5
1 We wire ti yɛn paa paara yinrɛ yɛn,
nda we yɛn ma cɛn wa ti ni laga tara ti na.
Wège jɛn ma yo na ti ka jɔgɔ,
Yɛnŋɛlɛ lì go kan we yeri wa naayeri,
ŋga lo jate lì kan li yɛ.
Cɛnsaga mbakɔgɔ yi,
leele kɛyɛn ma yigi kan.
2 Ma we ta laga ki paara yinrɛ nda ti ni,
we yɛn na jɛɛn,
katugu we yɛn naga jaa ŋgbanga mbe ye wa ki naayeri go ki ni,
paa yɛgɛ ŋga na lere ma kaa derege le wi yɛɛ na we.
3 Na waga ki le we yɛɛ na,
pa we se koro wire fu.
4 Ee,
mbe we ta laga ki paara yinrɛ nda ti ni,
we maa jɛɛn ndɛɛ we tugugbɔrɔ tugo.
Kii cɛn ndɛɛ waa jaa mbe wire nda ti yɛn we na laga tara na ti wɔ we yɛɛ na,
ɛɛn fɔ,
waa jaa mbe naayeri wire ti le we yɛɛ na,
jaŋgo wire nda ti yɛn kuworo ti kanŋga ti yinwege mbakɔgɔ ta.
5 Yɛnŋɛlɛ lo lì we gbegele ki wogo ŋga ki mɛgɛ ni,
mɛɛ Yinnɛkpoyi li kan we yeri li pye yarijɛndɛ nda lì tɛgɛ we kan ti yaraga koŋgbanŋga.
6 Ki kala na,
wè kotogo ta sanga pyew.
Wège jɛn ma yo mbe we ta laga ki wire nda ti ni,
we yɛn ma lali we Fɔ wi cɛnsaga ki ni.
7 We maa tanri tagawa po fanŋga na,
yaraga ka yanga fanŋga ma.
8 Wè kotogo ta jɛŋgɛ,
ki si yɛn ma we ndanla we wɔ laga ki wire nda ti ni we sa cɛn wa we Fɔ wi ni,
pa ko mbe mbɔnrɔ.
9 Ko kì ti we yɛn naga jaa,
mbe we ta laga ki wire nda ti ni o,
mbe we ta we wɔ laga ti ni o,
we kala luu ndanla.
10 Katugu ki daga we ni fuun we yere Kirisi wi yɛgɛ na wa wi kiti kɔnsaga,
jaŋgo lere nuŋgba nuŋgba pyew ŋga wì pye maa ta wi wire ti ni,
kajɛŋgɛ yi o,
kapege yi o,
wi ta wi yala wi kapyege ki ni.
Yɛnŋɛlɛ lì tanwa le dunruya woolo pe ni Kirisi wo fanŋga na
11 Mbaa fyɛ we Fɔ wi yɛgɛ,
wège jɛn,
ko kì ti we yɛn naga jaa mbe leele pe jatere wi kanŋga pe na,
Yɛnŋɛlɛ li yɛn ma we nawa pi jɛn.
Na jigi wi yɛn ki na fun fɔ ye yɛn ma we jɛn wa ye nawa.
12 We woro na we yɛɛ mɛtanga yinri ye kan naa fɔnŋgɔ.
Ɛɛn fɔ,
we yɛn naga jaa mbe pyelɔmɔ kan ye yeri,
ye ta yaa ye yɛɛ gbogo we kala na.
Ki ka pye ma,
mbele paa la pe yɛɛ gbogo sɛnwee wi nawa kagala koro mɛgɛ ni,
fɔ ŋga pe maa yaan ko kala na,
ye ya yaa pe yɔn sogo.
13 Na kaa pye kaselege we yuro tì yiri,
we yɛn ma Yɛnŋɛlɛ lo kan.
Na kaa si pye we jatere wi yɛn ma cɛn we na,
wi yɛn ma cɛn ye yɔnwɔ po kala na.
14 Katugu Kirisi wi ndanlawa pi yɛn na we kaan we bala.
Wège jɛn jɛŋgɛ ma yo lere nuŋgba wì ku leele pe ni fuun pe yɔnlɔ,
ko kɔrɔ wo yɛn fɔ pe ni fuun pè pe tasaga ta wa wi kunwɔ pi ni.
15 Wì ku leele pe ni fuun pe yɔnlɔ,
jaŋgo mbele pe yɛn yinwege na paga kaa pe yinwege ki piin pe yɛɛ kan,
ɛɛn fɔ,
ŋa wì ku ma yɛn ma yiri wa kunwɔ pi ni pe yɔnlɔ,
paa ki piin wo kan.
16 Kì pye ma,
we woro na lere wa jate naa mbe yala leele pe yanlɔmɔ po ni.
Ali na kaa pye faa wàa pye na Kirisi wi jate na yala leele pe yanlɔmɔ po ni,
we woro naa jate ma naa.
17 Na lere wa ka pye nuŋgba Kirisi wi ni,
wi ma kanŋga lere fɔnŋgɔ.
Yarilɛrɛ tì toro makɔ,
wele,
yaara tì kanŋga fɔnndɔ.
18 Ko ki ni fuun ŋga ko yiri Yɛnŋɛlɛ lo yeri.
Lo lì tanwa le we ni Kirisi wi fanŋga na,
ma sigi tunŋgo ki telege we na waa leele pe piin pe tanwa le li ni.
19 Katugu Yɛnŋɛlɛ làa pye na tunŋgo piin Kirisi wo ni mbe tanwa le lo naa leele pe ni fuun pe ni.
Li sila pe kapere ti jate pe go na.
A lì sigi tanwa lege tunŋgo ki kan we yeri waa ki yari.
20 Ko kì ti we yɛn Kirisi wi pitunmbolo fanŋga fɛnnɛ mbaa para wi yɔnlɔ.
Ki cɛn ndɛɛ woro Yɛnŋɛlɛ lì tɛgɛ nali sɛnrɛ ti yuun wa we yɔn,
na leele pe yɛrɛgi.
We yɛn na ye yɛnri Kirisi wi mɛgɛ ki na,
fɔ ye yɛnlɛ ki na yoro naa Yɛnŋɛlɛ li ni ye tanla.
21 Kirisi wìla pye kapege fu,
ɛɛn fɔ,
Yɛnŋɛlɛ lùu pye paa kapere pyefɔ yɛn we kala na,
jaŋgo wa we gbogolomɔ pi ni Kirisi wi ni,
we pye lesinmbele li yɛgɛ na.