Tɛgɛrɛ kɔlɔshyɛn woro ti kɔnwɔ
8
1 Naa Simbapyɔ wìla kaa tɛgɛrɛ kɔlɔshyɛn woro ti kɔn,
a naayeri wì si pyeri dinw na kee lɛri walaga yeri.
MBAANRA KƆLƆSHYƐN
8.2–11.19
2 Mɛrɛgɛye kɔlɔshyɛn mbele pe ma yere Yɛnŋɛlɛ li yɛgɛ na,
a mì si pe yan.
A pè si mbaanra kɔlɔshyɛn kan pe yeri.
3 A mɛrɛgɛ wà yɛgɛ si pan ma yere le saraga wɔsaga ki tanla.
Wusuna sogoyaraga la pye wi yeri,
pàa ki gbegele tɛ ni.
A pè si wusuna nuwɔ taan lɛgɛwɛ kan wi yeri wuu wɔ saraga,
mbe pinlɛ Yɛnŋɛlɛ li leele kpoyi pe yɛnrɛwɛ pi ni,
wa tɛ saraga wɔsaga ki na,
ko ŋga ki yɛn wa wunluwɔ jɔngɔ ki yɛgɛ we.
4 Wusuna nuwɔ taan ŋa wìla pye na sori,
a wi wirige kì si yiri wa mɛrɛgɛ wi kɛɛ ma pinlɛ Yɛnŋɛlɛ li leele kpoyi pe yɛnrɛwɛ pi ni na nuru wa Yɛnŋɛlɛ li yɛgɛ na.
5 Kona,
a mɛrɛgɛ wì si wusuna sogoyaraga ki lɛ maga yin saraga wɔsaga kasɔn ka ni,
maga wa laga tara ti na.
A yɛnŋɛlɛ gbaanra naa tinmɛ yiri,
naa yɛnŋɛlɛ yɛngɛlɛmɛ ni,
a tara tì yɛgɛ.
Mbaanra kala
6 Mɛrɛgɛye kɔlɔshyɛn mbele mbaanra kɔlɔshyɛn tìla pye pe kɛɛ,
a pè si pe yɛɛ gbɛgɛlɛ mberi win.
7 A mɛrɛgɛ koŋgbanŋa wì suu mbanlaga ki win.
Sinndɛɛrɛ tisaga naa kasɔn ŋga kì pinlɛ kasanwa ni,
a tì si wo laga tara ti na.
A tara ti kɔnsaga taanri wogo kì sogo,
a tire ti kɔnsaga taanri wogo kì sogo,
a yantipirige ki ni fuun kì sogo.
8 A mɛrɛgɛ shyɛn woo wì suu mbanlaga ki win.
A pè si yanwiga gbɔgɔ ka cɛnlɛ wa wa kɔgɔje wi ni,
ŋga ki yɛn na yiin kasɔn ni.
A kɔgɔje wi kɔnsaga taanri wogo kì si kanŋga kasanwa.
9 Yaara nda tì da ma pye yɛnwegele na wa kɔgɔje wi ni,
a ti kɔnsaga taanri wogo kì ku,
a tɔnmɔkɔɔrɔ ti kɔnsaga taanri wogo kì jɔgɔ.
10 A mɛrɛgɛ taanri woo wì suu mbanlaga ki win.
A wɔnnɔ gbɔlɔ là si yiri wa naayeri ma to,
na yiin paa yangambɔlɔ kasɔn yɛn.
Làa to gbaanla pe kɔnsaga taanri wogo ki na,
naa puluyo yi na.
11 Ki wɔnnɔ pe maa li yinri Yaritisorogo.
A tɔnmɔ pi kɔnsaga taanri woo pì kanŋga ma sori.
A lelɛgɛrɛ ku,
naa pàa ki tɔnmɔ pi wɔ we,
katugu pìla kanŋga ma sori.
12 A mɛrɛgɛ tijɛrɛ woo wì suu mbanlaga ki win.
A pè si yɔnlɔ ki kɔnsaga taanri wogo ki gbɔn,
naa yeŋge ki kɔnsaga taanri wogo ki ni,
naa wɔnŋgɔlɔ ke kɔnsaga taanri wogo ki ni,
jaŋgo ti yanwa pi kɔnsaga taanri woo pi kanŋga wɔwɔ.
Pilige nuŋgba ki kɔnsaga taanri wogo,
naa yembinɛ li kɔnsaga taanri wogo ki yanwa pii yiri.
13 A mì si wele,
mɛɛ yɔn tinmɛ ta wila toro sire na wa naayeri fɔ wa lege.
Wìla pye naga yuun ŋgbanga fɔ:
«Jɔlɔgɔ,
jɔlɔgɔ,
jɔlɔgɔ yɛn dunruya woolo pe wogo,
mɛrɛgɛye taanri sanmbala paga pe mbaanra ti win,
ŋga ki yaa pye ki kala na!»