Zhufuye pàa saa baga Pɔli wi na wa gboforonɛri Felisi wi yɛgɛ sɔgɔwɔ
24
1 Naa piliye kaŋgurugo la kaa toro,
a saraga wɔfɛnnɛ to Ananiyasi wì si gbɔn wa Sesare ca,
wo naa Zhufuye lelɛɛlɛ pele ni,
naa naŋa sɛnnjɛɛn wa ni,
ŋa wìla pye na para na sunlu leele na.
Pàa pye naa yinri Tɛritulusi.
A pè si saa baga Pɔli wi na wa gboforonɛri Felisi wi yeri ma yo wì kapege pye.
2 A pè si Pɔli wi yeri,
a wì pan.
A Tɛritulusi wi nɛɛ baga wi na na yuun fɔ:
«Legbɔɔ Felisi,
we yɛn yɛyinŋge gbɔgɔ ŋga na,
pa kì yiri mboro yeri.
Ma kagala gbegewe pì we tara ti kanŋga fɔ jɛŋgɛ.
3 Kì tanla we ni fuun we ni.
A waa ma shari lagapyew ki kagala ke kala na.
4 Ɛɛn fɔ,
mi woro na jaa mbɔɔn te naa mbe kari yɛgɛ,
ki kala na,
mila ma yɛnri ma kagbaraga pyege ki kala na,
ma logo we yeri jɛnri.
5 Wège yan ki naŋa ŋa,
wi yɛn na we jɔlɔ ndɛɛ tifɛlɛgɛ yama ye we sɔgɔwɔ.
Wi yɛn na Zhufuye mbele dunruya wi lagapyew pe pinri.
Wo wi yɛn Nazarɛti ca fɛnnɛ gbogolomɔ pi to.
6 Wì yɛrɛ la pye na jaa mbe shɛrigo gbɔgɔ ki tɛgɛ fyɔngɔ ni fun.
Kì pye ma,
a wè suu yigi.
[Wàa pye na jaa mbe kiti kɔn wi na mbe yala we lasiri wo ni.
7 Ɛɛn fɔ,
sorodasheele togbɔɔ Lisiyasi wì si pan maa shɔ we yeri fanŋga gbɔgɔ ni,
8 mɛɛ konɔ kan mbele pè baga wi na pe yeri pe pan laga ma yɛgɛ sɔgɔwɔ.]
Na maga ki naŋa ŋa wi yewe,
kagala ŋgele wè yo wì pye,
pa ma yaa ke kaselege jɛn.»
9 Pè baga wi na kagala ŋgele na,
a Zhufuye pè yɛnlɛ ki na ma yo pa ke yɛn ma.
Pɔli wìla para mboo yɛɛ shɔ Felisi wi yɛgɛ na
10 Kona,
a gboforonɛri wì si sɛnrɛ ti kan Pɔli wi yeri.
A Pɔli wì si sɛnrɛ ti lɛ ma sho fɔ:
«Mìgi jɛn ma yo maga lɛ wa yɛgɛlɛ lɛgɛrɛ ni ma yɛn ki tara nda ti kiti kɔnfɔ.
Ki kala na,
na jigi wi yɛn ma cɛn mbe para mbanla yɛɛ shɔ ma yɛgɛ sɔgɔwɔ.
11 Mboro jate ma mbe ya mbege yewe mbege jɛn jɛŋgɛ,
fɔ ki fa toro pilige kɛ ma yiri shyɛn na,
naa mì kari wa Zheruzalɛmu mbe sa Yɛnŋɛlɛ gbɔgɔ we.
12 Pee na yan mila kendige woo lere kpɛ ni,
mbanla yan mila janwa wi sunnu naa waa wa shɛrigo gbɔgɔ ki ni,
nakoma wa shɛriyinrɛ ti ni,
kana laga ka na wa ca nawa.
13 Ki leele mbele paa baga na na kagala ŋgele na yiŋgɔ,
pe se ya mbege naga ma na mbe yo ke yɛn kaselege.
14 Ma si yala,
mi yɛn naga yuun naga finligi ma yɛgɛ na fɔ:
Zhezu konɔ na pe yɛn na yuun ma yo li woro kaselege,
mi yɛn na tunŋgo piin we tɛlɛye Yɛnŋɛlɛ li kan na yala lo ni.
Ɛɛn fɔ,
nda fuun ti yɛn ma yɔnlɔgɔ wa lasiri sɛwɛɛlɛ poro naa Yɛnŋɛlɛ yɔn sɛnrɛ yofɛnnɛ pe sɛwɛɛlɛ pe ni,
mì taga ti na.
15 Na jigi wi yɛn ma taga Yɛnŋɛlɛ li na,
paa yɛgɛ ŋga na poro fun pe woo wi yɛn ma taga li na we,
fɔ kuulo pe ni fuun,
lesinmbele naa kapere pyefɛnnɛ,
pe yaa ka yɛn mbe yiri wa kunwɔ pi ni.
16 Ko kì ti mi fun,
mila ki ŋgbanga na nawa jatere wi koro jɛnŋɛ na na pilige pyew Yɛnŋɛlɛ lo naa leele pe ni fuun pe yɛgɛ na.
17 «Naa yɛgɛlɛ kele la kaa toro mala ta mi woro laga Zheruzalɛmu,
a mì si kaa sɔngɔrɔ ma pan penjara ni mbanla cɛnlɛ woolo pe saga,
mbe saara wɔ Yɛnŋɛlɛ li yeri.
18 A pè si saa na ta wa shɛrigo gbɔgɔ ki ni mìlan yɛɛ pye kpoyi Yɛnŋɛlɛ li yɛgɛ na.
Janwa sila pye wa na ni,
tinmɛ sila si yiri.
19 Ɛɛn fɔ,
Azi kinda Zhufuye pèle la pye wa.
Poro pe ja daga mbe pan laga,
na kaa pye kala la yɛn pe yeri pe baga na na,
peli yo ma yɛgɛ na.
20 Nakosima,
mìla yere wa kiti kɔnfɛnnɛ ŋgbelege ki yɛgɛ na,
kambasinŋge ŋga mìla pye,
a pè yan,
ki leele mbele laga yɛɛn pege yo.
21 Kaawɔ ki sɛnrɛ nuŋgba nda mìla yere ma yo ŋgbanga pe yɛgɛ na to cɛ,
fɔ:
‹Mì taga kuulo pe yɛnmɛ pi na,
ko kìgi kan kiti yɛn na kɔɔn na na nala laga ye yɛgɛ sɔgɔwɔ.› »
22 Felisi wìla ki Zhezu konɔ li wogo ki jɛn fɔ jɛŋgɛ.
A wì si pe sɔngɔrɔ ma yo puŋgo na sorodasheele togbɔɔ Lisiyasi wiga ka pan,
pa wi yaa pe kala li gbegele.
23 A wì si konɔ kan sorodasheele tojɛɛ wi yeri,
fɔ wi sa Pɔli wi le wa kaso wila wele wi na,
ɛɛn fɔ,
wi tifɛliwaa kan wi yeri jɛnri,
wuu wɛnnɛ pe yaga paa wi kala li yɔngɔ wi kan.
Pɔli wìla para Felisi naa Duruzili ni
24 Naa piliye jɛnri la kaa toro,
a Felisi wì si pan wo naa wi jɔ Duruzili wi ni.
Wo la pye Zhufuye woo.
A Felisi wì si tun,
a pè saa Pɔli wi yeri wi kan ma pan ma tagawa mba pe ma taga Zhezu Kirisi wi na pi sɛnrɛ logo wi yeri.
25 Ɛɛn fɔ,
naa Pɔli wila kaa na para leele pe daga mbe sin wa pe yinwege ki ni yɛgɛ ŋga na,
naa yɛɛ yingiwɛ,
naa Yɛnŋɛlɛ li kiti kɔngɔ ŋga kila paan ti wogo ki na,
a Felisi wì si fyɛ,
ma sho fɔ:
«Ma mbe ya kari yiŋgɔ.
Na mi ka ka wagati ta,
pa mi yaa ma yeri naa.»
26 Wi jigi wìla pye ki na fun ndɛɛ Pɔli wi yaa penjara kan wi yeri.
Ki kala na,
wìla wi yeri yerisaga lɛgɛrɛ na ma pan na baro piin wi ni.
27 Naa Yɛgɛlɛ shyɛn la kaa toro,
kona,
a Pɔrisiyusi Fɛsitusi wì si cɛn wa Felisi wi yɔnlɔ.
Zhufuye pe kandanlaga ko Felisi wìla pye na jaa mbe pye,
a wì si Pɔli wi yaga wa kaso.