4
1 Yɛnŋɛlɛ lì yɔn fɔlɔ kɔn we yeri ma li yaga laga we kan,
ma yo we yaa ka ye wa li wogosaga ki ni.
Ki kala na,
ye ti we we yɛɛ yingiwɛ jɛn jɛŋgɛ,
jaŋgo ye ni,
wa kpɛ ka ka wa mbe la mbe koro wiga ka ye wa.
2 Katugu wè Sɛntanra ti logo fun paa yɛgɛ ŋga na mbele pàa pye wa gbinri wi ni pàa ti logo we.
Ki sɛnrɛ pàa ti logo,
ɛɛn fɔ ti sila kala yɔn pe kan,
katugu naa pàa ti logo,
pe sila ti yigi tagawa ni.
3 Woro mbele wè taga,
we yaa ye wa ki wogosaga ki ni,
ko ŋga Yɛnŋɛlɛ lìgi sɛnrɛ yo ma yo fɔ:
Wa na naŋgbanwa pi ni,
mì wugu ma yo fɔ:
Pe se ye wa na wogosaga ki ni fyew.
Làa ki sɛnrɛ ti yo ali maga ta li tunŋgo kìla kɔ maga lɛ wa sanga ŋa ni làa dunruya wi da we;
4 katugu wa Yɛnŋɛlɛ sɛnrɛ sɛwɛ wi ni,
kì yo wa laga ka na pilige kɔlɔshyɛn wogo ki na ma yo fɔ:
A lì si wogo pilige kɔlɔshyɛn wogo ki na tunŋgo ŋga fuun làa pye ki ni.
5 Ki nuru naa ma yo laga ka na fɔ:
Pe se ye wa na wogosaga ki ni fyew.
6 Mbele pàa pye koŋgbanmbala ma Sɛntanra ti logo,
pe sila ye wa ki wogosaga ki ni,
katugu pe sila taga ti na.
Ma si yala,
ki mbe ya pye pele kan pe ye wa.
7 Ko kì ti Yɛnŋɛlɛ li pilige ka fɔnŋgɔ tɛgɛ,
ŋga pe yɛn na yinri «nala».
Naa wagati titɔnlɔwɔ la kaa toro,
a lì si para ki wogo ki na wa Davidi wi yɔn,
wa laga ŋga ki sɛnrɛ tì yo makɔ ki ni ma yo fɔ:
Na yaga Yɛnŋɛlɛ li magala li logo nala,
yaga ka ye kotoro ti ŋgban ye yɛɛ na.
8 Ndɛɛ ki pye Zhozuwe wila wogosaga ki kan leele pe yeri,
Yɛnŋɛlɛ li saa ka para puŋgo na naa pilige ka wogo na.
9 Ki kala na,
Yɛnŋɛlɛ làa wogo pilige kɔlɔshyɛn wogo ki na yɛgɛ ŋga na,
ki wogowo pi yɔngɔ kan Yɛnŋɛlɛ li woolo pe yeri pe wogo.
10 Katugu lere ŋa ka ye wa Yɛnŋɛlɛ li wogosaga ki ni,
wi ma wogo tunndo nda wì pye ti ni,
paa yɛgɛ ŋga na Yɛnŋɛlɛ làa wogo li tunndo ti ni we.
11 Ki kala na,
ye ti waa ki ŋgbanga we ye wa ki wogosaga ki ni,
jaŋgo wa kpɛ ka ka Yɛnŋɛlɛ li sɛnrɛ ti kɛ we ni,
mbege wogosaga ki la paa mbele pàa pye wa gbinri wi ni pe yɛn.
12 Katugu Yɛnŋɛlɛ li sɛnrɛ ti yɛn yinwege woro ma pye fanŋga ni.
Tì tanla ma wɛ tokobi yɔn shyɛn taan woo na.
Ti ma ye ma gbɔn fɔ wa laga ŋga jatere wo naa yinnɛ li ni ti maa finli,
ma ye ma gbɔn fɔ wa laga ŋga kajeere ti sogosara to naa sɔmbɛ wi ni ti maa jiinri ti yɛɛ na.
Ti ma lere wi nawa kagala naa wi jatere wi cancan maa jɛn.
13 Yaraga ko ka woro wa ŋga ki mbe ya lara Yɛnŋɛlɛ li yɛgɛ na.
Yaara nda fuun lì da,
ti yɛn waga ma pye larasaga fu li yɛgɛ na.
Lo we ni fuun we daga mbe we kapyere ti yɛgɛ yo mbeli kan.
KIRISI, SARAGA WƆFƐNNƐ TOGBƆƆ, WI TUNŊGO
4.14–7.28
Zhezu wi yɛn saraga wɔfɛnnɛ togbɔɔ
14 Saraga wɔfɛnnɛ togbɔɔ yɛn we yeri,
ŋa wì ye ma kari fɔ wa Yɛnŋɛlɛ li tanla,
wo wi yɛn Zhezu,
Yɛnŋɛlɛ li Pinambyɔ we.
Ki kala na,
ye ti we yɛgɛ sin wa we tagawa pi ni,
po mba waa pi sɛnrɛ yuun we.
15 Saraga wɔfɛnnɛ to ŋa wi se ya mbaa we yinriwɛ taa wa we fanŋga fu kagala ke ni,
wo ma wi yɛn we yeri.
Ɛɛn fɔ,
we saraga wɔfɛnnɛ togbɔɔ pòo wa ma wele yɛgɛ ki ni fuun na paa we yɛn,
ɛɛn fɔ,
wii kapege pye.
16 Ki kala na,
ye ti we kotogo ta waa fulo wa Yɛnŋɛlɛ li wunluwɔ jɔngɔ ki tanla,
ko ŋga yinmɛ pi wa we,
jaŋgo we yuŋgbɔgɔrɔ mbe pye li na,
li yinmɛ kan we yeri,
mba pi yaa we saga wagati ŋa wì yala wi ni.