SAARA NDA TI WƆ YARISUNNDO YERI TI KARA
8.1–11.1
Yarisunndo kara
8
1 Yiŋgɔ ni,
we para yarisunndo kara wogo ko na.
Ki yɛn kaselege fɔ «kajɛnmɛ pi yɛn we ni fuun we yeri,»
paa yɛgɛ ŋga na ye yɛn naga yuun we.
Ɛɛn fɔ,
kajɛnmɛ pi ma lere wi kan wi maa wi yɛɛ gbogo,
ma si yala,
ndanlawa po maa ka tari leele pe fanŋga ki na wa tagawa pi ni.
2 Na kaa pye lere wa naga jate wi kala jɛn,
wi fa jɛn gbɛn paa yɛgɛ ŋga na wi ja daga mbe kala jɛn we.
3 Ɛɛn fɔ,
Yɛnŋɛlɛ li ka lere ŋa ndanla,
li ma ko fɔ wo jɛn.
4 Ki kala na,
mbe yala ye yewige ŋga yè yewe ki ni,
fɔ:
We daga mbaa yarisunndo kara kaa le?
We ni fuun wège jɛn jɛŋgɛ ma yo yarisunŋgo ki woro yaraga ka laga dunruya wi ni.
Wège jɛn ma yo yɛnŋɛlɛ la yɛgɛ woro wa naa Yɛnŋɛlɛ nuŋgba lo puŋgo na.
5 Ali na kaa pye leele pe maa naayeri yaara nakoma tara na yaara ta yinri yɛnŋɛlɛ,
pa ki si yɛn ma,
katugu leele pe ma yo yɛngɛŋgɛlɛ lɛgɛrɛ wa konaa tafɛnnɛ lɛgɛrɛ ni.
6 Ɛɛn fɔ,
konaa ki ni fuun,
woro wo yeri,
Yɛnŋɛlɛ nuŋgba li yɛn wa,
lo li yɛn we To we.
Lo lì yaraga ki ni fuun ki da.
We yɛn laga lo kala na.
We Fɔ nuŋgba wi yɛn wa,
wo wi yɛn Zhezu Kirisi we.
Yaara ti ni fuun ti yɛn laga wo fanŋga na,
woro fun we yɛn laga wo fanŋga na.
7 Ɛɛn fɔ,
leele pe ni fuun sigi kaselege ki jɛn.
Leele pèle la pye ma tara yarisunndo ti ni fɔ jɛŋgɛ,
ki kala na ali nala pe yɛn naga kara ti kaa nari jate paa yarisunndo kara yɛn.
Pe nawa jatere wi kologo pe na,
a pè pe yɛɛ yan fyɔngɔ ni ki yaakaga ki kala na.
8 Yaakaga ma ki yaa ti wee fulo wa Yɛnŋɛlɛ li tanla.
Na wee ka ka,
ki se yaraga ka kɔn we na.
Na waga si ka ka,
ki se yaraga ka taga we kan.
9 Ye yɛɛ yingiwɛ jɛn,
yaga ka ti yɛyinŋge ŋga yè ta nɛɛ piin ma,
ki mbele pe fanŋga kì kologo wa tagawa pi ni,
wa kan wi to wa kapege ki ni.
10 Katugu mboro ŋa ki «kajɛnmɛ»
pi yɛn ma yeri,
lere ŋa wi fanŋga kì kologo wa tagawa pi ni,
na wa ka sɔɔn yan ma cɛn na nii yarisunŋgo go ka ni,
wii yaa kotogo ta mbaa yarisunndo kara ti kaa wi le?
11 Kiga pye ma,
ki sefɔ ŋa wì fanŋga kì kologo,
wo ŋa Kirisi wì ku wi kala na,
wi yaa puŋgo ma «kajɛnmɛ»
pi kala na.
12 Na ye kaa kapege piin ye sefɛnnɛ pe na ma,
mbaa pe nawa jatere ŋa wì kologo wi jogo,
kona Kirisi wo yaa kapege piin wi na.
13 Ki kala na,
na kaa pye yaakaga ki yaa ti na sefɔ wii to wa kapege ki ni,
pa mi sege kara ta ka naa fyew,
jaŋgo na sefɔ wiga ka to wa kapege ki ni.