Wè wɔ wa kunwɔ pi ni ma yinwege ta
2
1 Faa,
yàa ku yinnɛ lo na ye kajɔgɔrɔ naa ye kapere ti kala na.
2 Ki sanga wi ni,
yàa pye na tanri na yala ki dunruya ŋa wi tangalɔmɔ po ni,
na yinŋgele ŋgele yawa yɛn ke ni wa naayeri ke To wi sɛnrɛ ti nuru.
Ko yinnɛ lo laa tunŋgo piin yiŋgɔ wa mbele pè je Yɛnŋɛlɛ li na pe kotoro na.
3 Woro fun,
wàa pye paa pe yɛn,
na tanri na yala we wire ti jogo kagala ke ni,
na we wire to naa we jatere wi nandanwa kagala ke piin.
We sewe po na,
wàa daga Yɛnŋɛlɛ li naŋgbanwa pi ni paa sanmbala pe yɛn.
4 Ɛɛn fɔ,
Yɛnŋɛlɛ li yinriwɛ taga kì gbɔgɔ fɔ jɛŋgɛ,
we yɛn ma li ndanla ndanlawa gbembe mba ni pi kala na,
5 woro mbele wàa ku yinnɛ lo na we kajɔgɔrɔ ti kala na,
lì yinwege kan naa we yeri Kirisi wi ni.
Yɛnŋɛlɛ li yinmɛ po fanŋga na yè shɔ.
6 Naa wè gbogolo Zhezu Kirisi wi ni,
Yɛnŋɛlɛ lì we yɛn ma we yirige wi ni ja,
ma we kan waa wunluwɔ piin wi ni ja wa naayeri lara ti na.
7 Lì ko pye ma,
jaŋgo mbe ta mbeli yinmɛ mba pi se jɛn mbe kɔ pi naga leele pe na wagati ŋa fuun wila paan wi ni,
li kajɛŋgɛ ŋga lì pye we kan wa we gbogolomɔ pi ni Zhezu Kirisi wi ni ki kala na.
8 Yɛnŋɛlɛ li yinmɛ po fanŋga na yè shɔ ye tagawa pi kala na.
Ko si yiri yoro yeri,
Yɛnŋɛlɛ lo yarikanga yi.
9 Ye kapyere to tulugo si ma,
jaŋgo lere kpɛ ka kaa yɛɛ gbɔgɔ.
10 Katugu Yɛnŋɛlɛ lo lì we gbegele.
Lì we da wa we gbogolomɔ pi ni Zhezu Kirisi wi ni,
jaŋgo waa kapyere jɛndɛ piin,
làa ti gbegele mari tɛgɛ faa,
jaŋgo waa taanri ti na.
Mbe pye nuŋgba Zhezu Kirisi wi ni
11 Yoro mbele ye woro Zhufuye piseele,
Zhufuye pe maa ye yinri mbele pee kɛnrɛkɛnrɛ,
nɛɛ pe yɛɛ yinri mbele pè kɛnrɛkɛnrɛ,
ma yala ŋga leele pè pye pe wire ti na ki ni,
faa yàa pye yɛgɛ ŋga na,
ye yɛɛ nawa to ki na.
12 Ki sanga wi ni,
yàa pye ma lali Kirisi wi ni.
Yàa pye nambanmbala,
ye sila pye Yɛnŋɛlɛ li woolo mbele lì wɔ pe ni.
Yɔn finliwɛ yɔn fɔgɔlɔ ŋgele Yɛnŋɛlɛ làa kɔn li woolo pe yeri,
ye tawa sila pye wa ke ni.
Yàa pye na ye yinwege ki piin laga dunruya wi ni jigi tagasaga fu naa Yɛnŋɛlɛ fu.
13 Ɛɛn fɔ koni,
wa ye gbogolomɔ pi ni Zhezu Kirisi wi ni,
yoro mbele yàa pye ma lali,
yè pan tɔɔn Yɛnŋɛlɛ li tanla Zhezu wi kunwɔ pi fanŋga na.
14 Katugu Kirisi wo wì pan yɛyinŋge ki ni we kan,
ma si Zhufuye poro naa mbele pe woro Zhufuye pe pye leele nuŋgba.
Wo wùu yɛɛ kan ma mbogo ŋga kìla pe kɔn pe yɛɛ na,
ma pe pye juguye ki ya.
15 Wì Zhufuye lasiri wo naa wi ŋgasegele ke jan wi kunwɔ pi fanŋga na,
ma sigi cɛngɛlɛ shyɛn leele pe pye lere fɔnŋɔ nuŋgba wi yɛɛ ni,
ma yɛyinŋge le pe sɔgɔwɔ.
16 Kirisi wi kunwɔ wa tiparaga ki na pi fanŋga na,
wì panraga ki kɔ,
ma sigi cɛngɛlɛ shyɛn ke gbogolo ma ke pye wire nuŋgba,
mɛɛ tanwa le poro naa Yɛnŋɛlɛ pe sɔgɔwɔ pi ni.
17 Wì pan ma yɛyinŋge Sɛntanra ti yari yoro mbele yàa pye ma lali,
konaa yoro mbele yàa pye ma yɔngɔ ye kan.
18 Ko kì ti Kirisi wi fanŋga na,
Zhufuye poro naa mbele pe woro Zhufuye,
we ni fuun,
we mbe ya pan we to Yɛnŋɛlɛ li tanla Yinnɛkpoyi nuŋgba li sagawa pi na.
19 Ki kala na,
yoro mbele ye woro Zhufuye,
ye woro nambanmbala,
nakoma tara ta woolo.
Ɛɛn fɔ yiŋgɔ,
yè pye tara nuŋgba woolo Yɛnŋɛlɛ li woolo pe ni,
ma pye Yɛnŋɛlɛ li go woolo.
20 Yoro fun,
ye yɛn ma kan go nɔgɔ ŋga na,
ko ki yɛn pitunmbolo poro naa Yɛnŋɛlɛ yɔn sɛnrɛ yofɛnnɛ pe sɛnrɛ re.
Zhezu Kirisi jate wo wi yɛn go yɛnlɛ li sinndɛlɛgɛ koŋgbanŋga ye.
21 Wo wi ti go ki ni fuun ki yɛn na ki yɛɛ yinri jɛŋgɛ na gbogo mbe pye shɛrigo gbɔgɔ kpoyi we Fɔ wi kan.
22 Yoro fun,
wa ye gbogolomɔ pi ni wi ni,
ye yɛn ma ye yɛɛ yigi jɛŋgɛ,
yoro naa sanmbala pe ni,
mbe pye go ŋga Yɛnŋɛlɛ li yaa la cɛɛn wa Yinnɛkpoyi li fanŋga na.