
Weeyo onlawa watakhe onlokozela mannawo,
ila mannawo onlawa ooshintte.”
 
17 Ye khumuuza Pinaatamu yoori:
 
“Wiiya wansiileza muukhaawo
khuja nshumo wa muutthi opu kookhattaziyeeyo,
yalaanikha tuniya yooshi mwaasa wa weeyo,
nka okholaka khaazi yoolipa
yoori opatthe etthu-yooja
ohaayi awo wooshi.
18 Tuniya eniwinkha wakhula nanna ya miiwa,
weeyo nka ojaka mishumo za ntthuttu.
19 Okholaka khaazi yoovujuwela
yoori opatthe etthu-yooja yawo
mansha awo ooshi.
Maana weeyo wompaniwa ottophe,
n'oofwa mpakha orutele voottophe.”
 
20 Pinaatamu khuntthaja muukhaawe nzina la Haawab, mwaasa wa wiiya maama wa anaatamu ooshi. 21 Mbwana Nnyizinku khwaattala kuwo za shapala khunwalisa pinaatamu na muukhaawe.
22 Mbwana Nnyizinku khuri: “Mpakha apha pinaatamu wampattha wiiya nkhama fweeyo, ajuwa etthu yooshapweya na yootakhala. Ye ahilikheleliwe oshuma nshumo wa muutthi w'oohaayi aja yoori eeyane ohaayi wa mileele.” 23 Paata ya toowo, Mbwana Nnyizinku khumwiikaramo nwoorotha wa Eeteni, yoori asala alima ottophe otthuupule ompaniweeyo. 24 N'oomwiikaramo pinaatamu nwoorotha phantte lintthamuwaawo njuwa ya Eeteni, khutthaamo kerupiinac na phanka ya moottho yaari ozukulelaaye. Ye aarettiye toowo yoori esala yeekesela tarikhi yaari weettaaye okhule oriiwo muutthi w'oohaayi.