Na mio, amutuku unyak kilapu, Kanaan tam kilapu kum dopnamlyame. 2 Aning kum bukni, adiparyuk Padan-Aram mutuku noutam bukni, an apu koproba, el si ara Betuel, el aik bimince, an mam koproba Laban, elce deibuk kilmapu noutamak, tonok wibuka dopnamlyame.

3 Winipnamlama ati, ‘Allah arye melinamkil’ tenen, se tenenye ning ara, ani. Aning-aning deice tam ulirye, malye winyamlumnye biti, Allah arye melipkiliba, mapu pia weik delinamlame. Tonda, ance deipminyeba, dadeipdanin banamak nang, ‘Weik upra bakirye, dana-dana tam unamak’ tenen, ‘Se,’ tenenune. 4 Tonda, Allah arye Abraham biti, “Winipnamkine,” nyalilamuk yupu nirya ara, ‘Allah arye, an nong ati, tonda ance deipnalam ninye nirya ap ati, aning atonun wininamsile’ tenen, ‘Se,’ tenepne. Tonda, nun nirya ara, amutuku noutamak unyap talak ara, ninye asik nanguk unyap bukni, ‘Aminyan talak ara, ance atam nirya talinamlam’ tenen, ‘Se,’ tenepne. Ura, Allah arye, Abraham biti, atuku nirya areamuk ati, nyapne. Isak birye, Yakub biti nyabuk.

5 Isak nyapdeibukura, Yakub dopkwetebukba, Yakub bira, ‘Na mam koproba Laban, el dam binuka unamne’ tenen, Mesopotamia^a mutuku biyuk. Laban bira, Betuel Aram tamnye, el mi ulamuk. 6-7 Yuk nang arye, Yakub el du koproba Esau biti nyabik, “Kume, an ni koproba arye, an weit Yakub biti, teleb yupu nyapdeibukce, ‘Mesopotamia mutuku kil eibuka dopnamle’ tenen, dopreibuk. Tonda, “Kanaan mutuku kilapu dona meme,” nyapdeibukba, Yakub kekebukce, el li ap, el lin ap, nyaprik touk winibuk.” Laka nyabikba, Esau kekebuk.

8 Nyabikopura, Esau ayupu kekebuk deice arye, ‘Dib’ tenen bikuk. ‘Na ni koproba Isak bira, Kanaan mutuku kilapu ara, pia lik tenelule’ tenen, bikuk. 9 Kel kipmoka anya arye, el li koproba yalanye, Ismael dam biyukce, Ismael birye deiamuk kilmu tonok doprobuk. Esau birye, yuk kilapu ton minop talak akunum domuk bukni, akil ton tabakuka dobuk. Adobuk kil, el si ara, Mahalat ulamuk. Akil ara, Abraham birye deiamuk mi Ismael birye deiamuk kilmu ulamuk. Akil el weit kil si ara, Nebaiot ulamuk.

10 Yakub bira, Bersyeba mutuku batakuka, ‘Haran mutuku binaman’ tenen, bisik banmok. 11 Bisik banmoka ani, keting kumupnuyuk talak ara, telebak eibukce inibuka ati, ‘Asukumuk mapnun,’ tenebuk. Inipmok talak ara, Yakub keil ebukce, pala keil teleb ning eibukce, ‘Na kisok barina ati, adeice mapnune,’ tenebukce, dobuka deibukce, mapmok.

12 Asukumuk mapmok talak ara, lengdar deice arye, weik yo morona atonun ning eibuk. Aning ara, yo moromna urasin atonun ubuk. Ton tukwak mutuku anyapce, im deice tam dukdongobuka winipmokba, eibuk. Ayo morona eibukce, Allah el im deice pil don nang malaikat ara, welebina koulukuka, yana kinmekak eibuk.

13 Tonda, ayo moromna lilun tam ara, Allah el si Yahweh arye, ei tikukce, nyabuk.

Nara, an apu koproba Abraham ap, an ni koproba Isak ap arye, na si erenurudaknye, Allah, na si Yahweh aunune. Anda amapmalam sukum arye, otam nirya arepnamkine. Tonda, ance deipminba, dadeipdanin banamak nang babye, atuku talipnamake. 14 Ance dadeipminba, dodelinamak ninye ara, yupa pia weik upnin banamake. Tukwak mutuku noutamak nirya ara, keil wininga arye, pia weik ulamliba, kum nukmanto ulye touk unamake. Dana-dana tam nirya, keting yangan tam arye, dipdongobuka oketeng owekelbalye tam, asukum anirya ap ara, iknapye tam arye dipdongobuka, dabu tam utam amutuku-amutuku nirya unamake.

Aminyan talak ara, tukwak mutuku im sirya, mutuku sirya nirya unamak ninye ayala-ayala nirya ati ara, an yala nang deice arye teleb kipdeipnamne. Ara, ance deipminba, dadeipdanin balamica ani, sirya talak an yala nang arye deipnamak mi ulya deice arye, ninye mutuku-mutuku nirya teleb kipdeipnamne.

15 Aninguk kum bukni, tonda an unalam talak nirya ara, na ap neika unaname. An binalam mutuku nirya ara, na ap neika binaname. ‘Malye winipdeipkicak’ tenen, narye anti, pia melilamkinya ani, sirya talak ara, amutuku noutamakuk teleb kibuka tuba tamubuka boyanamkine. Narye anti, ‘Winipnamkine, aning arenamkine,’ nyabuka nyalinmakin ning nirya, min kum dopropmaminye talak ara, na ap pia neika unaname. Kum bataknamkine. Allah arye, Yakub biti nyabuk.

16 Allah arye, Yakub el lengdar mapmoka deice arye nyabukba, Yakub bukukce nyabuk. “Se, na ni koproba Allah, el si Yahweh, amutuku noutamak unulul bukni, na talye mangkau kanye bobuka unmanue ati, kum tenipmanue,” nyabuk. 17 Nyabukce ilil ubukba, ayupu ton nyabuk. “Se, amutuku ara, weik mambul mutuku atia. Ara, talye mutuku kum bukni, Allah el ulyak atonun, tonda im deice welebana bisik bublan dam atonun ulule,” nyabuk.

18 Ura, mapmoka berekuk talak ara, beren tam koprop arye bukukabukce, el kisok erena ati, deipmok pala keil doprakuka deibuk. Ara, ‘Kume, amutuku eipmanu ning ara, pia teninauk unamne’ tenen, akeil tikeibuk. Tikeibukce, ‘Amutuku ara, weik mambule’ tenen, yo duk si minyak zaitun mek dobuka, akeil deice dikeibuk. 19 Winibukce, amapmok mutuku si ati, “Betel mutuku,” nyabuka si dopdeibuk. (Ibrani yupu deice ara, Betel deiyok ara, ‘Allah el aik,’ tenebuka nyalamik.) Yakub mapmok mutuku mitik anun otam, ninye aik si ara, Lus mutuku nyalamik bukni, elce amutuku ati winiryuk si dopdeibuk.

20-21 Tonda, Yakub arye, Allah ati ayupu ton nyalinmok. “Na bisik banaman talak noutamak nirya ara, Allah el si Yahweh arye, pia melibuka kaliknilirye, na patapnamnil ning, din ning do, baju do, pia arelamnilya ani, aminyan talak teleb kibuka, na ni dam tamubuka boyanilyopura, narye el si Yahwehuk, pia si erenamne. Elda na ni koproba, Allah pia unamnile.

22 Apala keil tikeipmanak ara, yuk ninye arye ton, anyakauk, el si erenamake. Tonda, Allah arenamnil ning nirya, noutamak arye bokuka, el kina ati, sepuluh persen (10%)^b arenamne,” Yakub arye Allah ati, nyalin yupu nyapdeibuk.