TƐGƐRƐ KƆLƆSHYƐN
6.1–8.1
Tɛgɛrɛ kɔgɔlɔni ti kɔnwɔ kala
6
1 Kona,
a mì si Simbapyɔ wi yan wì tɛgɛrɛ kɔlɔshyɛn ti koŋgbannda ti kɔn.
A mì si yaara yɛnwere ti nuŋgba magala logo paa Yɛnŋɛlɛ gbanlaga yɛn,
a kì yo fɔ:
«Ta paan!»
2 A mì si wele,
mɛɛ shɔn fuwe yan.
Ŋa wìla lugu wi na,
sandiga la pye wi kɛɛ,
a pè wunluwɔ njala kan wi yeri.
A wi nɛɛ kee cew ni mbe sa ya malaga ki ni.
3 Kona,
a Simbapyɔ wì si tɛgɛrɛ shyɛn woro ti kɔn.
A mì si yaara yɛnwere shyɛn wogo ki magala li logo,
a kì yo fɔ:
«Ta paan!»
4 Kona,
a shɔn wà yɛgɛ si yiri,
wìla pye yɛɛn paa kasɔn yɛn.
Ŋa wìla lugu wi na,
pàa yawa kan wi yeri wi malaga ki jaraga laga tara ti ni,
jaŋgo leele paa pe yɛɛ kuun.
Pàa tokobi gbeŋɛ kan wi yeri.
5 Kona,
a Simbapyɔ wì si tɛgɛrɛ taanri woro ti kɔn,
a mì si yaara yɛnwere taanri wogo ki magala li logo,
a kì yo fɔ:
«Ta paan!»
A mì si wele,
mɛɛ shɔn wɔɔ yan.
Ŋa wìla lugu wi na,
a mì si culo yan wi kɛɛ.
6 A mì si magala la logo ndɛɛ lì yiri wa yaara yɛnwere tijɛrɛ ti sɔgɔwɔ,
ma yo fɔ:
«Shɔlɔ culo nuŋgba wi yaa lɔ pilige nuŋgba tunŋgo pyesara ni,
gbonjo culo taanri wi yaa lɔ pilige nuŋgba tunŋgo pyesara ni.
Ɛɛn fɔ,
maga ka sinmɛ naa duvɛn wo jɔgɔ.»
7 Kona,
a Simbapyɔ wì si tɛgɛrɛ tijɛrɛ woro ti kɔn,
a mì si yaara yɛnwere tijɛrɛ wogo ki magala li logo,
a kì yo fɔ:
«Ta paan!»
8 A mì si wele,
mɛɛ shɔn wa yan paa wɛtipiire yinriwɛ yɛn.
Ŋa wìla lugu wi na,
pàa pye naa yinri kunwɔ,
a kuulo tarafɔ wì taga wi na.
Pàa yawa kan pe yeri tara ti kɔnsaga tijɛrɛ wogo ki na,
jaŋgo pe leele pe gbo tokobi,
naa fuŋgo gbɔgɔ,
naa yambewe konaa tara na woŋgaala tipeele pe ni.
9 Kona,
a Simbapyɔ wì si tɛgɛrɛ kaŋgurugo woro ti kɔn.
Leele mbele pàa gbo Yɛnŋɛlɛ li sɛnrɛ yarawa po naa sɛrɛya ŋa pàa yo wi kala na,
a mì si pe yinŋgele ke yan wa saraga wɔsaga ki nɔgɔ.
10 Pàa pye na gbele ŋgbanga na yuun fɔ:
«We Fɔ,
mboro ŋa kpoyi ma pye kaselege fɔ,
wagati jori maa singi mbe si jɛn mbe kiti kɔn tara woolo mbele pè we gbo pe na,
mbe we gbogo ki yɔngɔ wɔ pe ni?»
11 A pè si deere titɔɔnrɔ fire kankan pe ni fuun nuŋgba nuŋgba pe yeri,
mɛɛ pe pye ma yo pe wogo naa wagati jɛnri ni fɔ pe sefɛnnɛ naa pe tunŋgo pyeyɛɛnlɛ mbele leele pe mbaa pe gbo,
pe yɔn ki sa tin,
paa yɛgɛ ŋga na pàa poro jate pe gbo we.
12 Kona,
a mì si Simbapyɔ wi yan wila tɛgɛrɛ kɔgɔlɔni woro ti kɔɔn.
A tara tì si yɛgɛ ŋgbanga.
A yɔnlɔ kì si kanŋga ma wɔ paa pariwɔgɔ yɛn.
A yeŋge ki ni fuun kì kanŋga ma yanlaga paa kasanwa yɛn.
13 A wɔnŋgɔlɔ kè yiri wa naayeri ma toori laga tara,
paa yɛgɛ ŋga na tifɛliŋgbɔgɔ ma figiye tige yangara maga pire tugbɔɔnrɔ ti kɔɔnlɔ mari wo we.
14 A naayeri wì yiri wa wi yɔngɔlɔ ke ni paa yɛgɛ ŋga na pe ma sɛlɛgɛ sɛwɛ migi we.
A pè yanwira naa lɔgɔ furo ti ni fuun ti kɔlɔgi mari wɔ wa ti yɔngɔlɔ ke ni.
15 Tara na wunlumbolo,
naa legbɔɔlɔ,
naa sorodasheele teele,
naa penjagbɔrɔ fɛnnɛ,
naa fanŋga fɛnnɛ,
naa leele sanmbala pe ni fuun,
kulolo naa leseele,
pè si saa lara wa yaanŋguro were to naa yanwira nɔgɔ waliwere ti sɔgɔwɔ.
16 Pàa pye na yanwira to naa waara ti piin fɔ:
«Ye toori we na ye we lara»
ŋa wi yɛn ma cɛn wa wunluwɔ jɔngɔ ki na wi yɛgɛ konaa Simbapyɔ wi naŋgbanwa pi na.
17 Katugu pe naŋgbanwa piligbɔgɔ kì gbɔn,
ambɔ wi mbe ya yere mbege sige?