YINWEFƆNŊGƆ KI MA TA KIRISI WO FANŊGA NA
5–8
We yɛn yɛyinŋge na Yɛnŋɛlɛ li ni
5
1 Kì pye ma,
Yɛnŋɛlɛ lì we pye lesinmbele li yɛɛ yɛgɛ na,
naa wè taga Zhezu wi na ki kala na.
Yiŋgɔ we yɛn yɛyinŋge na li ni we Fɔ Zhezu Kirisi wi fanŋga na.
2 Zhezu wi fanŋga na,
naa wè taga wi na ki kala na,
wè ya ma fulo Yɛnŋɛlɛ li yinmɛ pi tanla,
po mba we yɛn wa pi ni yiŋgɔ we.
Ŋga ki yɛn na nayinmɛ kaan we yeri,
ko ki yɛn jigi ŋa wè ta mbe we tasaga ta wa Yɛnŋɛlɛ li gbɔgɔwɔ pi ni we.
3 Ko nuŋgba ma,
ɛɛn fɔ,
we yɛn na yɔgɔri yɛrɛ wa we jɔlɔgɔ kagala ke ni;
katugu wège jɛn ma yo jɔlɔgɔ ki ma lere wi kan wi maa kala kunni wi yɛɛ ni.
4 Mbe kala kun yɛɛ ni,
ko ma lere wi kan wi ma fanŋga ta wamawelewe pi na,
wamawelewe po ma jigi tagasaga kan lere wi yeri.
5 Ki jigi tagasaga kila lere puŋgo,
katugu Yɛnŋɛlɛ lìli ndanlawa pi le wa we kotoro na Yinnɛkpoyi na lì kan we yeri lo fanŋga na.
6 Sanga ŋa ni wàa pye fanŋga fu,
a Kirisi wì si ku lepeele pe kan,
wagati ŋa Yɛnŋɛlɛ làa kɔn wi ni.
7 Ki yɛn ma ŋgban wa mbe yɛnlɛ wi ku lesinŋɛ kala na.
Kana lere wa mbe kotogo ta mbe ku lejɛnŋɛ wa kala na.
8 Ɛɛn fɔ,
we yɛn ma Yɛnŋɛlɛ li ndanla yɛgɛ ŋga na,
pa lìgi naga we na yɛɛn we,
naa wàa pye kapere pyefɛnnɛ bere,
a Kirisi wì ku we kan.
9 Wi kasanwa pi fanŋga na,
wè pye lesinmbele li yɛgɛ na.
Kì pye ma,
wi yaa ka we shɔ Yɛnŋɛlɛ li naŋgbanwa pi ni.
10 Wàa pye Yɛnŋɛlɛ li juguye,
ɛɛn fɔ,
lì tanwa ja we ni li Pinambyɔ wi kunwɔ pi fanŋga na.
Lì kaa tanwa le we ni makɔ,
we yaa shɔ kaselege li Pinambyɔ wi yinwege ki fanŋga na.
11 Ko nuŋgba ma,
ɛɛn fɔ,
we yɛn na yɔgɔri jɛŋgɛ mbe we ta Yɛnŋɛlɛ li ni,
we Fɔ Zhezu Kirisi wi fanŋga na.
Wo wì we kan,
a wè tanwa ta Yɛnŋɛlɛ li ni yiŋgɔ.
Adama naa Kirisi pe kapyege kì gbɔn lelɛgɛrɛ na
12 Kapege kì ye laga dunruya wi ni lere nuŋgba kala na,
wowi ŋa Adama we.
A kapege kì si pan kunwɔ pi ni.
Kì pye ma,
kunwɔ pì gbɔn leele pe ni fuun pe na,
katugu pe ni fuun pè kapege pye.
13 Sanga ŋa ni Yɛnŋɛlɛ li fa lasiri wi kan Moyisi wi yeri,
kapege kìla pye laga dunruya wi ni makɔ,
ɛɛn fɔ,
naa lasiri wi sila pye laga gbɛn,
ki kala na,
Yɛnŋɛlɛ li sila pye na kapege ki jate.
14 Ma si yala,
maga lɛ wa Adama wagati wi na ma pan ma gbɔn Moyisi wagati wi na,
kunwɔ pì fanŋga ta leele pe na,
ali mbele pe sila kapege pye paa Adama wi yɛn,
wo ŋa wìla Yɛnŋɛlɛ li sɛnyoro ti kɛ we.
Ŋa wi mbaa pan,
Adama wo wìla pye wi yanlɛɛ we.
15 Ɛɛn fɔ,
Adama wi kajɔɔgɔ ko se ya taanla yarikanga ŋga Yɛnŋɛlɛ li ma kan waga ko ni.
Ki yɛn kaselege fɔ lelɛgɛrɛ ku ki lere nuŋgba wi kajɔɔgɔ ki kala na.
Ɛɛn fɔ,
Yɛnŋɛlɛ li yinmɛ pì gbɔgɔ ma wɛ,
yarikanga ŋga lì kan waga lelɛgɛrɛ yeri lere nuŋgba fanŋga na,
wo ŋa wi yɛn Zhezu Kirisi we,
ki yɛn kagbɔgɔ naa ma wɛ.
16 Yɛnŋɛlɛ li yarikanga ki tulugo ki yɛn ki yɛ ki lere nuŋgba wi kapege ki ni.
Ki lere nuŋgba wi kapege ko kìgi kan kiti to leele pe na,
ma jɔlɔgɔ kan pe yeri.
Ma si yala,
kajɔgɔrɔ lɛgɛrɛ pyeŋgɔlɔ,
yarikanga ŋga Yɛnŋɛlɛ lì kan waga,
kì leele pe kan pe pye lesinmbele Yɛnŋɛlɛ li yɛgɛ na.
17 Ki yɛn kaselege fɔ lere nuŋgba kapege ko kì ti kunwɔ pì fanŋga ta leele pe na ki lere nuŋgba wi kala na.
Ɛɛn fɔ,
Zhezu Kirisi nuŋgba wi fanŋga na,
wè yarilɛgɛrɛ ta tiyɔngɔ.
Mbele fuun paa Yɛnŋɛlɛ li yinmɛ gbɔɔ pi taa,
naa li yarikanga ŋga ki yɛn kasinŋge wogo ki ni,
pe yaa ka yinwege ta mbaa wunluwɔ piin Kirisi wi kala na.
18 Kì pye ma,
yɛgɛ ŋga na Adama nuŋgba wi kajɔɔgɔ kì leele pe ni fuun pe pye ma pe le jɔlɔgɔ,
ki pyelɔmɔ nuŋgba pi na,
Zhezu Kirisi nuŋgba wi kasinŋge kì leele pe ni fuun pe shɔ Yɛnŋɛlɛ li kiti kɔngɔ ki ni,
ma yinwege kan pe yeri.
19 Yɛgɛ ŋga na lere nuŋgba wìla Yɛnŋɛlɛ li sɛnrɛ ti kɛ,
a kì lelɛgɛrɛ pye kapere pyefɛnnɛ,
ki pyelɔmɔ nuŋgba pi na,
lere nuŋgba wi sɛnrɛ logowo pi kala na,
lelɛgɛrɛ yaa pye lesinmbele Yɛnŋɛlɛ li yɛgɛ na.
20 Lasiri pàa wi kan jaŋgo leele pege jɛn fɔ kajɔgɔrɔ ti yɛn na lege.
Ɛɛn fɔ,
kapere tì lɛgɛ laga ŋga na,
Yɛnŋɛlɛ li yinmɛ pì gbɔgɔ wama naa jɛŋgɛ ma wɛ.
21 Kì pye ma,
yɛgɛ ŋga na kapege kì fanŋga ta kunwɔ pi kala na,
ki pyelɔmɔ nuŋgba pi na,
Yɛnŋɛlɛ li yinmɛ pì fanŋga ta kasinŋge ki kala na mbe yinwege mbakɔgɔ kan we yeri,
we Fɔ Zhezu Kirisi wi fanŋga na.