WUNLUWƆ JƆNGƆ, NAA SƐLƐGƐ SƐWƐ ŊA PE MA MIGI KONAA SIMBAPYƆ
4–5
Yɛnŋɛlɛ li gbɔgɔkala wa naayeri
4
1 Ko puŋgo na,
a mì si wele,
mɛɛ yeyɔngɔ ka yan yɛnlɛgɛ wa yɛnŋɛlɛ na.
Magala na mìla keli ma logo,
a lì para na ni paa mbanlaga magala yɛn,
a lì silan pye fɔ:
«Lugu laga,
kagala ŋgele ke daga mbe pye ŋgele koro puŋgo na,
mi yaa ke naga ma na.»
2 Le ki yɔnlɔgɔ ke ni,
a Yinnɛkpoyi lì si ye na ni.
A mì si wele,
mɛɛ wunluwɔ jɔngɔ ka yan wa yɛnŋɛlɛ na.
Wa là pye ma cɛn ki wunluwɔ jɔngɔ ki na.
3 Ŋa wìla pye ma cɛn wa,
wi yɛgɛ cɛnwɛ pìla pye na yiin paa sinndɛɛrɛ sɔnŋgbanga woro nda pe yinri zhasipi naa sariduwani ti yɛn.
Yaanŋgondi la pye ma wunluwɔ jɔngɔ ki maga na yiin paa sinndɛlɛgɛ ŋga pe yinri emerodi ki yɛn.
4 Wunluwɔ jɔnrɔ nafa ma yiri tijɛrɛ la pye ma ki wunluwɔ jɔngɔ ki maga.
Lelɛɛlɛ nafa ma yiri tijɛrɛ la pye ma cɛn ki wunluwɔ jɔnrɔ ti na,
ma yaripɔrɔ fire lele,
ma tɛ wunluwɔ njagala kankan.
5 Yɛnŋɛlɛ yɛngɛlɛmɛ,
naa magaŋgala,
naa yɛnŋɛlɛ gbaanra la pye na yinrigi wa ki wunluwɔ jɔngɔ ki na.
Fitanlaye kɔlɔshyɛn la pye na yiin ŋgbanga wa wunluwɔ jɔngɔ ki yɛgɛ,
poro pe yɛn Yɛnŋɛlɛ li yinŋgele kɔlɔshyɛn wele.
6 Wa wunluwɔ jɔngɔ ki yɛgɛ,
yaraga kà la pye wa paa kɔgɔje tɔnmɔ yɛn,
mba pi yɛn ma vɛri lɛ,
ma laga yegeyege paa yaraga ŋga pe yinri kirisitali ki yɛn.
Wa wunluwɔ jɔngɔ ki nandogomɔ maga maga ki kɛɛ ki ni fuun ki na,
yaara yɛnwere tijɛrɛ la pye wa,
yɛngɛlɛ lɛgɛrɛ la pye ti na wa ti yɛgɛ konaa wa ti puŋgo na.
7 Yaraga yɛnwege koŋgbanŋga kìla pye ma yiri jara kɔrɔgɔ,
a ki shyɛn wogo kì yiri napige kɔrɔgɔ,
ki taanri wogo ki yɛgɛ kìla pye paa lere yɛgɛ yɛn;
ki tijɛrɛ wogo kìla pye ma yiri yɔn kɔrɔgɔ,
ŋa wì yiri sire na.
8 Kanwira kɔgɔlɔni kɔgɔlɔni la pye ki yaara yɛnwere tijɛrɛ ti nuŋgba nuŋgba pyew ti na,
yɛngɛlɛ lɛgɛrɛ la pye ti na wa nawa konaa laga funwa na.
Tìla pye na yuuro shoo suyi sɔnlɔ naa yembinɛ,
na yuun fɔ:
Kpoyi,
kpoyi,
kpoyi,
wo wi yɛn we Yɛnŋɛlɛ na li yɛn Yawa pi ni fuun Fɔ,
lo na làa pye wa, lo na li yɛn wa konaa lo na li yɛn na paan we.
9 Ŋa wi yɛn ma cɛn wa wunluwɔ jɔngɔ ki na,
wo ŋa wi yɛn yinwege na fɔ sanga pyew,
sanga o sanga yaara yɛnwere tijɛrɛ ti kaa wi gbogo,
mbaa wi sɔnni,
mbaa wi shari,
10 ki wagati wi ni,
lelɛɛlɛ nafa ma yiri tijɛrɛ pe ma kanŋguuro kan ŋa wi yɛn ma cɛn wa wunluwɔ jɔngɔ ki na wi yɛgɛ sɔgɔwɔ,
ma wo ŋa wi yɛn yinwege na fɔ sanga pyew wi gbɔgɔ.
Pe ma pe wunluwɔ njagala ke kɔlɔgi ma ke tɛgɛ le wunluwɔ jɔngɔ ki tanla,
nɛɛ yuun fɔ:
11 «We Fɔ naa we Yɛnŋɛlɛ,
gbɔgɔwɔ naa sɔnmɔ naa yawa pi daga ma ni;
katugu mboro mà yaara ti ni fuun ti da.
Ma nandanwa kala lo fanŋga na tì da konaa ma pye wa.»