Yɛnŋɛlɛ li Yinnɛkpoyi lo naa Kirisi wi winfɔ wi yinnɛ le
4
1 Na wɛnnɛ,
mbele fuun pe yɛn na pe yɛɛ piin ma yo Yinnɛkpoyi li yɛn pe ni,
yaga ka taga pe ni fuun na.
Ɛɛn fɔ,
ye pe wa ye wele yege jɛn,
na kaa pye yinnɛ na li yɛn pe ni lì yiri Yɛnŋɛlɛ yeri.
Mì ko yo ma,
katugu Yɛnŋɛlɛ yɔn sɛnrɛ yofɛnnɛ yagboyoolo pe lɛgɛrɛ pan laga dunruya wi ni.
2 Ŋga ki yaa ti ye sigi jɛn ye yo fɔ Yɛnŋɛlɛ li Yinnɛ loli,
koyi ŋga yɛɛn fɔ:
Lere ŋa fuun kaga yo mbe yo kaselege Zhezu Kirisi wì pan ma sɛnwee wire lɛ,
Yinnɛkpoyi na lì yiri wa Yɛnŋɛlɛ li ni,
li yɛn wi ni.
3 Ɛɛn fɔ,
Lere ŋa fuun ka je mbe yo Zhezu wii pan mbe sɛnwee wire lɛ,
Yinnɛkpoyi na lì yiri wa Yɛnŋɛlɛ li ni,
li woro wi ni.
Yinnɛ na li yɛn wi ni,
Kirisi wi winfɔ wi yinnɛ loli.
Yàa ki logo ma yo wi daga mbe pan.
Yiŋgɔ wì pan makɔ laga dunruya wi ni.
4 Ɛɛn fɔ,
yoro wo na,
na piile,
ye yɛn Yɛnŋɛlɛ li woolo.
Yè fanŋga ta Yɛnŋɛlɛ yɔn sɛnrɛ yofɛnnɛ yagboyoolo pe na;
katugu Yinnɛkpoyi na li yɛn ye ni,
li yɛn yawa ni ma wɛ yinnɛ na li yɛn mbele pe yɛn dunruya woolo pe ni li na.
5 Poro wo na,
pe yɛn dunruya wi woolo,
ki kala na,
kagala ŋgele ke yɛn ma dunruya woolo pe ndanla,
koro pe maa yuun,
a dunruya woolo paa nuru pe yeri.
6 Woro wo na,
we yɛn Yɛnŋɛlɛ li woolo.
Lere ŋa wì Yɛnŋɛlɛ li jɛn,
wi maa nuru we yeri.
Lere ŋa wi woro Yɛnŋɛlɛ li woo,
wo na la nuru we yeri.
Pa we mbe ya kaselege Yinnɛ li jɛn mbeli wɔ yinnɛ na li maa leele punŋgu li ni yɛɛn.
Yɛnŋɛlɛ li yɛn ndanlawa
7 Na wɛnnɛ,
ye ti we we yɛɛ ndanla,
katugu ndanlawa pì yiri Yɛnŋɛlɛ lo yeri.
Lere ŋa fuun leele yɛn maa ndanla,
wo yɛn Yɛnŋɛlɛ li pyɔ,
wi yɛn ma Yɛnŋɛlɛ li jɛn.
8 Lere ŋa leele woro maa ndanla,
wii Yɛnŋɛlɛ li jɛn,
katugu Yɛnŋɛlɛ li yɛn ndanlawa.
9 Yɛnŋɛlɛ lìli ndanlawa pi naga we na yɛgɛ ŋga na ki ŋga:
Lìli Pinambyɔ nuŋgba pe wi tun laga dunruya wi ni,
jaŋgo we yinwege ta wi fanŋga na.
10 Ŋga ki yɛn ndanlawa we,
ki ŋga:
Kii cɛn ndɛɛ Yɛnŋɛlɛ lo li woro ndanla,
ɛɛn fɔ,
woro we lo ndanla,
a lì sili Pinambyɔ wi tun,
jaŋgo wi pan wi pye we kapere ti fɔgɔ tɔnsaraga.
11 Na wɛnnɛ,
na kì kaa pye we Yɛnŋɛlɛ li ndanla ma,
ki kala na,
woro fun ki daga we we yɛɛ ndanla.
12 Lere kpɛ fa Yɛnŋɛlɛ li yan yɛnlɛ ni fyew.
Na waga we yɛɛ ndanla,
pa Yɛnŋɛlɛ li yaa koro we ni.
Li ndanlawa mba pi yɛn we ni,
pi yaa pi yɛɛ yɔn fili.
13 Naa Yɛnŋɛlɛ lìli Yinnɛkpoyi li kan we yeri,
ko kì ti wège jɛn ma yo we yɛn Yɛnŋɛlɛ li ni,
a Yɛnŋɛlɛ fun li yɛn we ni.
14 Woro jate wège yan,
we nɛɛ ki yuun ma yo Yɛnŋɛlɛ na li yɛn To lìli Pinambyɔ wi tun wi pan wi pye dunruya woolo pe Shɔfɔ.
15 Na lere ŋa kaga yo mbege filige mbe yo Zhezu wi yɛn Yɛnŋɛlɛ li Pinambyɔ,
Yɛnŋɛlɛ li yɛn wi ni,
a wo fun wi yɛn Yɛnŋɛlɛ li ni.
16 Woro wo na,
we Yɛnŋɛlɛ li ndanla yɛgɛ ŋga na,
wège jɛn ma taga ki na.
Yɛnŋɛlɛ li yɛn ndanlawa.
Lere ŋa leele yɛn maa ndanla,
wi yɛn Yɛnŋɛlɛ li ni,
a Yɛnŋɛlɛ fun li yɛn wi ni.
17 Pa ndanlawa pì pi yɛɛ yɔn fili wa we ni yɛɛn,
jaŋgo we kotogo ta kiti kɔnpilige,
katugu we tangalɔmɔ laga ki dunruya ŋa wi ni,
pi yɛn ma yiri Zhezu Kirisi wi woo pi kɔrɔgɔ.
18 Ndanlawa pila lere kan wila fyɛ.
Ndanlawa mba pì yɔn fili,
pi ma lere fyɛrɛ kɔ wi na.
Ɛɛn fɔ,
fyɛrɛ ti maa paan jɔlɔgɔ ni.
Ŋa wi maa fyɛ wi ndanlawa pila pi yɛɛ yɔn fili.
19 Woro wo na,
leele pe yɛn ma we ndanla,
katugu woro we keli ma Yɛnŋɛlɛ li ndanla gbɛn.
20 Na lere wa ka yo Yɛnŋɛlɛ li yɛn maa ndanla mbe sigi ta wùu lewee yɛnlɛ wi panra,
wi yɛn yagboyoo;
katugu lere ŋa wi lewee yɛnlɛ ŋa wila yaan wi woro maa ndanla,
Yɛnŋɛlɛ na wi woro na yaan li mbe ya mboo ndanla mɛlɛ?
21 Ŋgasele na Kirisi wì kan we yeri loli na fɔ:
Yɛnŋɛlɛ li yɛn ma lere ŋa ndanla,
ki daga wi lewee yɛnlɛ wuu ndanla fun.