Lepee wi sɛnrɛ
2
1 Sefɛnnɛ,
we Fɔ Zhezu Kirisi wi panga wogo ko kanŋgɔlɔ,
naa we gbogolomɔ wa wi tanla wogo ko na,
we yɛn na ye yɛnri,
2 fɔ yaga ka ti ye jatere wi piri ye na fyaw,
nakoma ye fyɛ ye yo fɔ pè yo we Fɔ wi pilige ki gbɔn makɔ.
Kana ki mbe ya pye lere wa ki yo ye kan wi Yɛnŋɛlɛ yɔn sɛnyoro ni,
nakoma ma Yɛnŋɛlɛ sɛnrɛ yo ki wogo ki na,
nakoma,
a pè sɛwɛɛlɛ torogo ye yeri ma yo woro wè pe yɔnlɔgɔ.
3 Yaga kaga yaga lere wa mbe ye fanla yɛgɛ ka na,
katugu ki pilige ki se gbɔn mbege ta lelɛgɛrɛ fa je Yɛnŋɛlɛ konɔ li na gbɛn,
na Lepee fun wi faa yɛɛ naga.
Wo ŋa kì kɔn ma tɛgɛ wi kan poo jɔgɔ we.
4 Kona,
yaraga ŋga fuun leele pe maa yinri yɛnŋɛlɛ,
naa ŋga fuun pe maa gbogo,
wi yaa ka yiri mbaa wiin to ti ni fuun to ni,
mbaa wi yɛɛ gbogo ti na,
mbe ka sa cɛn yɛrɛ wa Yɛnŋɛlɛ li shɛrigo gbɔgɔ ki ni mbaa wi yɛɛ nari mbe yo wo wi yɛn Yɛnŋɛlɛ le.
5 Ye nawa to ki na,
yege jɛn ye yo fɔ sanga ŋa ni mìla pye wa ye yeri,
mìla pye naga wogo ki yuun ye kan.
6 Ma si yala,
yaraga kayi kìgi kagala ke yerege kaga ka pye yiŋgɔ.
Yaraga ŋga yi,
yège jɛn.
Kì pye ma,
Lepee wi se ya mboo yɛɛ naga,
fɔ ndɛɛ wagati ŋa wì kɔn ma tɛgɛ wi kan wo mbe gbɔn.
7 Tipewe fanŋga ŋga ki yɛn ma lara,
kila tunŋgo piin makɔ.
Ɛɛn fɔ,
ki kagala ke se ya pye ndɛɛ sa gbɔn ŋa wùu yerege bere wo mbe sa kari wi wɔ wa.
8 Kona,
pa Lepee wi yaa wi yɛɛ naga.
Ɛɛn fɔ,
we Fɔ Zhezu wi yaa wi gbo wi yɔn tifɛlɛgɛ ki ni,
mboo jɔgɔ wi panga yanwa pi ni.
9 Ki Lepee wi yaa ka pan Sɔtanla wi yawa po ni,
mbaa yagbogolo kafɔnŋgɔlɔ naa kagbɔgɔlɔ ke cɛnlɛ pyew ke piin.
10 Wi yaa kaa kapege ki cɛnlɛ pyew ki piin mbaa leele mbele pe yaa pe yɛɛ puŋgo pe fanla.
Pe yaa ka pe yɛɛ puŋgo,
katugu kaselege ŋga ki yaa pe shɔ,
ki se pe ndanla pege yigi.
11 Ko kì ti Yɛnŋɛlɛ li yaa punŋguwɔ fanŋga torogo pe yeri ki tunŋgo pye pe ni,
jaŋgo pe taga yagbolo li na.
12 Kì pye ma,
mbele fuun pee taga kaselege ki na,
ɛɛn fɔ,
a kapege kì pe ndanla,
kiti yaa ka kɔn mbe to pe na.
Yɛnŋɛlɛ lì ye wɔ ye ta ye shɔ
13 Sefɛnnɛ,
yoro mbele ye yɛn ma we Fɔ wi ndanla,
we daga mbaa Yɛnŋɛlɛ li shari suyi ye kala na;
katugu Yɛnŋɛlɛ lì ye wɔ mbe ye shɔ ye kapere ti ni maga lɛ wa dunruya wi dasanga wi ni Yinnɛkpoyi li fanŋga na,
lo na lì ye pye kpoyi ye tagawa mba yè taga kaselege ki na pi kala na.
14 Yɛnŋɛlɛ lì ye yeri ki shɔwɔ pi mɛgɛ ni Sɛntanra nda wè yo ye kan to kala na,
jaŋgo ye ye tasaga ta wa we Fɔ Zhezu Kirisi wi gbɔgɔwɔ pi ni.
15 Ki kala na,
sefɛnnɛ,
ye koro ye ndire kan.
Yɛrɛwɛ sɛnrɛ nda wè yo ma ye kan sɛnyoro ni,
nakoma wa sɛwɛɛlɛ mbele wè torogo ye kan pe ni,
yeri yigi!
16 We Fɔ Zhezu Kirisi jate,
wo naa we To Yɛnŋɛlɛ na we yɛn ma ndanla,
a laa kotogo kaan we yeri suyi,
naa jigi tagasaga jɛŋgɛ ni li yinmɛ pi kala na,
17 pe kotogo le ye ni,
pe fanŋga kan ye yeri yaa kajɛŋgɛ ki ni fuun ki piin wa ye kapyere to naa ye sɛnyoro ti ni.