Zhezu Kirisi wi sorodashe jɛnŋɛ
2
1 Ki kala na,
mboro ŋa na pinambyɔ,
fanŋga le ma yɛɛ ni yinmɛ mba wè ta Zhezu Kirisi wi yeri pi ni.
2 Kagala ŋgele mà logo na yeri sɛrɛfɛnnɛ lɛgɛrɛ yɛgɛ na,
ma ke telege leele mbele pe yɛn tagawa ni pele na,
mbele pe mbe ya mbaa leele pele nari ke ni fun we.
3 Mɔɔ tasaga lɛ wa jɔlɔgɔ kagala ke ni,
maa jɔlɔ na ni ja paa Zhezu Kirisi wi sorodashe jɛnŋɛ yɛn.
4 Lere ŋa kaa kee sorodasheya,
wila wi jatere wi lɛgɛ wi yɛɛ na ca kagala koro kala na,
na wi kaa jaa wi kala luu kundigi wi ndanla we.
5 Fevɔ ŋa ka kari kashara fenɛ li na,
na wii fe mbe yala ki ŋgasegele ke ni,
wila ki sara wi ta.
6 Kɛrɛ kɔnfɔ ŋa wi tunŋgo ki pye ma te,
wo wi daga mbe keli mboo tasaga ta wa yarilire ti ni.
7 Nda mila yuun ma kan,
jatere pye ti na,
katugu we Fɔ wi yaa tijinliwɛ kan ma yeri ma ti ni fuun ti kɔrɔ jɛn.
8 Ta nawa tuun Zhezu Kirisi wi na.
Wo wi yɛn Davidi setirige pyɔ we.
Wìla yɛn ma yiri wa kunwɔ pi ni paa yɛgɛ ŋga na Sɛntanra nda mila yari tìgi yo we.
9 Ki Sɛntanra nda mila yari leele pe kan,
to kala na mi yɛn na jɔlɔ,
fɔ a pànla pɔ yɛrɛ jɔrɔgɔ ni paa kapege pyefɔ yɛn.
Ɛɛn fɔ,
Yɛnŋɛlɛ sɛnrɛ pee to pɔ.
10 Ko kì ti mi yɛn na kala li ni fuun li kunni na yɛɛ ni,
leele mbele Yɛnŋɛlɛ lì wɔ pe kala na,
jaŋgo Zhezu Kirisi wi yɛn na shɔwɔ mba kaan,
poro fun poo ta,
konaa gbɔgɔwɔ mbakɔɔ pi ni.
11 Ki sɛnrɛ nda ti yɛn kaselege sɛnrɛ fɔ:
Na kàa pye we pinlɛ ma ku wi ni,
we yaa ka pinlɛ mbaa we yinwege ki piin wi ni fun.
12 Na waga kala li ni fuun li kun we yɛɛ ni,
pa we yaa ka pye wi ni ja wa wi wunluwɔ pi ni.
Na waga si je wi na,
pa wo fun wi yaa ka je we na.
13 Na kaa pye wee taga wi na,
wo yaa koro sɛnrɛ nuŋgba yofɔ,
katugu wi se ya mbe je wi yɛɛ na.
Tunmbyee ŋa pè ma wa ma wele wi kala
14 Ma leele pe ni fuun pe nawa to ki na,
ma pe yɛnri ŋgbanga Yɛnŋɛlɛ li yɛgɛ na,
fɔ paga kaa wiin pe yɛɛ ni sɛnpiile kala na.
Ki maara tila kala yɔn,
ti maa mbele pe maa ti nuru pe jogo win.
15 Bala mɔɔ yɛɛ naga Yɛnŋɛlɛ li na paa tunmbyee ŋa wi ma mɛgɛ ta we.
Pa tunmbyee yɛn ŋa wi woro na fɛrɛ taa wi tunŋgo ki ni.
Wi maa kaselege sɛnrɛ ti yuun nari yɛgɛ woo ti yɛgɛ ki na.
16 Mɔɔ yɛɛ yigi kendige waga ki ni.
Ki woro ma yala tagawa konɔ li ni,
katugu mbele pe maa ki kendige waga ki woo,
pe maa lali Yɛnŋɛlɛ li ni na seregi.
17 Pe nagawa sɛnrɛ ti yɛn paa sagbanga yɛn,
ŋga ki maa gbogo na seregi.
Ki leele poro pele wɛlɛ Imene naa Filɛti.
18 Pè je ma laga kaselege ki na,
na lelɛgɛrɛ fanla na pe lari tagawa konɔ li na ma yo kuulo pe yɛnmɛ pìla pye makɔ.
19 Konaa ki ni fuun,
kagala ŋgele Yɛnŋɛlɛ lì nɔgɔ le,
ke wa ke yɔnlɔ.
Ki sɛnrɛ nda ti yɛn ma yɔnlɔgɔ ke na ma yo fɔ:
«We Fɔ wùu woolo pe jɛn.»
Ma nuru ma yo fɔ:
Lere ŋa fuun kaga yo mbe yo wi yɛn we Fɔ wi woo,
wi daga mbe puŋgo le kapege pyege ki ni.
20 Wa yuŋgbeŋge ki ni,
tɛ naa warifuwe yaapire cɛ ma ti ma pye wa.
Ɛɛn fɔ,
tire woro ma pye wa,
naa cɔrɔ ni.
Ta yɛn gbɔgɔwɔ woro,
sannda pe maa gbegele to ni pilige pyew.
21 Lere ŋa kaa yɛɛ wɔ kagala ŋgele mila ke sɛnrɛ yuun ma kan ke ni,
mbe pye kpoyi,
wi yaa pye paa gbɔgɔwɔ yaapige yɛn,
mbe pye Yɛnŋɛlɛ li woo.
Wi yaa pye kayɔngɔ ni wi Fɔ wi kan,
mbe gbɛgɛlɛ mbe yala kapyere jɛndɛ ti ni fuun pyege kala na.
22 Ma lefɔnrɔ jogo kagala ke yaga wa,
maa kasinŋge ki lagajaa,
naa tagawa ni,
naa ndanlawa ni,
naa yɛyinŋge ni leele mbele pe maa Yɛnŋɛlɛ li yɛnri kotojɛŋgɛ ni pe ni.
23 Ɛɛn fɔ,
ma je tijinliwɛ fu kendige waga ki na.
Màga jɛn ma yo ki maa maara kɔɔn.
24 Ma si yala,
we Fɔ wi tunmbyee wii daga mbaa wiin.
Ɛɛn fɔ,
wi daga mbe pye ndanlawa ni lere pyew wi ni,
mbe ya mbaa leele pe nari Yɛnŋɛlɛ sɛnrɛ ti ni,
mbaa kagala kunni wi yɛɛ ni.
25 Mbele pe maa kendige woo wi ni,
wi daga mbaa pe nari nandanwa ni.
Kana pa Yɛnŋɛlɛ li yaa yunndanga kan pe yeri pe pe kapere ti jɛn peri yaga,
mbe kaselege ki jɛn.
26 Kona,
pe yaa tijinliwɛ ta mbe pe yɛɛ wɔ wa Sɔtanla wi pɛnɛ li ni,
lo na làa pe yigi,
a paa wi nandanwa kala li piin we.