4
1 Sɛnrɛ nda mila yuun ti kɔrɔ wi ŋa:
Pyɔ ŋa wi yaa kaa to kɔrɔgɔ ki li,
mboo ta wi yɛn pyɔ jɛɛ bere,
wo naa kulo ni wa si wɔ wa ni.
Ali maga ta wo wi yɛn yaraga ki ni fuun ki go na.
2 Mboo ta wa wi puwɛn pi ni,
leele pele pe maa wele wi na,
naa kagala ke yɛgɛ woo fɔ wi ma saa gbɔn wi to wì wagati ŋa kɔn wi na.
3 Woro fun pa wàa pye ma.
Sanga ŋa ni we yɛn paa piile yɛn,
wàa pye wa dunruya kalɛgɛlɛ ke kulowo pi ni.
4 Ɛɛn fɔ,
Yɛnŋɛlɛ làa sanga ŋa kɔn,
naa wì kaa gbɔn,
a lì sili Pinambyɔ wi torogo laga dunruya wi ni;
a jɛlɛ wì se,
a wì lasiri wi yigi na tanri wi na,
5 jaŋgo mbele pàa pye na tanri lasiri wi na,
mbe pe go shɔ we ta we pye Yɛnŋɛlɛ li piile.
6 Naa we yɛn Yɛnŋɛlɛ li piile,
ki kala na,
Yɛnŋɛlɛ lìli Pinambyɔ wi Yinnɛ li torogo mali le wa we kotoro na.
Ki Yinnɛ li ma we kan we maa Yɛnŋɛlɛ li yinri fɔ:
Baba,
na To!
7 Ki kala na,
ma woro kulo naa,
ma yɛn li pinambyɔ.
Pa mà si kaa pye li pinambyɔ,
kɔrɔgɔ ŋga lì tɛgɛ li piile pe kan,
li yaa kaga kan ma yeri fun.
Pɔli wi jatere wila lɛgɛ wi na Galasi tara tagafɛnnɛ pe kala na
8 Faa ye sila Yɛnŋɛlɛ li jɛn,
yàa pye yarisunndo nda kulolo,
ti woro Yɛnŋɛlɛ jɛnnɛ.
9 Ɛɛn fɔ,
yiŋgɔ yè Yɛnŋɛlɛ li jɛn,
nakosima,
Yɛnŋɛlɛ lì ye jɛn yiŋgɔ,
yiŋgi na ye si sɔngɔrɔ ki kalɛgɛlɛ ŋgele ke yɛn waga,
ma pye fanŋga fu ke kɔrɔgɔ?
Mɛlɛ ye nɛɛ jaa mbe pye ke kulolo naa?
10 Ye maa piliye,
naa yeyɛn,
naa wagati,
naa yɛgɛlɛ kele jate kagbɔgɔ ma wɛ.
11 Mila fyɛ ye kala na,
fɔ kiga ka pye mì tunŋgo pye ye kan ki yiri waga.
12 Sefɛnnɛ,
mila ye yɛnri fɔ ye kanŋga paa na yɛn,
paa yɛgɛ ŋga na mìlan yɛɛ pye paa ye yɛn we.
Yee tipege kpɛ pye na na.
13 Yège jɛn ma yo na mìla pan ma Sɛntanra ti yo ye kan ki koŋgbanŋga ki na,
mi sila pye ŋgbaan.
14 Na yama pìla ye jori jɛŋgɛ,
konaa ki ni fuun,
ye sila na tifaga,
mbanla wa kɛɛ puŋgo na.
Ɛɛn fɔ,
yàa na yigi jɛŋgɛ paa Yɛnŋɛlɛ li mɛrɛgɛ yɛn,
nakoma paa Zhezu Kirisi wi yɛn.
15 Ki wagati wi ni,
nayinmɛ la pye ye yeri fɔ jɛŋgɛ.
Mɛlɛ koni nayinmɛ si woro ye ni?
Mbe ya mbege wogo ŋga ki yo fɔ,
nayinmɛ mba yàa ta pi kala na,
ki pye ki mbaa ya pye,
anmɛ ye mbaa ye yɛngɛlɛ ke wɔ mbe ke kan na yeri.
16 Naa mì kaselege ki yo ma ye kan,
ko kì ti mì kanŋga ma ye mbɛn kɛ?
17 Ki leele mbele paa jaa mbe Sɛntanra ti jɔgɔ,
pe yɛn ma bala na ye jaa,
ɛɛn fɔ,
paa ki piin jatere ŋa ni wi woro ma yɔn.
Paa jaa mbe ye laga we na,
jaŋgo ye bala ye taga pe na.
18 Ki yɛn ma yɔn lere wi bala kajɛŋgɛ ki na sanga pyew.
Ɛɛn fɔ,
wiga kaa ki piin na mi ka pye wa ye sɔgɔwɔ ko cɛ.
19 Yoro mbele ye yɛn paa na piile yɛn,
ki yɛn nala yaa naa jɛŋgɛ ye kala na,
paa yɛgɛ ŋga na jɛlɛ kaa jaa mbe se wi maa jɔlɔ we,
fɔ ye saa tanri Kirisi wi tangalɔmɔ pi na.
20 Mila ki jaa jate mbanla yɛɛ yan wa ye sɔgɔwɔ yiŋgɔ,
jaŋgo mbe ta mbanla sɛnrɛ yolɔmɔ pi kanŋga,
katugu na jatere wì piri na na ye kala na.
Agari naa Sara pe kala
21 Yoro mbele yaa jaa mbaa tanri lasiri wi na mbe ta mbe shɔ,
lasiri wi yɛn na ŋga yuun ye woro naga nuru wi le?
22 Katugu ki yɛn ma yɔnlɔgɔ wa Yɛnŋɛlɛ sɛnrɛ sɛwɛ wi ni ma yo fɔ:
Pinambiile shyɛn la pye Abirahamu wi yeri.
Wìla nuŋgba se wi kulojɔ Agari wi na,
ma sanŋa wi se wi jɔ Sara ŋa wi yɛn lesee wi na.
23 Kulojɔ wìla wi pinambyɔ wi se ma yala sɛnwee fanŋga ko ni,
ɛɛn fɔ,
jɛlɛ ŋa wi yɛn lesee wìla wi pinambyɔ wi se ma yala Yɛnŋɛlɛ làa yɔn fɔlɔ na kɔn lo ni.
24 Ki sɛnrɛ ti yɛn na kɔrɔ fɔnŋɔ yuun:
Ki jɛɛlɛ shyɛn pe yɛn paa Yɛnŋɛlɛ li yɔn finliwɛ cɛngɛlɛ shyɛn yɛn.
Yɔn finliwɛ nuŋgba yɛn paa kulojɔ Agari wi yɛn,
po la ta wa Sinayi yanwiga ki na.
Wo maa wi piile pe siin wa kulowo pi ni.
25 Agari wo yɛn paa Sinayi yanwiga ki yɛn wa Larabuye tara.
Wi yɛn ma taanla nala pilige Zheruzalɛmu wi ni.
Ki ca ki yɛn wa lasiri wi kulowo pi ni,
naa ki woolo pe ni.
26 Ɛɛn fɔ,
Zheruzalɛmu ŋa wa yɛnŋɛlɛ na wo wi yɛn jɛlɛ ŋa wi yɛn lesee we.
Wo wi yɛn we nɔ we.
27 Wo sɛnrɛ ti yɛn ma yɔnlɔgɔ wa Yɛnŋɛlɛ sɛnrɛ sɛwɛ wi ni,
ma yo fɔ:
Mboro ŋa jambasee,
ta yɔgɔri,
mboro ŋa ma fa pyɔ se mbe yan!
Mboro ŋa selara fɔɔn ya,
ta jɔrɔgi nayinmɛ ni!
Katugu jɛlɛ ŋa pè wa,
wi piile pe yaa ka lɛgɛ mbe wɛ jɛlɛ ŋa wi yɛn wi pɔlɔ wi yeri wi woolo pe na.
28 Yoro wo na,
sefɛnnɛ,
ye yɛn piile mbele pè se ma yala Yɛnŋɛlɛ làa yɔn fɔlɔ na kɔn li ni,
paa Sara wi pinambyɔ Izaki wi yɛn fun.
29 Faa pinambyɔ ŋa pàa se ma yala sɛnwee fanŋga ki ni,
wìla pye na pinambyɔ ŋa wìla se ma yala Yɛnŋɛlɛ li Yinnɛkpoyi li fanŋga ki ni wi jɔlɔ.
Pa ki yɛn ma ali ma pan ma gbɔn nala.
30 Ɛɛn fɔ,
Yɛnŋɛlɛ sɛnrɛ sɛwɛ wi yɛn na yuun mɛlɛ?
Wi yɛn naga yuun ma yo fɔ:
«Kulojɔ wi purɔ wo naa wi pinambyɔ wi ni,
katugu kulojɔ wi pinambyɔ wi se pinlɛ mbe kɔrɔgɔ ki li ja jɛlɛ ŋa wi yɛn lesee wi Pinambyɔ wi ni.»
31 Kì pye ma,
sefɛnnɛ,
we woro kulojɔ wi piile.
Ɛɛn fɔ,
we yɛn jɛlɛ ŋa wi yɛn lesee wo piile.