2 Abulubuka wekelyayik nang, sik yupa ara, pia weik empat ratus ribu (400.000) yin talin nang bulubuka yayik. Tonda, sik Israel nang ayala-yala nirya, sik mutuku noutam ninye deiyok kibuka, yupu nyalamikce, amutuku taleamik ninye deiyok nang nirya babye, Mizpa mutuku uk bulubik. 3 Wininmekopura, ninye arye sik Benyamin yala nang ati, “Ura, Israel yala nanguk bukni, yuk-yuk yala nang nirya ara, bulubuka Mizpa mutuku noutam akunum wekelyanamake,” nyabuka, laka nyabikba, kekebik bukni, sik ton Mizpa mutuku kum biyik. Ati, Israel yala nang nirya arye, “Se, apia kum elilamupu ning, pia malye ubuk ning ara, laka nyapsilyame,” nyabikura, aLewi yalanye birye nyabuk. “Yo ura, narye kil ubula dopromsirye, Gibea mutuku binumuba, alukunyan noutam arye, amutuku yu nang arye akil ati, pia malye winibikce, omike,” nyabuk.

Nyabukura, awekmek deiyok nang arye, kil domuk Lewi yalanye biti, asipdeyik. “Wini talak ara, ance nun dam, ayu nang arye winibik ning ara, yata wiribik do? Aning nirya laka nyapsilyeme!” nyabik. 4 Nyabikura, Lewi yalanye birye tamubuka nyabuk, “Na ap, na kil ubula dopromse kil ap, Gibea mutuku noutam bukni, sik Benyamin yala nang arye talibuka unyak mutuku, tia ati nun bitinye yanuka unmanumurye, amutuku yanuka mapmanumu.

5 Winipmanumu bukni, sik Gibea mutuku malye ulamik nang arye, alukunyan noutam arye, nati elyanik. Winpnikopura, na mapmase aik dam yanuka, warikuka antanap dongopnik. Sikce tenibuka yanmek ning ara, na ona ap, na kil yobuka malye ulina ap ati, ayu nang ayanmek. Bukni, sikce na kil ubula dopromse kil uk, el nong deice pia malye-malye weik unmekce, yonmeka ani, na domse kil obikba dibuk.

6 Winibikopura, naryuk, na kil el nong dobukapsirye, sekuka kalimna yuk-yuk 12 kipse. Aning akunum winipsopura, 12 mutuku ap, nun mutuku Israel nang unyap mutuku noutam aulye touk, amutuku-amutuku nirya bukni, kalimna, tonok-tonok dopkwetepse. Narye aning winipsa deiyok ara, ani. Ara, sik Gibea mutuku noutam ulamik nang arye, yu ning, pia malye weik ning winibikce, nun Israel yala nang nirya ati, alye dakan ning ati winipdeipsike. 7 Winibuka pia malye weik winipdeipsika ati ara, anggun Israel nang yala-yala nirya, sik deiyok nang asukum umunya ara, Israel yala nang uka. Ati, narye anggunti, ‘Teninamlume. Yata winipmap do? Anggunce, ‘Aning ara telebe, amalye un ning wenena ati, deken ning ara, ani,’ tenepmalum ara, laka nyapnamnulum ati, moropsine!” nyabuk.

8 Nyabukopura, sik Israel yala nang, sik nirya asukum neika kintinipmakce bulubuka wekmek nang nirya arye, tonok ansinibukabikce, tonok kibuka, ayupu nyabik. “Kume! Awinibik ning ara, pia malye weik ati ara, nun nirya ara, nunce ati, Allah el si erena ati, asukum dopmap tenda arye doltakna aik babye, nun unyap mutuku noutam dobupu asik koproba babye, ara pia tamubuka kum binamabe. 9 Nunce adiparyuk, sik Gibea mutuku unyak nang ati winipmap ning ara ani. Ara, nunce ‘Winipnuyab’ tenen, bikilin ning, el si undi^a deice arye dobibyeura, sik Gibea mutuku nang olbana ati ara, wibuka mal olalbinamak yala nang, sik si ara, minopce laka kipnamle. Winiplyeura, eibibirye, asi yuk-yuk minopce laka kiplye si ara, sik ayala nang arye deiyok kibikirye, mal olalbinamake.

10 Nun Israel nang ayala-yala nirya ara, seper takubarye^b arye ninye ton bokdeipnamabe. Ara, winipmanto, yin talin nang, sik yupa ara seratus (100) nang unyak noutam arye, 10 nang wipdeipnamabe. Winibuka wipdeipnamap nang ara, sikce din ning yala-yala nirya bulubikirye, kintinibuka delilbinamake. Ara, ‘Gibea mutuku mal olalbinamak’ tenen yin talin nang, sik dinamak ning kintinina atia. Sik yin talin nang, Gibea mutuku unyak bukni, Benyamin yala nang ati olbikirye, ikin ning sik nong deice wenen ning delilbinmak ning ara, sik anang arye Israel yala nang nirya ati, pia malye ning, alye dakalisulul ning, nun deice deiamika ati, winipnamabe,” nyabik.

11 Nyabikura, sik Israel nang yala-yala nirya arye, kanye tonok kibukabikce, Benyamin yala nang bukni, Gibea mutuku ulamik nang ati mal pibiyik. 12 Aning nirya winibik talak ara, sik Israel nang, ayala-yala nirya arye, yin talin nang ton akunum wibukabikce, dopdeibikba, sik Benyamin yala nang ulamik mutuku noutam nirya, “Bimunce ayupu laka nyalbinululume,” nyabik. Ara, “Sik Benyamin yala nang ara, anggun tam nang yata ati, pia kum winipmanto ning, malye ning winipmangu do? Awinipmak ning ara, bita kum bikmalum do, kum do?

13 Ati ara, sik Gibea mutuku unyak nang, pia kum winipmanto ning, malye winibik nang ara, tomopmunce, nunti arepsumunyeba, nun Israel yala nang arye, obibirye sirya daknuyabe. Tonda, aning winibipyopura, nun Israel nang unyap mutuku noutam arye, apia malye un ninguk, talibuka unyak nang nirya ara, kum daneipnamabe,” nyabik. Nyabik bukni, sik Benyamin yala nang nirya ara, sik kayapu nang, Israel nang bukni, yala-yala yuk nang ara, sikce nyanmek yupu ara, diba kum tenebik. 14 Sik Benyamin yala nang arye, diba kum tenebika ati, Gibea mutuku noutam ulamik nang, Benyamin yala nanguk, Gibea mutuku weik asik dolamika dam bulubuka yayikce, ‘Israel yala nang, sik yuk-yuk yala nirya unyak nang ara, nunce opnamap’ tenen, sik dam yayik. 15 Asum ara, sik Benyamin yala nang kan-kan arye, sik yin talin nang ara, yupa pia weik, dua puluh enam ribu (26.000) nang bulubuka yayik. Ara, Gibea asik dam bukni, dana-dana uamuk mitik-mitik mutuku nirya ara, bulubuka wekelyanganmek. Tonda, aning wininmek talak ara, Gibea asik domikce, asukum ulamik nang sik babye bulubuka yayik.

16 Ura, sik Gibea mutuku noutam arye wipdeibuk yin talin nang ara, tujuh ratus (700) yin talin nang ton wipdeibuk. Anang nirya ara, ninye on nang weik tonun akunum kel bikamik. Sik nirya ara, sik mikip taruk ara, kwanim tam ning arye pil dolamik. Ati, sikce ongopmek ning ara, sikda ninye ona ati, keil dona weik kel nang ulamika anya arye, aning el si umban kwanim taruk tam ongopmek. Gibea mutuku nang aning kwanim taruk tam ongopnopura, tonok ning dopmana babye, ton pia kum tiklamik. Pia mitik ning, winipmanto, ninye kisok potong tonok ton auptopura, aning babye, sik umban ning arye keil doptingopura, dipkoprob akeil arye, apotong bol pipnamtue.

17 Tonda, sik Israel nang bukni, yuk-yuk yala nang, ton tam nang nirya ara, bulubuka wekelyayik nang yupa ara, pia weik empat ratus ribu (400.000) yin talin nang wekelyayik. Ayin talin nang nirya ara, peterenmekba mal olan ning nirya ara, pia moubuka weik kel bikamik nanguk bulubuka yayik. Sik nirya ara, Gibea mutuku dam bulubik.

18 Sik Israel yala yin talin nang nirya ara, bulubukabikce, sik Allah si erena ati weklamikak, Betel mutuku noutamakuk bulubuka biyik. Biyikopura, sik ni koproba, Allah ati asipdeyik, “Diba nun ni Allah Yahweh, nun nirya asukum bulubuka yaburye aunyab noutam arye, minop tam yata yala nang, yata mutuku nang arye, Benyamin yala nang ati wibuka mal olalbinuyap do?” Nyabikura, Allah Yahweh arye, tamubuka nyabuk. “Kume, Yehuda yala yin talin nanguk, sik wibuka mal olalbinuyake,” nyabuk. 19 Nyabukura, mapmeka berekukopura, beren tam ara, sik Israel yala nang nirya deiyok kibuka biyikopura, Gibea mutuku mining damuk binuka, ‘Amutuku nang warikuka mal opdanuyap’ tenen, sik tia tenda aik dobuka unmek.

20 Winibikopura, sik Israel yala nang yin nang kintinibuka, olalbana ati wibuka tikilbiyik. Winibikopura, Gibea mutuku nang dam koprop dipdanuka, ‘Olanamab’ tenen, sik Israel yala nang arye, lipsisikuka, lelebikce, tikuka kintinibikce, Gibea mutuku nang dam olalbiyik. 21 Winipmek bukni, asum ara, sik Benyamin yala nang ara, Gibea mutuku arye deiyok kibukabikce, olalbiyik talak ara, sik Israel yala nang yin talin nang ara, dua puluh dua ribu (22.000) nang atalak aryuk obuka sirya dakik.

22-23 Sik Benyamin yala nang arye Israel yala nang bukni, yuk yala nang weik tonun, obuka sirya dakik ati ara, sik Israel yala nang nirya arye tamubuka, sik Allah si erelamik aik dam binuka, Allah Yahweh ati engenmeka ani, lukunyan kibuk. Winibuka engenmek talak ara, sikti, asipdeyik. “Se, nun ni koproba, Allah Yahweh, nunda ton ap nun kayapu nang, sik Benyamin yala nang dam ara, ila tamubuka ton ap bibirye, mal olalbinamap do?” Nyabikura, Allah Yahweh arye tamubuka nyabuk. “Diba mal olalbinamalume,” nyabuk. Ati, atalak ara sik Israel nang nirya kanye ton ap deibik. Kanye deibikopura, sik tikina ati, lipsisikuka min yuma kintinibuka tikmek touk, tuba tonap kintinibuka tikik.

24 Sik nirya mapmeka, berekukopura, like bitinye sum arye, sik Israel yala nang arye, sik kayapu Benyamin yala nang ati, ‘Mal olalbinuyap’ tenen, pibiyik. 25 Olalbiyikopura, aning atouk bitinye sum ton, sik Benyamin yala nang arye Israel nang ati mal olalbiyik. Mal olalbiyik talak ara, Benyamin yala yin talin nang arye, Israel yin nang obuka sirya dakika ara, yupa pia weik delapan belas ribu (18.000) nang, sik Israel yala nang ati obik. Ara, talye nang ati kum obik. Sik Israel yin nang obika ara, dipkoprob pia weik kel bikamik yin talin nanguk obik. Tonda, sik anang nirya ara, yin ap, parang ya ap bobuka olanmekbuk, obuka sirya dakik.

26 Benyamin yala nang arye, Israel yala nang weik tonun obikopura, sik tuba kam unmek Israel yala nang nirya ara, tamubuka Betel mutuku biyik. Biyikopura, sik ni koproba Allah Yahweh, el dam binuka, bukikce engebik. Amutuku noutam unmek talak ara, sik Israel nang nirya, din dina kumce, ‘Allah el siuk erepnmap’ tenen, si tebuka unmek bukni, lukunyan akunum kibuk. Tonda, ‘Ninye ap, Allah ap, teleb kibuka neika utibye’ tenen, ‘Mining dam epdatibye’ tenena ap ati, kambing ato ning obikce, yanuka Allah Yahweh ati arebik. Tonda, ‘Nun malye unyap ning, namin kipsuturye, teleb kipdeipsutu’ tenen, domba ato ning opnarye, Allah arena ati, aning dobuka el damuk u dongolyangalamik.

27 Atalak ara, Allah arye, “Aning ara wininamlume, aning ara pia kum wininamlume,” nyapdeibukba, keil deice arye sekuka, marikna yo^c pum tam deiamik ning ara, minop talak Betel mutuku uk deiamika ati ara, tuba asukumuk uamuk. Aning ara, awamuka ati ara, Harun birye deiamuknye Eliazar, elce deiamuknye Pineas, elda imam pil donanye kibuka ulamuk.

28 Ati, sik Israel yala nang nirya arye, Allah Yahweh ati, “Se na nie, nun yata winipmap do?” nyabuka, asipdeyikce morobik. Tonda, sikce asipdeyik yupu ara, “Allah Yahweh, nunda ton ap adiparyuk nun kayapu nang, sik Benyamin yala nang ati mal olalbinamap do, kum do? Akumopura, nunce, ‘Mal olalbana ara daupmalye! ‘Tonap kum olanamabe,’ nyapnuyap do, kum do? Na nie, ance nyapsiminyeba kekenuyabe,” nyabuka, asipdeyikce morobik. Nyabuka asipdeyikba, Allah Yahweh arye tamubuka nyabuk. “Kume, anggunda adiparyuk sik Benyamin yala anang ati, ambusum olalbinamalume! Winipmunyeba, ambusum ara, narye anggunti na mikip arepsinyeura, obuka sirya dakna deiyok ning arisinyeba, dipkoprob anggunce Benyamin yala nang ati, obuka sirya daknamalume,” nyabuk.

29 Allah Yahweh arye nyabuk ning akunum kekebikopura, sik Israel yala nang sik yin talin nang nirya ara, ninye arye kum eipmantoak Gibea mutuku damuk duknulbiyik. 30 Nyabukopura, like winilye sum ara, sik Israel yala nang yin talin nang arye Benyamin yala tam nang, sik yin talin nang kintinibuka tikikce, Gibea mutuku noutam min yuma sum winipmek touk winibik. 31 Sik Benyamin yala nang babye, atalak aryuk mal piyayik. Tonda, sik Israel nang babye, Benyamin yala nang ati, Gibea mutuku arye yukubikba biyik. Ara, min sum arye winyamik touk, sik Benyamin yala nang arye, Israel yala nang ona ati, lak deice arye deiyok koubuka, Betel mutuku ap, Gibea mutuku, binamna ati balamik bisik noutam arye opmika atonun winibuka obik. Ara, weik asik dolamika dam kum bukni, pata mutuku noutam arye olanmeka ani, sik Benyamin yala nang arye, Israel yala nang ara, tiga puluh (30) nang obuka sirya dakik.

32 Obuka sirya talak ara, sik Benyamin yala nang arye utenebik. ‘Kume, sik Israel yala yin talin nang ara, min sum arye winipmaburye obuka sirya dakmapu touk, arup babye akunum obuka sirya dakmabe,’ tenebik. Utenebik bukni, Israel yala nang yin talin nang arye, ‘Kume, sik Benyamin yala nang opnamabe. Sik weik asik donyaka dam arye batakuka, nun aunmab tam mangkau arye yatingopura, nunce sikti, obuka sirya daktibye,’ tenebikce lopdobikba, sik Benyamin yala yin talin nang arye, dobolyayik. Dobolyayikce, weik bisik dam dobolbanmek. Ara, weik kota asik dam arye kisikdakuka yuk pera sukum unmek.

33 Kisikdakuka binmek ati ara, Israel yala yin talin nang, weik tonun ara, sik kisikdopmekce, otam mutuku Bahal-Tamar tam binuka wekik. Wekmek talak ara, sik Israel yin nang, yupa mitik tonun, Gibea mutuku dam dukunubuka unmek nang ara, kutukuka lake yayik. Sikda, Gibea mutuku dam bukni, keting kumulban tam unmek.

34 Ayayik nang nirya ara, Israel mutuku arye, ninye olana kel weik nang wipdeiamik nanguk olalyayik. Ara, anukik nang yupa ara, pia weik (10.000) nang olalbinmek. Sik opdayik talak ara, Gibea mutuku noutam weik olan mek ara, (10.000) nang arye, sik Gibea mutuku nang ap opdayik. Bukni, sik Benyamin yala nang arye, ‘Nunda nun mal olan nang arye obuka sirya daknusiyake,’ kum tenebik. Talya mangkau kanye bobuka unmek.

35 Sik Benyamin yala nang nirya ara utenepmekce, talye kanye bobuka wekmeka ani, Allah Yahweh arye, obuka sirya dakna deiyok ning ara, sik Israel yala nang deice deibukba, Benyamin yala nang pia weik tonun obuka sirya dakik. Aning winibik talak ara, Israel nang arye, Benyamin yala yin talin nang obuka, sirya dakik ning yupa ara, pia weik dua puluh lima ribu, seratus (25.100) nang obukabikce, sirya dakik.

36 Sik olanmek talak ara, sik Benyamin yala nang nirya ara bikna kum talak arye tenebik, ‘Se, sik Israel yala nang, sik yin talin nang nirya arye, nun akunum obuka sirya daknusiyake,’ tenebik. Tonda, Benyamin yala nang arye, Israel tam nang unmeka dam olalyayikba, sik Israel yin talin nang ara tenebuka arye, kisikdakuka tamubuka otam bikbik abuka binmek. Winipmeka deiyok ara, mitik otam Gibea mutuku weik asik dolamik dam duknupmek nang, sik tam nanguk ounmeka ati ara, ‘Nun kayapu nang arye, yanuka melipsikirye, Benyamin yala yin nang ati olyanamake,’ tenebik.

37 Benyamin yala nang arye, Gibea asik dolamikak batakuka, ‘Israel nang opnuyap’ tenen, otam arye mitik karenak binmekba, sik Israel yin nang, anyasik dolamika dam duknupmek nang nirya ara, adiparyuk Gibea mutuku noutam yanuka wekik. Sik Gibea, weik asik dolamik noutam wekikce, sik parang ya bopmeka arye, anyasik dobuka ulamik nang nirya oltaknauk unmekce, sirya dakik. 38 Ura, sik Israel tam yin nang arye, min yuma talak akunum yupu talibikce nyabik. “Nun weik tonun yin nang arye, Gibea mutuku nang ap olanmabya ani, anggun yin nang mitik dukunubuka unamlum bukni, lo ton awaplyopura, anyasik donyakak wekmunce, sik asik nirya uku dongopnamlume. Uku dongomunyeba, amutuku nirya ara, uku tulum weleplirya, dilye talak ara, nunce tamubuka anyasik donyaka dam bikbik abuka olyananmabe,” nyabik.

39 Bukni, atalak aryuk sik Benyamin tam yin talin nang arye sik Israel yala yin talin nang ati, olanmeka ani, tiga puluh (30) nang obik. Tonda, sik Benyamin yala nang arye, ‘E, min sum arye, nunce sik Israel yala nang obuka sirya dakmapu touk, arup babye atouk akunum winipmabe,’ tenebik. 40 Utenebuka, kanye deipmek bukni, Israel nang duknupmek nang arye, Gibea mutuku asik nirya uku dongobikba, bikna kum talak, Gibea mutuku noutam ara, tulum weik welebukba, sik Benyamin yala yin nang arye eibik. Tulum weik welenmokba, sik Benyamin yala nang arye, sik balye tam tamubuka dinmekba, amutuku noutam ara, uku buk weik welebuka dinmokce, sik weik asik dolamika nirya dipmoka ak, eibikce ilil weik ubukce, imun kanye weik bobik.

41 Mambul kanye bobikce, atalak aryuk, sik Israel yala nang, sik yin talena kel weik nang, yupa weik tonun nirya ara, asum ara balye tam tamubuka bikbik abuka banmekce, adiparyuk tamubuka sik Benyamin yala nang tam tamubuka olalyayik. Winibikba Benyamin yala yin talin nang nirya, ilil pia weik ubukce, yok sirim talibuk, ‘Se anango, winira sik Israel yala nang arye, nun Benyamin yala nang ara, akunum opsikirye sirya dakmasiyake,’ tenebikce, ilil pia weik ubuk. 42 Ati, sik Benyamin yala yin talin nang nirya ara adiparyuk, sik weik asik dolamikak batakuka, ‘Lyepdanuyap’ tenen, bikbik abuka pata mutuku lu tam biyik. Biyik bukni, sik anang nirya ara, tonok nang babye kum biyik. Aninye nirya ara, Israel yala nang yin talina bikne nang, yupa weik tonun ara, Benyamin yala yin nang weik tonun onmeka ani, tonda atalak aryuk, Gibea mutuku otam weik asik dolamika dam duknupmek bukni, atalak olyannmek Israel yin nang ton, amutuku bisik arye yanganmek yupa nirya arye, warikuka antapdongobik.

Antapdongobikce, Benyamin yala nang nirya ara, adiparyuk obuka sirya dakikopura, sik Benyamin tam nang ara, imun kanye bon ning ap, ikin ning ap, weik doprobik. 43 Sik Israel yala nang nirya ara, adiparyuk antapdongobuka, pia dobolbameka ani, tonok mutuku si ara, Noha mutuku arye diprongobuka, otam keting panalyangan tam, Gibea mutuku noutam biyikopura, antapdongobikce Benyamin yala nang weik tonun obik. Winibuka anang arye, pia dobolbanauk unmeka ani, binuka obuka sirya dakik.

44 Sik Benyamin yala yin talin nang yupa pia weik, delapan belas ribu (18.000) nang, weik kel bikamik yin nang ara, sikda ilil pia kum nang, weik ulamikce, mikip weik yin nang bukni, sik nirya obuka sirya dakik. Ara, Israel yala nang, sik yin talin nang arye, Benyamin yala yin nang weik tonun obuka sirya dakik.

45 Winibikopura, Benyamin yala nang sik yin talin nang yuk nang nirya ara, ‘Bikbik abuka bibirye, lyepdanuyap’ tenen, tamubuka bikbik abuka, kata mutuku tam arye kipdomika ani, keil kon mutuku dinibuka, Rimon nyalamik mutuku tam arye kibuka biyik. Tonda, sik kayapu nang bukni, lima ribu (5.000) nang ton bokuka, weik bisik noutam arye obik. Tuba kam unmek nang nirya ara, pia dobolbanauk unmeka ani, otam uamuk mutuku, Gibeon mutuku dam binuka, Israel nang arye, sik Benyamin yala nang adobolbanmek nanguk, ton ap dua ribu (2.000) yin nang obuka sirya dakik.

46 Ati ara, asum arye, sik olanmek talak ara, Benyamin yala nang, sik weik kel bikamik yin talin nang ara, Israel nang arye obik nang yupa ara, pia weik, dua puluh lima ribu (25.000) yin talin nang nirya ara, mikip weik nang ap, ilil tenena kum nang ulamik bukni, sik nirya ara, obuka sirya daknauk ubik. 47 Bukni, sik Benyamin yala nanguk bukni, sik yupa noutam arye, ton nang bokukabikce, kata mutuku tam arye bikbik abuka binmeka ani, keil kon mutuku ara Rimon mutuku tam kibuka yayik yin nang yupa ara, yupa mitik weik, enam ratus (600) dukunubuka biyik. Sikce Rimon mutuku biyikopura, amutuku noutam aryuk daulamik. Ara, wala yupa dumbarye deice arye, amutuku binuka dukunubuka ulamik.

48 Aning nirya akunum winibuka sirya dakikura, sik Israel yala nang yin talin nang nirya arye, tamubuka tuba kam unmek Benyamin yala nang ati olyayik. Ara, Israel nang arye Benyamin yala nang ati, mitik tonun tuba batakmek nang ara, ninye ap, kilapu ap, sik mapu nirya ap, tonda sikce talibuka weilamik kam ning ayala-yala nirya ap, aning nirya ara, obuka sirya dakik. Winibikopura, amutuku noutam bukni, dana-dana tam uamuk mitik asik dolamik mutuku nirya ara, sik Israel yala nang nirya arye Gibea mutuku noutam uamuk ning nirya ara, uku arye dongobuka obukabikce, sirya dakik.