Sɛwɛ naa Simbapyɔ sɛnrɛ
5
1 Kona,
ŋa wìla pye ma cɛn wa wunluwɔ jɔngɔ ki na,
a mì si sɛwɛ yan wa wi kalige kɛɛ ki ni migisaga.
Wi nawa po naa wi puŋgo ki ni tìla pye ma yɔnlɔgɔ.
A pè si tɛgɛrɛ kɔlɔshyɛn tɛgɛ wi na maa tɔn.
2 A mì si mɛrɛgɛ fanŋgafɔ wa yan,
wìla pye naga yari magala gbɔlɔ ni na yuun fɔ:
«Ambɔ ki daga wi ni wigi tɛgɛrɛ nda ti kɔɔnlɔ mbe sɛwɛ wi yɛngɛ?»
3 Ɛɛn fɔ,
lere kpɛ sila ta wa yɛnŋɛlɛ na,
nakoma laga tara na,
nakoma wa ti nɔgɔ,
ŋa wi mbaa ya mbe sɛwɛ wi yɛngɛ mbe wele wa wi nawa.
4 A mi nɛɛ gbele fɔ jɛŋgɛ,
katugu lere kpɛ sila ta,
ŋa wi daga mbege sɛwɛ wi yɛngɛ mbe wele wa wi nawa.
5 Kona,
lelɛɛlɛ pe ni,
a nuŋgba silan pye fɔ:
«Ma kaa gbele.
Wele,
jara ŋa wì yiri wa Zhuda cɛnlɛ li ni,
wo ŋa wi yɛn wunlunaŋa Davidi wi setirige pyɔ,
wì cew ta mbe ya mbege tɛgɛrɛ ti kɔɔnlɔ mbe sɛwɛ wi yɛngɛ.»
6 A mì si Simbapyɔ wa yan yeresaga wa wunluwɔ jɔngɔ ki nandogomɔ,
naa wa yaara yɛnwere tijɛrɛ to naa lelɛɛlɛ pe nandogomɔ,
wìla cɛn ndɛɛ poo gbo.
Yɛnŋgɛlɛ kɔlɔshyɛn naa yɛngɛlɛ kɔlɔshyɛn kàa pye wi na.
Koro ke yɛn Yɛnŋɛlɛ li yinŋgele kɔlɔshyɛn ŋgele lì tun ke kari tara ti lagapyew we.
7 A Simbapyɔ wì si pan ma sɛwɛ wi shɔ maa wɔ wa ŋa wìla pye ma cɛn wa wunluwɔ jɔngɔ ki na wi kalige kɛɛ ki ni.
8 Naa wìla kaa sɛwɛ wi shɔ,
a yaara yɛnwere tijɛrɛ to naa lelɛɛlɛ nafa ma yiri tijɛrɛ pe ni,
pè si kanŋguuro kan le tara Simbapyɔ wi yɛgɛ sɔgɔwɔ.
Juru la pye pe ni fuun nuŋgba nuŋgba pe yeri,
naa tɛ wɔjɛŋgɛlɛ ni,
kàa pye ma yin wusuna nuwɔ taan ni,
to ti yɛn Yɛnŋɛlɛ li leele kpoyi pe Yɛnŋɛlɛ yɛnrɛwɛ we.
9 Pàa pye na yurufɔnŋgɔ shoo na yuun fɔ:
«Mboro ki daga ma ni ma sɛwɛ wi lɛ maa tɛgɛrɛ ti kɔɔnlɔ;
katugu pàa ma gbo,
ma kunwɔ pi fanŋga na,
a mà leele pele go shɔ Yɛnŋɛlɛ li kan
ma yiri cɛngɛlɛ ke ni fuun ke ni,
naa sɛnrɛ pyew ti leele pe ni fuun pe ni,
naa dunruya woolo pe ni fuun pe ni konaa tara nuŋgba nuŋgba pyew ti ni.
10 Mà pe tɛgɛ pe pye wunluwɔ naa saraga wɔfɛnnɛ paa tunŋgo piin we Yɛnŋɛlɛ li kan.
Pe yaa kaa pe wunluwɔ pi piin laga tara ti na.»
11 A mì si wele naa,
mɛɛ mɛrɛgɛye lɛgɛrɛ yogo logo.
Pàa pye mɛrɛgɛye waga kele ŋgele tɛgɛsaga lɛgɛrɛ,
naa mɛrɛgɛye waga kɛ kɛ tɛgɛsaga waga kɛ kɛ.
Pàa pye ma wunluwɔ jɔngɔ naa yaara yɛnwere naa lelɛɛlɛ pe maga.
12 Pàa pye naga yuun magala gbɔlɔ ni fɔ:
«Simbapyɔ ŋa pàa gbo ki daga wi ni
wi yawa,
naa yarijɛndɛ lɛgɛrɛ,
naa tijinliwɛ,
naa fanŋga,
naa gbemɛ,
naa gbɔgɔwɔ konaa sɔnmɔ pi ta!»
13 Yaara nda fuun tì da,
ti yɛn wa yɛnŋɛlɛ na,
naa laga tara ti na,
naa wa tara ti nɔgɔ,
naa wa kɔgɔje wi ni,
a mì siri magala li logo fun,
tìla pye na yurugo shoo na yuun fɔ:
«Sɔnmɔ,
naa gbemɛ,
naa gbɔgɔwɔ,
naa yawa mbe pye ŋa wi yɛn ma cɛn wa wunluwɔ jɔngɔ ki na
wo naa Simbapyɔ wi ni pe woo fɔ sanga pyew!»
14 A yaara yɛnwere tijɛrɛ ti nɛɛ yuun fɔ:
«Anmiina
A lelɛɛlɛ pè si kanŋguuro kan le tara maa gbɔgɔ.