Sɛwɛ taanri woo ŋa
ZHAN
wìla yɔnlɔgɔ ma torogo
Sɛwɛ wìla torogo ŋa yeri konaa wi sharaga
1
1 Mi ŋa legilizi lelɛɛ,
muwi mila ki sɛwɛ ŋa wi torogi na wɔnlɔ naŋa Gayusi ma kan,
mboro ŋa màla ndanla kaselege na we.
2 Na wɔnlɔŋgbɔɔ,
mila Yɛnŋɛlɛ li yɛnri nɔɔ kaan,
jaŋgo kala li ni fuun laa yɔngɔ laa kee yɛgɛ ma kan,
ma koro ŋgbaan wa wire ti ni paa yɛgɛ ŋga na ma yɛn ŋgbaan yinnɛ li ni we.
3 Mila yɔgɔri jɛŋgɛ,
katugu sefɛnnɛ nambala pèle pan laga na yeri maga yo na kan ma yo ma yɛn ma sin wa kaselege ki ni,
fɔ maa tanri na yala kaselege ki ni.
4 Na mi kaga logo mbe yo na piile paa tanri kaselege ki na,
yaraga ka na nayinmɛ kan na yeri mbe wɛ ko na.
Gayusi wi tunŋgo jɛŋgɛ pyege kala
5 Na wɔnlɔŋgbɔɔ,
kala na fuun maa piin sefɛnnɛ pe kan,
ali mbele pe yɛn nambanmbala pe kan,
ma yɛn tagawa ni wa ki kagala ke ni.
6 Pàa pan mɔɔ ndanlawa pi sɛnrɛ yo laga legilizi wi yɛgɛ na.
Mi yɛn nɔɔ yɛnri fɔ ma pe saga pe tangala li na,
paa yɛgɛ ŋga na ki yɛn ma Yɛnŋɛlɛ li ndanla we.
7 Katugu pè yiri ma kari Kirisi wi tunŋgo ko mɛgɛ ni.
Pee yɛnlɛ mbaa sagawa shoo mbele pee shɛri pe yeri.
8 Ki kala na,
ki daga woro tagafɛnnɛ waa ki leele cɛnlɛ pe sari,
we pye pe pinlɛyɛɛnlɛ mbaa kaselege ki yari.
Diyotirɛfu naa Demetiriyusi kala
9 Mì sɛwɛ wa pye jɛɛlɛ ma torogo legilizi wi kan ki wogo ki na.
Ɛɛn fɔ,
Diyotirɛfu ŋa wila jaa mbe pye tagafɛnnɛ pe yɛkelewe,
wìla jege na sɛnrɛ ti na.
10 Ki kala na,
na mi ka kari wa ye yeri,
tipere nda fuun wila piin,
na sɛnpere naa yagbogolo ŋgele fuun yuun na tari we na,
mi yaa ye jatere wi tirige ti na.
Ko suu bɔ bere,
ɛɛn fɔ,
wo jate wila yɛnlɛ mbe sefɛnnɛ mbele pe maa paan wa pe yigi.
Mbele kaa jaa mbe pe yigi,
wi ma pe yɛgɛ kɔn,
mbe pe purɔ mbe pe wɔ wa legilizi.
11 Na wɔnlɔŋgbɔɔ,
maga kaa ŋga ki yɛn tipege ki fɔrɔgi.
Ɛɛn fɔ,
ŋga ki yɛn ma yɔn ta ko fɔrɔgi.
Lere ŋa wi maa ŋga ki yɛn ma yɔn ki piin,
wo yɛn Yɛnŋɛlɛ woo.
Ŋa wi maa tipege piin,
wo si Yɛnŋɛlɛ jɛn.
12 Demetiriyusi wo na,
leele pe ni fuun paa wi mɛtanga ki yinri.
Kaselege jate ki maa wi mɛtanga ki yinri.
Woro fun we maa wi mɛtanga ki yinri,
a màga jɛn ma yo ŋga we maa yuun ki yɛn kaselege.
Sharaga puŋgo wogo
13 Yarilɛgɛrɛ yɛn na yeri mbe yo ma kan.
Ɛɛn fɔ,
mi woro na jaa mberi yɔnlɔgɔ lankiri tɔnmɔ naa sɛwɛ yɔnlɔgɔkanŋgala ni.
14 Mila ki sɔnri mbe sɔɔn yan sanni jɛnri,
kona,
we yaa yo we yɛɛ ni yɔn ni.
15 Yɛyinŋge ki pye ma ni!
Ma wɛnnɛ pɔ̀ɔn shari.
Ma we wɛnnɛ pe ni fuun nuŋgba nuŋgba pe shari wa we kan.