PƆLI WILA PARA MBEGE NAGA FƆ WI YƐN PITUNŊƆ KASELEGE NA
10–13
Pɔli wila para wi tunŋgo ki sɛnrɛ na
10
1 Mi Pɔli,
mi jate,
mi yɛn na ye yɛnri Kirisi wi nandanwa naa wi kajɛŋgɛ pyege ki kala na.
Mi ŋa pe yɛn naga yuun ma yo fɔ:
Na mi ka pye wa ye ni,
mi mala yɛɛ tirige,
ɛɛn fɔ,
na mi woro wa ye ni sanga ŋa ni,
mi maa sɛnŋgbanra yuun ye kanŋgɔlɔ we.
2 Mila ye yɛnri,
yaga kanla kan mbaa sɛnŋgbanra yuun ye ni,
na mi ka gbɔn wa ye na sanga ŋa ni we;
katugu mbele paa ki jate ma yo we yɛn na tanri na yala leele pe jatere pyelɔmɔ po ni,
mì taga ki na ma yo mi yaa kotogo ta mbe wɛli pe na.
3 Kaselege yi,
we yɛn na we yinwege ki piin laga wire to ni,
ɛɛn fɔ,
we woro na malaga ki gbɔɔn na yala leele pe jatere pyelɔmɔ po ni.
4 Katugu we maliŋgbɔnyaara ti woro paa ki dunruya ŋa wi woro ti yɛn.
Ɛɛn fɔ,
Yɛnŋɛlɛ lo maliŋgbɔnyaara ri,
nda ti yɛn fanŋga ni mbe ya mbe we mbɛnfɔ wi malaga sigeyinrɛ ti jaanri.
We ma sɛnwee piile pe jatere pere ti jɔgɔ.
5 Yaraga ŋga fuun ki ma yiri naga yɛɛ gbogo Yɛnŋɛlɛ li jɛnwɛ pi na,
we maga jan.
We ma sɛnwee jatere wi ni fuun wi jɔgɔ maa pye paa kasopyɔ yɛn,
mboo yɛgɛ sin wi Kirisi wi sɛnrɛ ti lɛ.
6 Woro fun we yɛn ma gbɛgɛlɛ mbe mbele pe woro naa sɛnrɛ ti lee pe le jɔlɔgɔ,
na yoro ka Kirisi wi sɛnrɛ ti lɛ jɛŋgɛ mbe kɔ sanga ŋa ni we.
7 Ye maa yaara ti wele na yala ti yɛgɛ cɛnwɛ po ni.
Ki kala na,
na kaa pye lere wà taga ki na ma yo wi yɛn Kirisi wi woo,
wi jatere pye ki wogo ki na,
wigi jɛn wi yo fɔ wi yɛn Kirisi wi woo yɛgɛ ŋga na,
pa woro fun we yɛn wi woolo ma.
8 Katugu fɛrɛ se ya mbanla yigi,
ali na kaa pye mìlan yɛɛ gbɔgɔ ma toro jɛnri fanŋga ŋga we Fɔ wì kan na yeri ki kala na.
Ki fanŋga ki kango ko yɛn mbe ye kan yaa kee yɛgɛ wa tagawa pi ni,
ɛɛn fɔ,
kii kan mbe ye jɔgɔ.
9 Mi woro na jaa mbege naga fɔ mi yɛn na ye fingiri na sɛwɛɛlɛ pe ni.
10 Katugu pele ma yo na sɛwɛɛlɛ pe sɛnrɛ ti yɛn ma ŋgban ma pye fanŋga ni,
ɛɛn fɔ,
na mi jate ka pye wa ye sɔgɔwɔ,
mi ma pye fanŋga fu,
na sɛnrɛ tila pye fanŋga ni.
11 Ki leele pege jɛn pe yo fɔ we sɛnrɛ ti yɛn wa we sɛwɛɛlɛ pe ni yɛgɛ ŋga na,
mbege ta we woro wa ye sɔgɔwɔ,
pa we kapyege ki yaa pye ma fun,
na waga pye wa sanga ŋa ni we.
12 Mbele pe yɛn na pe yɛɛ mɛtanga yinri,
we se soro mbe we yɛɛ yala pe ni,
nakoma mbaa we yɛɛ taanla pe ni.
Pe maa pe yɛɛ taanla pe yɛɛ ni,
na pe yɛɛ yala pe yɛɛ ni.
Ki kala na,
tijinliwɛ woro pe ni.
13 Woro wo na,
we se we yɛɛ gbɔgɔ sa toro we kɔnlɔ li na,
ɛɛn fɔ,
kɔnlɔ na Yɛnŋɛlɛ lì gbɔn we kan ma we pye,
a wè gbɔn fɔ laga ye na,
we yaa la we yɛɛ gbogo mbaa yala lo ni.
14 Ndɛɛ ki pye wee ja kari wa ye yeri,
we jɛn na toro we kɔnlɔ li na,
ɛɛn fɔ,
we se toro li na,
katugu wè gbɔn fɔ laga ye na,
ma Sɛntanra nda ti yɛn na para Kirisi wi kanŋgɔlɔ ti yo ma ye kan.
15 Kì pye ma,
kɔnlɔ na lì gbɔn we kan,
we se toro lo na.
Tunŋgo ŋga leele pèle yɛgɛ pye,
we woro na we yɛɛ gbogo ko kala na.
Ɛɛn fɔ,
we jigi wi yɛn ki na fɔ na ka kaa tari ye tagawa pi na,
pa we tunŋgo pyesaga ki yaa gbɔgɔ wa ye sɔgɔwɔ naa mbe wɛ,
mbe yala kɔnlɔ na Yɛnŋɛlɛ lì gbɔn we kan li ni.
16 Kona,
pa we mbe ya mbaa Sɛntanra ti yuun wa tara nda ti yɛn wa ye puŋgo na ti ni mbaa kee.
Ki ka pye ma,
tunŋgo ŋga leele pèle yɛgɛ pye wa pe tunŋgo pyesaga,
we saa we yɛɛ gbogo ko kala na.
17 Konaa ki ni fuun,
ki yɛn paa yɛgɛ ŋga na Yɛnŋɛlɛ sɛnrɛ sɛwɛ wi yɛn naga yuun ma yo fɔ:
«Ŋa kaa jaa mbaa wi yɛɛ gbogo,
wila wi yɛɛ gbogo ŋga we Fɔ wì pye ko kala na.»
18 Katugu ŋa wi maa wi yɛɛ mɛtanga yinri,
wo na mɛtanga ta,
ndɛɛ ŋa we Fɔ wi maa wi mɛtanga yinri wo.