Pɔli naa pitunmbolo sanmbala pe ni
2
1 Naa yɛlɛ kɛ ma yiri tijɛrɛ la kaa toro,
a mì si sɔngɔrɔ naa wa Zheruzalɛmu,
mi naa Barinabasi wi ni.
Mìla Tite wi lɛ ma kari wi ni fun.
2 Mìla kari,
katugu Yɛnŋɛlɛ làa ki naga na na ma yo ki daga mbe kari.
Sɛntanra nda mila yari mbele pe woro Zhufuye pe kan,
a mì si saa ti yɛgɛ yo tagafɛnnɛ yɛkeele poro cɛ kan finliwɛ pa na;
katugu mi sila pye na jaa na tunŋgo ŋga mìla pye,
naa ŋga mila piin bere ki kɔ waga.
3 Na tangayɛnlɛ Tite ŋa wìla pye Girɛsi tara fɛnnɛ woo,
pe sila wi jori mbe yo wi kɛnrɛkɛnrɛ wi pye Zhufuye woo.
4 Konaa ki ni fuun,
yagboyoolo pèle la pe yɛɛ pye ma yo pe yɛn sefɛnnɛ,
ma ye we sɔgɔwɔ na jaa mboo kɛnrɛkɛnrɛ.
Ki leele pàa ye we sɔgɔwɔ larawa,
lesewe mba wè ta wa we gbogolomɔ pi ni Zhezu Kirisi wi ni,
mbe ta mboo wele mboo jɛn,
nɛɛ ki jaa mbe we le wa kulowo pi ni.
5 Ɛɛn fɔ,
we sila yɛnlɛ mbe logo pe yeri wagati jɛnri ni,
jaŋgo Sɛntanra nda ti yɛn kaselege sɛnrɛ,
ti koro ye sɔgɔwɔ paa yɛgɛ ŋga na ti yɛn we.
6 Mbele pàa pye na jate paa yɛkeele yɛn,
pàa pye mɛgbɔgɔ fɛnnɛ yɛgɛ ŋga na,
ko sila pye yaraga ka na yɛgɛ na,
katugu Yɛnŋɛlɛ laa lere wɔ lere ni.
Ki yɛkeele pe sila yaraga ka taga wa na kajɛnmɛ pi na.
7 Ɛɛn fɔ,
pàa ki jɛn ma yo Yɛnŋɛlɛ làa Sɛntanra ti kan na yeri mbaa ti yari mbele pe woro Zhufuye pe kan,
paa yɛgɛ ŋga na tì kan Pyɛri wi yeri wi saa ti yari Zhufuye pe kan we.
8 Yɛnŋɛlɛ na làa tunŋgo pye wa Pyɛri wi nawa maa pye pitunŋɔ wa Zhufuye pe yeri,
lo nuŋgba lo làa tunŋgo pye wa na nawa mala pye pitunŋɔ wa mbele pe woro Zhufuye pe yeri.
9 Zhaki,
naa Pyɛri,
naa Zhan,
poro mbele pàa pye na jate paa teele yɛn,
naa pàa kaa ki jɛn ma yo Yɛnŋɛlɛ làa ki tunŋgo ki kan na yeri,
a pè si kɛyɛn le mi naa Barinabasi we kɛɛ.
A ko ki naga ma yo wè pye nuŋgba.
A pè yɛnlɛ ma yo we saa Sɛntanra ti yari leele mbele pe woro Zhufuye pe kan.
Poro yaa saa ti yari Zhufuye pe kan.
10 A pè si we yɛnri kala nuŋgba ni ma yo tagafɛnnɛ mbele pe yɛn fyɔnwɔ fɛnnɛ,
waa pe sari.
A mì si bala nɛɛ pe sari.
Pɔli wila sɛnŋgbanra yo Pyɛri wi na wa Antiyɔshi ca
11 Ko puŋgo na,
naa Pyɛri wìla kaa pan wa Antiyɔshi,
mìla sɛnŋgbanra yo wi na tagafɛnnɛ pe ni fuun pe yɛgɛ na,
katugu ŋga wìla pye ki sila sin.
12 Zhaki wìla leele mbele tun,
sanga ŋa ni pe fa pan,
Pyɛri wìla pye na nii sefɛnnɛ mbele pe woro Zhufuye pe ni.
Naa pitunmbolo pàa kaa pan,
a wì si laga pe na,
wi woro na nii pe ni,
katugu wìla pye na fyɛ ki leele mbele pè kɛnrɛkɛnrɛ pe yɛgɛ.
13 Kì kaa pye ma,
sefɛnnɛ sanmbala mbele pe yɛn Zhufuye,
a pè pinlɛ Pyɛri wi ni na wi kopiire nuŋgba ti piin,
fɔ ma Barinabasi fun wi puŋgo pe kopiire ti ni.
14 Naa mìla kaa ki yan pe woro ma sin,
pe si woro na tanri na yala Sɛntanra nda ti yɛn kaselege sɛnrɛ ti ni,
a mì sigi yo Pyɛri wi kan tagafɛnnɛ pe ni fuun pe yɛgɛ na,
ma yo fɔ:
«Pyɛri,
mboro ŋa ma yɛn Zhufuye woo,
mɔ̀ɔ yinwege ki pye laga,
na tanri paa mbele pe woro Zhufuye pe yɛn,
mɛɛ si tanga paa Zhufuye woo yɛn.
Mɛlɛ mɛɛ tagafɛnnɛ mbele pe woro Zhufuye pe jori paa tanri paa Zhufuye pe yɛn?»
Zhufuye poro naa mbele pe woro Zhufuye pe yɛn na shoo tagawa po fanŋga na
15 Woro wo na,
we yɛn Zhufuye piseele.
We woro kapere pyefɛnnɛ paa tara sannda ti woolo pe yɛn.
16 Konaa ki ni fuun,
wège jɛn ma yo lere wi ma pye lesinŋɛ Yɛnŋɛlɛ li yɛgɛ na,
naa wì taga Zhezu Kirisi wi na ko kala na.
Ɛɛn fɔ,
wìla pye lesinŋɛ,
naa wila tanri na yala Moyisi lasiri wi ni ko kala na.
Ko kì ti woro fun,
wè taga Zhezu Kirisi wi na,
jaŋgo we ta we pye lesinmbele Yɛnŋɛlɛ li yɛgɛ na,
naa wè taga Kirisi wi na ki kala na,
kiga ka pye lasiri ŋa waa tanri wi na wo kala na,
katugu lere se pye lesinŋɛ Yɛnŋɛlɛ li yɛgɛ na,
naa wì tanga ŋga lasiri wì yo ki na ko kala na.
17 Ɛɛn fɔ,
na kaa pye we yɛn naga lagajaa mbe pye lesinmbele Yɛnŋɛlɛ li yɛgɛ na Zhezu wi fanŋga na,
kona,
woro fun pè we yan kapege pyefɛnnɛ paa mbele pe woro Zhufuye pe yɛn.
Ko mbe ya mbege naga mbe yo Kirisi wi yɛn na kotogo kaan we yeri waa kapere piin le?
Ayoo,
ki woro ma.
18 Kagala ŋgele mìla je ke na,
na mi ka sɔngɔrɔ mbaa ke gbegele naa fɔnŋgɔ,
kona,
mila na yɛɛ nari fɔ mi yɛn lasiri wi jɔgɔfɔ;
19 katugu lasiri wi kala na,
mi yɛn ndɛɛ mi ku.
Lasiri wo jate wìlan kan mì ku.
Ko pye ma,
jaŋgo mbe ta mbaa na yinwege ki piin Yɛnŋɛlɛ li kan.
Mi yɛn ndɛɛ pànla kan wa tiparaga ki na Kirisi wi ni.
20 Kì pye ma,
mi ma mi yɛn yinwege na naa,
ɛɛn fɔ,
Kirisi wo wi yɛn yinwege na wa na ni.
Yinwege ŋga mi yɛn na piin laga tara ti na yiŋgɔ,
mi yɛn naga piin tagawa mba mì taga Yɛnŋɛlɛ li Pinambyɔ wi na po fanŋga na,
mi yɛn maa ndanla,
a wùu yɛɛ kan kunwɔ pi yeri na kala na.
21 Mi woro na jege Yɛnŋɛlɛ li yinmɛ pi na;
katugu na kaa pye lere wi ma pye lesinŋɛ Yɛnŋɛlɛ li yɛgɛ na,
naa wila tanri lasiri wi na ko kala na,
kona Kirisi wì ku jaga.