ŊGA YƐNŊƐLƐ LI GBƐGƐLƐ IZIRAYƐLI WOOLO PE MƐGƐ NI
9–11
Yɛnŋɛlɛ lo naa leele mbele lì wɔ
9
1 Kaselege ko mila yuun,
mi yɛn Kirisi wi woo,
mi woro na finlɛlɛ.
Na nawa jatere wi yɛn naga yuun na kan Yinnɛkpoyi li fanŋga na fɔ kaselege yi:
2 Yɛsanga yɛn na na jɛŋgɛ,
na jatere wi yɛn ma piri na na suyi.
3 Ndɛɛ ki mbe ja ya pye,
mì pye naga jaa mi jate Yɛnŋɛlɛ lilan daŋga lilan laga Kirisi wi na,
na woolo pe ta pe shɔ,
poro pe yɛn na cɛnlɛ woolo wire to na we.
4 Poro pe yɛn Izirayɛli woolo wele.
Yɛnŋɛlɛ lì pe pye li piile ma li gbɔgɔwɔ pi naga pe na.
yɔn finliwɛ le pe ni,
ma li lasiri wi kan pe yeri,
ma li gbɔgɔlɔmɔ tunŋgo ki naga pe na,
ma yɔn fɔgɔlɔ kɔn pe yeri.
5 Poro pe yɛn faa teele pe setirige piile wele,
Kirisi fun wì yiri wa pe ni ma yala wire to ni.
Wo wi yɛn yaraga ki ni fuun ki go na,
ma pye Yɛnŋɛlɛ.
Sɔnmɔ yɛn wi woo fɔ sanga pyew.
Anmiina.
6 Ki woro mbe ka yo fɔ Yɛnŋɛlɛ li sɛnyoro tii ya kala yɔn.
Ɛɛn fɔ,
Izirayɛli setirige piile pe ni fuun woro Izirayɛli woolo piiri.
7 Abirahamu setirige piile pe ni fuun woro Abirahamu wi piile piiri;
katugu Yɛnŋɛlɛ làa ki yo Abirahamu wi kan ma yo fɔ:
Pa ma setirige piile pe yaa ka yiri wa Izaki wo ni.
8 Ko kɔrɔ wo yɛn fɔ:
Piile mbele pè se ma yala sɛnwee selɔmɔ pi ni,
poro woro na jate Yɛnŋɛlɛ li piile.
Ɛɛn fɔ,
mbele pè se ma yala Yɛnŋɛlɛ làa yɔn fɔlɔ na kɔn li ni,
poro pe yɛn na jate Abirahamu wi setirige piile wele.
9 Yɔn fɔlɔ na Yɛnŋɛlɛ làa kɔn li sɛnrɛ ti nda fɔ:
«Yelapanna anmɛ yɛgɛ,
mi yaa sɔngɔrɔ mbe pan laga,
pa ki yaa yala Sara wì pinambyɔ se.»
10 Ko nuŋgba ma,
pa Erebeka wogo kìla pye ma fun.
Wi pinambiile shyɛn wele,
pe to wìla pye nuŋgba,
wo wi yɛn we tɛlɛ Izaki we.
11-12 Ma si yala,
pe sila pe se gbɛn,
pee ka kajɛŋgɛ nakoma kapege pye,
a Yɛnŋɛlɛ lì si Erebeka wi pye fɔ:
«Ndɔfɔ wi yaa ka pye jɔnlɔfɔ wi kulo.»
Ko la pye ma,
jaŋgo Yɛnŋɛlɛ li kakɔnndɛgɛlɛ li koro wa,
mbe yala li lere wɔmɔ pi ni.
Kii pye mbe yala leele pe kapyere to ni,
ɛɛn fɔ,
kì pye ma yala ŋa wi ma leele pe yeri wo nandanwa kala lo ni.
13 Paa yɛgɛ ŋga na Yɛnŋɛlɛ sɛnrɛ sɛwɛ wi yɛn naga yuun ma yo fɔ:
Zhakɔbu wo yɛn mala ndanla,
a mì je Ezawu wo na.
14 We yaa yo mɛlɛ san?
Yɛnŋɛlɛ li yɛn ma kolo le?
Ayoo dɛ.
15 Katugu làa ki yo ma Moyisi kan ma yo fɔ:
«Mi yaa lere ŋa yinriwɛ ta,
mi yaa wo yinriwɛ ta.
Lere ŋa yuŋgbɔgɔrɔ yaa pye na na,
wo yuŋgbɔgɔrɔ yaa pye na na.»
16 Ki kala na,
ki wogo kila la piin mbaa yala sɛnwee wi nandanwa kala lo ni,
nakoma kapyere nda wi maa ŋgbanga na piin to ni.
Ɛɛn fɔ,
ki maa piin na yala Yɛnŋɛlɛ na li maa leele yinriwɛ taa lo nandanwa kala lo ni.
17 Wa Yɛnŋɛlɛ sɛnrɛ sɛwɛ wi ni,
Yɛnŋɛlɛ lìgi yo Ezhipiti tara wunlunaŋa Farawɔn wi kan ma yo fɔ:
«Mìgi siligi mɔɔ tɛgɛ wunluwɔ,
jaŋgo mbanla yawa pi naga ma kala na,
mbanla mɛgɛ ki pye ki yiri laga tara ti ni fuun ti ni.»
18 Ki kala na,
Yɛnŋɛlɛ li kaa jaa mbe ŋa yinriwɛ ta,
li ma po ta.
Li kaa jaa mbe ŋa kotogo ŋgban,
li ma ko ŋgban.
19 Kana wa yaa na pye mbe yo fɔ:
«Na kì kaa pye ma,
yiŋgi na Yɛnŋɛlɛ li nɛɛ leele pe kajɔgɔrɔ ti nari pe na naa?
Ambɔ wi mbe ya je li nandanwa kala li na?»
20 Mboro sɛnwee pyɔ,
ma yɛn ambɔ mbe sila kendige woo Yɛnŋɛlɛ li ni?
«Cɔgɔ ki maga fanrifɔ wi yewe mbe yo fɔ:
Yiŋgi na,
a mà silan fanri yɛɛn le?»
21 Cɔgɔ fanrifɔ wi mbe ya mbe ŋga wila jaa mbe pye joro ti ni ki pye ti ni.
Joro nda pè sun tì yigi,
wa ti nuŋgba ti ni,
wi mbe ya mbe cɔgɔ ka fanri ki pye leele gbɔgɔ wogo.
Wi mbe si ya mbe cɔgɔ ka fanri paa gbegele ko ni pilige pyew.
22 Pa Yɛnŋɛlɛ li wogo ki yɛn ma fun.
Li yɛn na jaa mbeli naŋgbanwa pi naga,
mbeli yawa pi pye mboo naga poo jɛn.
Ko kala kì ti mbele paa daga li naŋgbanwa pi ni,
ma gbɛgɛlɛ ma cɛn li pe jɔgɔ,
lì pe kala li kun yɛɛ ni jɛŋgɛ.
23 Li yɛn na jaa fun,
mbele li yɛn na pe yinriwɛ taa,
mbeli gbɔgɔwɔ mba pi se jɛn mbe kɔ pi pye mboo naga pe na,
poro mbele lì gbegele faa peli gbɔgɔwɔ pi ta we.
24 Katugu woro we yɛn mbele lì yeri we pye li piile we.
Lii we yeri ma yiri wa Zhufuye poro sɔgɔwɔ cɛ.
Ɛɛn fɔ,
lì we yeri fun ma yiri wa cɛngɛlɛ sanŋgala ke sɔgɔwɔ.
25 Ko Yɛnŋɛlɛ lì yo wa Yɛnŋɛlɛ yɔn sɛnrɛ yofɔ Oze sɛwɛ wi ni ma yo fɔ:
Mbele pe sila pye na woolo,
mi yaa kaa pe yinri na woolo.
Cɛnlɛ woolo mbele pe sila pye mala ndanla,
mi yaa kaa pe yinri na lendanlambala jɛmbɛlɛ.
26 Kìla yo pe kan laga ŋga na ma yo fɔ:
Ye woro na woolo,
wa ki laga nuŋgba ki ni,
pe yaa kaa pe yinri Yɛnŋɛlɛ na yinwege wolo li piile.
27 Ezayi wo na,
wìla gbele ŋgbanga Izirayɛli woolo pe kala na,
ma yo fɔ:
Ali na Izirayɛli woolo paga lɛgɛ paa kɔgɔje yɔn taambugɔ ki yɛn,
pe jɛnri pe yaa ka shɔ cɛ;
28 katugu sɛnrɛ nda we wì yo,
wi yaa ki kala li pye mbeli yɔn fili pew laga tara ti na fyɛlɛgɛ na.
29 Ki yɛn paa yɛgɛ ŋga na Ezayi wìla keli maga yo faa ma yo fɔ:
Ndɛɛ ki pye we Fɔ ŋa yawa pi ni fuun fɔ,
wi sila we setirige piile pele yaga paa si yɛn,
anmɛ we tɔngɔ paa Sodɔmu ca ki yɛn,
anmɛ we pye paa Gomɔri ca ki yɛn.
Izirayɛli naa Zhezu Sɛntanra wogo ye
30 We yaa yo mɛlɛ san?
Fɔ cɛngɛlɛ sanŋgala ŋgele ke woolo pe sila pye naga lagajaa mbe pye lesinmbele Yɛnŋɛlɛ li yɛgɛ na,
pè pye lesinmbele li yɛgɛ na,
naa pè taga Kirisi wi na we.
31 Ma si yala,
Izirayɛli woolo mbele pàa pye naga lagajaa mbaa lasiri wi gbogo mbe ta mbe pye lesinmbele Yɛnŋɛlɛ li yɛgɛ na,
pee ya mboo tanga mboo yɔn fili.
32 Yiŋgi na?
Katugu pe sila pye naga jaa mbe pye lesinmbele Yɛnŋɛlɛ li yɛgɛ na tagawa po fanŋga na,
ɛɛn fɔ,
pàa pye naga jaa pe kapyere to fanŋga na.
A pè si kurugo sinndɛlɛgɛ ŋga ki maa leele kaan pe maa kunrugu ki na.
33 Ko Yɛnŋɛlɛ sɛnrɛ sɛwɛ wi yɛn na para ki sɛnrɛ na ma yo fɔ:
Ye wele,
sinndɛlɛgɛ ŋga ki maa leele kaan pe maa kunrugu,
mi yɛn na ka teri wa Siyɔn ca,
konaa walaga ni,
ŋga ki maa leele jaanri.
Ɛɛn fɔ,
lere ŋa ka taga ki na,
wi se fɛrɛ shɔ fyew.