Yɛrɛwɛ sɛnrɛ puŋgo woro konaa sharaga
13
1 Na karisaga taanri wogo koyi ŋga mila kee ki na wa ye yeri.
«Kala li ni fuun li yaa yɛgɛ wɔ mbe yala sɛrɛfɛnnɛ shyɛn,
nakoma sɛrɛfɛnnɛ taanri yɔn sɛnrɛ ni»
paa yɛgɛ ŋga na Yɛnŋɛlɛ sɛnrɛ sɛwɛ wi yɛn naga yuun we.
2 Mbele pè kapere pye makɔ,
mi yɛn na pe yɛrɛgi naa leele sanmbala pe ni fuun pe ni.
Na karisaga shyɛn wogo ki na wa ye yeri,
mìla ki wogo ki yo makɔ,
mi nɛɛ pe yɛrɛgi naa yiŋgɔ maga ta mi woro wa pe ni,
fɔ:
Na mi ka sɔngɔrɔ wa ye yeri naa sanga ŋa ni,
mi se wa yaga mbajɔlɔwɔ;
3 katugu ye yɛn na jaa mbege jɛn,
na kaa pye Kirisi wi yɛn na para wa na yɔn,
ye yaa sigi jɛn.
Kirisi wi woro fanŋga fu ye kanŋgɔlɔ,
ɛɛn fɔ,
wila wi yawa pi nari wa ye sɔgɔwɔ.
4 Kaselege yi,
pàa wi kan wa tiparaga ki na,
naa wìla pye fanŋga fu ki kala na,
ɛɛn fɔ,
yiŋgɔ,
wi yɛn yinwege na Yɛnŋɛlɛ li yawa pi fanŋga na.
Woro fun we yɛn fanŋga fu fɛnnɛ wa we gbogolomɔ pi ni wi ni.
Ɛɛn fɔ,
wa we kapyege ko ni ye kanŋgɔlɔ,
we yɛn na we yinwege ki piin wi ni Yɛnŋɛlɛ li yawa po fanŋga na.
5 Ye ye yɛɛ taanla ye wele wa ye nawa,
ye ye yɛɛ wa ye wele,
na kaa pye ye yɛn wa tagawa konɔ li ni.
Ye sigi jɛn mbe jɛn mbe yo Zhezu Kirisi wi yɛn wa ye nawa?
Fɔ ndɛɛ kana wamawelewe po mbege naga ye na fɔ ye tagawa pi woro jɛmbɛ.
6 Na jigi wi yɛn ki na ma yo ye yaa ki jɛn mbe yo we wamawelewe pìgi naga ma yo we tagawa pi yɛn jɛmbɛ.
7 We yɛn na Yɛnŋɛlɛ li yɛnri fɔ yaga ka kapege ka kpɛ pye.
Ko woro mbe ka yo we yɛn na jaa mbege naga mbe yo wè mɛgɛ ta,
ɛɛn fɔ,
jaŋgo yaa kajɛŋgɛ piin,
ali na kaa pye we wamawelewe pìgi naga ma yo we tagawa pi woro jɛmbɛ.
8 Katugu yawa kpɛ woro we ni waa wiin Yɛnŋɛlɛ li kaselege ki ni,
yawa pi yɛn we ni mbaa tunŋgo piin kaselege ko ni.
9 Na waga pye fanŋga fu fɛnnɛ mbe sigi ta fanŋga yɛn yoro ni,
we maa yɔgɔri.
Ŋga we yɛn na yɛnri Yɛnŋɛlɛ li yeri,
ko yɛn fɔ yeli nandanwa kala li pye yeli yɔn fili.
10 Ko kì ti mìgi sɛwɛ ŋa wi yɔnlɔgɔ yɛɛn,
maa torogo ye kan maga ta mì lali ye ni,
jaŋgo na mi ka gbɔn wa sanga ŋa ni,
mi ka kaga ŋgban ye na wa na kagala yɛgɛ wɔwɔ pi ni,
mbe yala we Fɔ wì fanŋga ŋga kan na yeri ki ni.
Ki fanŋga ki kango ko yɛn mbe ye kan yaa kee yɛgɛ wa tagawa pi ni,
kii kan mbe ye jɔgɔ.
11 Kì pye ma,
sefɛnnɛ,
ye pye nayinmɛ na yiŋgɔ!
Ye ye yɛɛ gbegele ye sin ye yɔn fili,
yaa ye yɛɛ kotogo sogo,
ye ye yɔn ki wa nuŋgba,
yaa ye yinwege ki piin yɛyinŋge ni.
Kiga pye ma,
Yɛnŋɛlɛ na li yɛn ndanlawa naa yɛyinŋgefɔ,
li yaa pye ye ni.
12 Yaa ye yɛɛ shari yaa kɛyɛn waa ye yɛɛ yɔlɔgɔ ndanlawa ni.
Yɛnŋɛlɛ li leele kpoyi pe ni fuun pè ye shari.
13 We Fɔ Zhezu Kirisi wi yinmɛ po naa Yɛnŋɛlɛ li ndanlawa pi ni,
naa Yinnɛkpoyi li gbogolomɔ pi pye ye ni fuun ye ni.