Shɔwɔ gbɔɔ sɛnrɛ
2
1 (Kì kaa pye Yɛnŋɛlɛ lì para we ni li Pinambyɔ wo yɔn),
ki kala na,
kaselege sɛnrɛ nda wè logo,
we daga mberi yigi tiyɔngɔ,
jaŋgo waga ka fɛgɛ mbe laga ti na.
2 Katugu sɛnrɛ nda mɛrɛgɛye pàa pan ma yo,
tìla pye fanŋga ni fɔ jɛŋgɛ.
Mbele pàa je ki sɛnrɛ ti na,
naa mbele pe sila tanga ti na,
pàa jɔlɔgɔ ta ma yala ŋga kìla daga pe ni we.
3 Kì pye ma,
we yaa shɔ ki jɔlɔgɔ ki ni mɛlɛ,
na waga ki shɔwɔ gbɔɔ mba pi wogo ki pye sambalawa ni we?
We Fɔ wo jate wìla keli maga shɔwɔ pi wogo ki yari.
Ko puŋgo na,
mbele pàa wi sɛnrɛ ti logo,
a pège yo maga filige we kan ma yo ki yɛn kaselege.
4 Yɛnŋɛlɛ fun,
a lìgi naga kacɛn lɛgɛrɛ ni,
naa kagbɔgɔlɔ,
naa kafɔnŋgɔlɔ cɛngɛlɛ ke ni fuun ni ma yo pe sɛrɛya wi yɛn kaselege.
A lì Yinnɛkpoyi yarikanra yɛɛlɛ ma yala li nandanwa kala li ni.
Ŋa wi maa leele pe yɛgɛ sinni na kee pe ni wa shɔwɔ kologo ki ni
5 Ye wele,
dunruya ŋa wila paan,
a waa wi sɛnrɛ yuun,
Yɛnŋɛlɛ lii fanŋga kan mɛrɛgɛye pe yeri pe cɛn wi go na.
6 Ɛɛn fɔ,
lere wà ki yo wa Yɛnŋɛlɛ sɛnrɛ sɛwɛ wi laga ka ni ma yo fɔ:
Sɛnwee wi yɛn yiŋgi,
Yɛnŋɛlɛ,
fɔ a maa jatere piin wi wogo na?
Sɛnwee pyɔ wi yɛn yiŋgi,
fɔ a maa wi kɔrɔsi?
7 Màa wi tirige wagati jɛnri ni ma wɛ mɛrɛgɛye pe na.
A mà gbɔgɔwɔ naa sɔnmɔ kan wi yeri paa wunluwɔ njala yɛn.
8 A mà yaara ti ni fuun ti tirige mari tɛgɛ wi nɔgɔ.
Na ki ka yo mbe yo fɔ:
«Yɛnŋɛlɛ lì yaara ti ni fuun ti go sogo wi kan.»
Ko kɔrɔ wo yɛn fɔ li yaraga ki ni fuun ki le wi kɛɛ,
ka si koro.
Ma si yala,
we faga yan gbɛn fɔ yaara ti ni fuun ti yɛn ma go sogo sɛnwee wi kan.
9 Ɛɛn fɔ,
wège yan fɔ:
Yɛnŋɛlɛ làa Zhezu wi tirige wagati jɛnri ni ma wɛ mɛrɛgɛye pe na,
jaŋgo Yɛnŋɛlɛ li yinmɛ pi kala na,
wi ku leele pe ni fuun pe kala na.
Yiŋgɔ,
wòo yan fɔ wì gbɔgɔwɔ naa sɔnmɔ ta paa wunluwɔ njala yɛn,
wi jɔlɔgɔ kunwɔ mba wì ku pi kala na.
10 Kaselege ko na,
Yɛnŋɛlɛ na lì yaara ti ni fuun ti da mari yigi,
kìla yala li yeri li Zhezu wi yɔn fili wi jɔlɔgɔ ki fanŋga na,
jaŋgo wi piile lɛgɛrɛ kan pe pe tasaga ta wa wi gbɔgɔwɔ pi ni;
katugu Zhezu wo wi yɛn ŋa wi yɛn na pe yɛgɛ sinni wa shɔwɔ pi ni.
11 Zhezu ŋa wila leele pe piin kpoyi na pe kapere ti lari pe na,
konaa mbele pè pye kpoyi,
wo naa poro ni To nuŋgba wi yɛn pe yeri.
Ki kala na,
Zhezu wii fɛrɛ ta mbaa pe yinri wi woolo.
12 Ko kì ti wì yo fɔ:
E Yɛnŋɛlɛ,
mi yaa kaa ma sɛnrɛ yuun na sefɛnnɛ pe kan,
mi yaa kaa ma sɔnni yuuro ni wa janwa wi sɔgɔwɔ.
13 A wì yo naa fɔ:
Mi yaa na jigi wi taga Yɛnŋɛlɛ li na.
Ma nuru ma yo fɔ:
Piile mbele Yɛnŋɛlɛ lì kan na yeri,
mi ŋa pe ni.
14 Kì kaa pye piile pe yɛn kasanwa naa wire ni,
kì pye ma,
Zhezu wo jate wì pan ma pye paa pe yɛn,
ma sɛnwee wire cɛnlɔmɔ lɛ.
Wì ko pye ma,
jaŋgo wi kunwɔ pi fanŋga na,
wi Sɔtanla wi tɔngɔ,
wo ŋa kunwɔ pi fanŋga ki yɛn wi yeri we;
15 konaa mbele pàa pye paa kulolo yɛn pe yinwege wagati wi ni fuun wi ni pe kunwɔ fyɛrɛ ti kala na,
mbe pe shɔ.
16 Kaselege ko na,
mɛrɛgɛye poro ma wì pan mbe saga,
ɛɛn fɔ,
Abirahamu setirige piile poro wì pan mbe saga.
17 Ko kì ti kìla daga wi pye wi woolo pe yanlɛɛ kala li ni fuun ni,
jaŋgo wi pye pe saraga wɔfɛnnɛ to,
ŋa wi yɛn leele yinriwɛ tafɔ,
ma pye tagawa ni wa tunŋgo ŋga wila piin Yɛnŋɛlɛ li kan ki ni,
mbe ta mbe leele pe kapere ti fɔgɔ tɔn.
18 Yiŋgɔ ni,
wi mbe ya mbaa mbele wamawelewe pì gbɔn pe na pe sari,
katugu wo jate wamawelewe pìla gbɔn wi na,
a wì jɔlɔ.