Yɛlɛ waga kele kala
20
1 Kona,
a mì si mɛrɛgɛ wa yan wì yiri wa yɛnŋɛlɛ na na tinri.
Wetijugo lakile naa jɔrɔgɔ gbeŋɛ la pye wi kɛɛ.
2 A wì si yarifɛlɛgɛ ki yigi,
wɔɔgɔ lɛgɛ ye,
ko ki yɛn Mɛgɛ jɔgɔfɔ we,
naa Sɔtanla we.
A wì suu pɔ mboo yaga wa fɔ sa gbɔn yɛlɛ waga kele (1 000),
3 mɛɛ wi wa wa wetijugo ki ni,
maga yɔn ki sɔgɔ lakile wi ni,
ma tɛgɛrɛ tɛgɛ ki na,
jaŋgo yarifɛlɛgɛ kiga ka ya yiri wa ki ni mbaa cɛngɛlɛ woolo pe fanla mbaa pe punŋgu fɔ yɛlɛ wagakele (1 000) li sa kɔ.
Ko puŋgo na,
ki daga pege sanga pege yaga ki wagati jɛnri pye.
4 A mì si wunluwɔ jɔnrɔ yan.
Mbele pàa pye ma cɛn ti na,
a pè fanŋga kan pe yeri paa kiti kɔɔn.
Mbele yinrɛ pàa kɔlɔgi,
katugu pàa Zhezu wi sɛrɛya wo naa Yɛnŋɛlɛ sɛnrɛ ti yari,
naa mbele pe sila woŋgbɔ wo naa wi yanlɛɛ wi gbɔgɔ,
pee si yɛnlɛ pe woŋgbɔ wi gbɔnrɔ ti taga pe walɛrɛ naa pe kɛyɛn yi na,
a mì si pe yinŋgele ke yan.
A pè si yɛn ma yiri wa kunwɔ pi ni ma wunluwɔ pi pye Kirisi wi ni ja ma saa gbɔn yɛlɛ wagakele (1 000).
5 Kuulo sanmbala poro sila yɛn fɔ yɛlɛ wagakele (1 000) lì saa kɔ.
Ko ki yɛn kuulo pe yɛnmɛ koŋgbanmba we.
6 Mbele pè pe tasaga ta wa kuulo pe yɛnmɛ koŋgbanmba pi ni,
fɛrɛwɛ yɛn pe woo,
a pe yɛn Yɛnŋɛlɛ li leele kpoyi.
Kunwɔ shyɛn woo pi se fanŋga ta pe na naa,
ɛɛn fɔ,
pe yaa ka pye Yɛnŋɛlɛ lo naa Kirisi wi ni pe saraga wɔfɛnnɛ.
Pe yaa ka wunluwɔ pi pye wi ni ja mbe sa gbɔn fɔ yɛlɛ wagakele (1 000).
Zhezu wì ya Sɔtanla wi ni
7 Na yɛlɛ wagakele (1 000) liga ka kɔ,
pa pe yaa Sɔtanla wi wɔ wa wi kaso wi ni mboo wa.
8 Kona,
wi yaa kari mbe saa cɛngɛlɛ woolo mbele pe yɛn dunruya wi go tijɛrɛ ki na pe fanla,
ko ki yɛn Gɔgi naa Magɔgi we.
Wi yaa ka pe gbogolo malaga ki kala na,
pe yaa ka lɛgɛ paa kɔgɔje yɔn taambugɔ ki yɛn.
9 A pè si tara ti ni fuun ti tɔgɔ wa na paan,
mɛɛ pan ma Yɛnŋɛlɛ li leele kpoyi pe cɛnsaga konaa ca ŋga kì Yɛnŋɛlɛ li ndanla jɛŋgɛ ki maga.
Ɛɛn fɔ,
a kasɔn si yiri wa yɛnŋɛlɛ na ma to pe na ma pe sogo pew.
10 Kona,
a pè si Sɔtanla ŋa wìla pye na pe fanla wi wa wa wegbɔgɔ kasɔn ki ni,
ko ŋga kiribi wi yɛn na sori wa we,
wa laga ŋga pàa woŋgbɔ wo naa Yɛnŋɛlɛ yɔn sɛnrɛ yofɔ yagboyoo pe wa we.
Pe yaa kaa jɔlɔ wa sɔnlɔ naa yembinɛ fɔ sanga pyew.
Kiti puŋgo woo wi kɔngɔ sɛnrɛ
11 Kona,
a mì si wunluwɔ jɔngɔ gbeŋge fige ka yan,
naa ŋa wi yɛn ma cɛn ki na wi ni.
A tara to naa naayeri wi ni,
tì si fe ma yiri wa wi yɛgɛ sɔgɔwɔ,
pe siri yan naa fyew.
12 Kona,
a mì si kuulo pe yan,
piile naa lelɛɛlɛ,
yeresaga le wunluwɔ jɔngɔ ki yɛgɛ na.
A sɛwɛɛlɛ pèle si yɛngɛ.
A sɛwɛ wa si nuru naa ma yɛngɛ,
ŋa wi yɛn yinwege sɛwɛ we.
A pè si kiti kɔn kuulo pe na ma yala pe kapyegele ke ni,
ŋgele kàa pye ma yɔnlɔgɔ wa sɛwɛɛlɛ pe ni we.
13 A kɔgɔje wì si kuulo mbele pàa pye wa wi ni pe yirige ma pe kan.
Kunwɔ po naa kuulo tara ti ni,
a tì kuulo mbele pàa pye wa ti ni pe yirige ma pe kan fun.
A pè kiti kɔn kuulo pe ni fuun nuŋgba nuŋgba pe na ma yala pe kapyegele ke ni.
14 A pè kunwɔ po naa kuulo tara ti wa wa wegbɔgɔ kasɔn ki ni.
Ki wegbɔgɔ kasɔn ko ki yɛn kunwɔ shyɛn woo we.
15 Lere ŋa fuun wi mɛgɛ ki woro ma yɔnlɔgɔ wa yinwege sɛwɛ wi ni,
pàa wo wa wa wegbɔgɔ kasɔn ki ni.