Ŋga kìla pye Pɔli wi na wa Maliti lɔgɔ fugo tara ti ni
28
1 Naa wàa kaa shɔ ma kɔ,
a wè sigi logo ma yo ki lɔgɔ fugo pege yinri Maliti.
2 Ki tara ti woolo,
kajɛŋgɛ ŋga pàa pye ma we kan,
ki si tawa si tanla.
Pàa kasɔn gbɔgɔ ka gbɛri ma we ni fuun we yeri,
a wè pan wa ki tanla,
katugu tisaga la pye na paan,
a were tila kuun fɔ jɛŋgɛ.
3 A Pɔli wì si saa yimbire wulo nari waa wa kasɔn,
a mɛrɛgɛ kà si yiri wa ti ni kasɔn tufunwɔ pi na,
mɛɛ wi nɔ ma yanra wi kɛɛ ki na.
4 Naa lɔgɔ fugo tara woolo pàa kaa wɔɔgɔ ki yan kila yɔlɔ Pɔli wi kɛɛ ki na,
a pe nɛɛ pe yɛɛ piin fɔ:
«Kaselege ko na,
ki naŋa ŋa legbolere wi;
katugu ali maga ta wì shɔ ma yiri wa kɔgɔje wi ni,
Yɛnŋɛlɛ na pe yinri kasinŋge lii yɛnlɛ mboo yaga yinwege na.»
5 Ɛɛn fɔ,
a Pɔli wì suu kɛɛ ki yangara,
a wɔɔgɔ kì si to wa kasɔn,
yaraga kpɛ sila Pɔli wi ta.
6 Ki leele pàa pye na Pɔli wi wele mboo yan wi fɛ,
nakoma wi to wi ku le ki yɔngɔlɔ nuŋgba ke ni.
Ɛɛn fɔ,
naa pàa kaa ki yan kì mɔ,
kapege suu ta,
a pè si pe jatere wi kanŋga ma yo fɔ yarisunŋgo kayi.
7 Naŋa ŋa pàa pye na yinri Pubiliyusi,
lɔgɔ fugo tara ti legbɔɔ we,
wi kɛɛrɛ tìla pye ma yɔngɔ wa ki laga ki tanla.
A wo si we yigi jɛŋgɛ paa wi wɛnnɛ yɛn.
A wè piliye taanri pye wa wi go.
8 Pubiliyusi wi to wìla pye ma sinlɛ,
katugu witiwɛrɛwɛ naa tɔgɔtɔgɔni la pye wi na.
A Pɔli wì si saa wi yan,
ma Yɛnŋɛlɛ yɛnri maa kɛyɛn yi taga wi na,
a wì si sagala.
9 Ko puŋgo na,
a lɔgɔ fugo tara yambala sanmbala pè si pan fun,
a pè sagala.
10 A pè we gbɔgɔ fɔ jɛŋgɛ.
We karisaga,
yaraga ŋga fuun kala làa pye we na,
a pè ki ni fuun ki kan we yeri.
Pɔli wìla gbɔn wa Ɔrɔmu ca
11 Naa yeŋge taanri la kaa toro,
a wè si ye Alɛgizandiri ca tɔnmɔkɔrɔ ka ni mɛɛ kari.
Pàa pye naga tɛgɛrɛ ti yinri «Waanla yɛnŋɛlɛ.»
Pa kìla were sanga wi pye wa.
12 A wè si saa gbɔn wa Sirakusi ca,
ma piliye taanri pye lema.
13 A wè si kaa yiri lema,
nɛɛ tinndi wi tanŋgi na kee ma saa gbɔn wa Eregiyo ca.
Ki goto,
a tifɛlɛgɛ kà sigi lɛ na gbɔɔn ma yiri wa yɔnlɔparawa kalige kɛɛ yeri.
Ki piliye shyɛn wogo ki na,
a wè si gbɔn wa Puzɔli ca.
14 A wè si saa sefɛnnɛ pele yan wa,
a pè we yɛnri ma yo we yapelege nuŋgba pye wa pe ni.
Ko puŋgo na,
a wè si kari wa Ɔrɔmu.
15 Tagafɛnnɛ mbele wa Ɔrɔmu,
a pè si we tinmɛ ta,
mɛɛ pan ma we fili wa Apiyusi janla li ni,
konaa wa Nambanmbala Tugugo Taanri ki ni.
Naa Pɔli wìla kaa pe yan sanga ŋa ni,
a wì si Yɛnŋɛlɛ li shari mɛɛ kotogo ta.
16 Naa wàa ka saa gbɔn wa Ɔrɔmu,
a pè si yɛnlɛ ki na Pɔli wi koro wi yɛ,
wo naa sorodashe nuŋgba ni,
wo la pye na wele wi na.
Pɔli wìla Yɛnŋɛlɛ sɛnrɛ yo wa Ɔrɔmu
17 Naa piliye taanri la kaa toro,
a Pɔli wì si Ɔrɔmu Zhufuye teele pe yeri pe pan wa wi yeri.
Naa pàa kaa pe yɛɛ gbogolo,
a wì si pe pye fɔ:
«Na woolo,
ali maga ta mii kapege pye we tara woolo pe na,
mii si we teele pe kalɛgɛlɛ fun ke jɔgɔ,
pànla yigi wa Zheruzalɛmu,
mala le Ɔrɔmu tara fɛnnɛ pe kɛɛ.
18 A poro na yewe na jaa mbanla wa,
katugu pe sila kapege ka yan mì pye,
ŋga ki mbe ti panla gbo.
19 Ɛɛn fɔ,
Zhufuye pe sila yɛnlɛ ko na,
ko kìlan jori,
a mìgi yɛnri wunlumbolo to wo mbanla kala li gbegele.
Ko woro mbe ka yo fɔ mila jaa mbe baga na cɛnlɛ woolo pe na mbe yo pe kapege pye.
20 Ko kì ti mìgi yɛnri mbe ye yan,
mbe para ye ni;
katugu Izirayɛli tara woolo pè pe jigi wi taga ŋa na,
wo mɛgɛ ki ti pànla pɔ ki jɔrɔgɔ ŋa wi ni.»
21 A pè suu yɔn sogo ma yo fɔ:
«Wee sɛwɛ kpɛ ta ma kanŋgɔlɔ mbe yiri wa Zhude tara.
We woolo wa si si yiri wa mbe pan mbɔɔn sɛnrɛ yo laga,
nakoma mbe yo ma kapege pye.
22 Ɛɛn fɔ,
we yɛn na jaa mbe ŋga maa sɔnri ki logo,
katugu wège jɛn ma yo laga o laga,
ki gbogolomɔ mba ma yɛn pi ni yɛɛn,
leele pe maa kendige woo pi ni.»
23 A pè si pilige ka tɛgɛ,
poro naa Pɔli wi ni.
Naa ki pilige kìla kaa gbɔn,
lelɛgɛrɛ la pan wa laga ŋga Pɔli wìla pye.
Maga lɛ pinliwɛ pi ni fɔ ma saa ki wa yɔnlɔkɔgɔ ki na,
sɛnrɛ yɛgɛ Pɔli wìla pye na yuun pe kan:
Wìla pye na Yɛnŋɛlɛ li wunluwɔ wogo ki yari pe kan,
naga jaa mbe pe jatere wi kanŋga Zhezu wi yeri,
na para pe ni na yinrigi wa Moyisi lasiri sɛwɛɛlɛ poro naa Yɛnŋɛlɛ yɔn sɛnrɛ yofɛnnɛ pe sɛwɛɛlɛ pe ni.
24 Pèle la taga nda Pɔli wìla pye na yuun ti na,
a pèle je pee taga ti na.
25 Naa pe sɛnrɛ tìla kaa yiri ti yɛ ti yɛ,
a pe nɛɛ kee.
Sanni pe sa kari,
a Pɔli wì sigi sɛnrɛ nda ti taga wa cɛ,
ma yo fɔ:
«Sɛnrɛ nda Yinnɛkpoyi làa yo ma ye tɛlɛye pe kan wa Yɛnŋɛlɛ yɔn sɛnrɛ yofɔ Ezayi wi yɔn,
ti yɛn kaselege,
26 fɔ:
Ta kee ma saga yo ki cɛnlɛ woolo mbele pe kan fɔ:
Ye yaa kaa nuru jɛŋgɛ,
ɛɛn fɔ,
ye se kaa ti kɔrɔ jɛnni.
Ye yaa kaa wele jɛŋgɛ,
ɛɛn fɔ,
ye se kaa yaan;
27 katugu ki leele mbele yɛɛn,
pe kotoro tì ŋgban pe na.
Pè pe nuŋgbogolo ke tɔn,
ma pe yɛngɛlɛ ke tɔn,
jaŋgo paga kaa yaan pe yɛngɛlɛ ke ni,
paga kaa nuru pe nuŋgbogolo ke ni,
paga si kaa kagala kɔrɔ jɛnni wa pe kotogo na.
Paga ka ta mbe kanŋga mbe pan
mi Yɛnŋɛlɛ na kɔrɔgɔ mbe ta mbe pe sagala.»
28 A Pɔli wì sho naa fɔ:
«Ki kala na,
ye daga mbege jɛn fɔ shɔwɔ sɛnrɛ nda tì yiri wa Yɛnŋɛlɛ li yeri,
tì torogo mbele pe woro Zhufuye pe kan fun.
Poro wo na,
pe yaa kari logo.»
29 [Naa Pɔli wìla kaa ki sɛnrɛ ti yo ma,
a Zhufuye pe nɛɛ kee na kendige woo pe yɛɛ ni ŋgbanga.]
30 Pɔli wìla yɛgɛlɛ shyɛn poni koro pye wa go ŋga wìla lɛ naga sara ki ni.
Mbele fuun pàa pye na paan naa shari,
wìla pye na pe yaara woo.
31 Wìla pye na Yɛnŋɛlɛ li wunluwɔ wogo ki yuun,
ma kotogo ta na leele pe nari Zhezu Kirisi wi sɛnrɛ ti ni,
lere pyɔ wo sila wi yɛgɛ kɔn.