Pɔli wìla Yɛnŋɛlɛ sɛnrɛ yo wa Efɛzi ca
19
1 Sanga ŋa ni Apolɔsi wìla pye wa Korɛnti ca,
a Pɔli wì si Azi yanwira tara ti pari ma kari wa Efɛzi.
A wì si saa tagafɛnnɛ pele yan wa.
2 A wì si pe yewe ma yo fɔ:
«Yàa taga Zhezu wi na sanga ŋa ni,
yàa Yinnɛkpoyi li ta le?»
A pè suu yɔn sogo ma yo fɔ:
«We yɛrɛ sigi logo mbe yo Yinnɛkpoyi wa.»
3 Kona,
a Pɔli wì si pe yewe ma yo fɔ:
«Batɛmu wiwiin yàa pye?»
A pè suu yɔn sogo ma yo fɔ:
«Zhan batɛmu wo lawi.»
4 A Pɔli wì si pe pye fɔ:
«Mbele pàa yɛnlɛ ma pe kapere ti jɛn mari yaga,
poro Zhan wìla pye na batize naga yuun Izirayɛli woolo pe kan,
ma yo ŋa wila paan wa wi puŋgo na pe taga wi na,
wo wi yɛn Zhezu we.»
5 Naa pàa kaa ki sɛnrɛ ti logo,
a pè si pe yɛɛ kan,
a pè pe batize we Fɔ Zhezu wi mɛgɛ ki na.
6 A Pɔli wì suu kɛyɛn yi taga pe na,
a Yinnɛkpoyi lì si tigi ma ye pe ni.
A pe nɛɛ yuun sɛnfɔnndɔ ni,
na Yɛnŋɛlɛ li yɔn sɛnrɛ yuun.
7 Ki leele pàa nambala kɛ ma yiri shyɛn yɔn ko tin.
8 Ko puŋgo na,
a Pɔli wì si ye wa shɛrigo ki ni ma kotogo kan na para ma saa gbɔn fɔ yeŋge taanri.
Wìla pye na Yɛnŋɛlɛ li wunluwɔ pi sɛnrɛ yuun pe kan,
naga jaa mbe pe jatere wi kanŋga pe na.
9 Ɛɛn fɔ,
pèle la pe kotoro ti ŋgban pe yɛɛ na,
pe sila yɛnlɛ mbe taga Zhezu wi na,
nɛɛ sɛnpere yuun we Fɔ wi kologo ki na janwa wi yɛgɛ na.
Kona,
a Pɔli wì si laga le pe tanla,
mɛɛ kari tagafɛnnɛ pe ni,
ma saa na pe nari pilige pyew wa naŋa ŋa pàa pye na yinri Tiranusi wi lokɔli.
10 Wìla ko pye ma saa ta yɛlɛ shyɛn,
fɔ mbele fuun pàa pye ma cɛn wa Azi kinda wi ni,
Zhufuye naa mbele pe woro Zhufuye,
a pè we Fɔ wi sɛnrɛ ti logo.
Seva pinambiile pe sɛnrɛ re
11 Yɛnŋɛlɛ làa pye na kafɔnŋgɔlɔ tugbɔŋgɔlɔ piin Pɔli wi kɛɛ.
12 Ali paara naa mbɔgɔlɔ ŋgele kàa jiri Pɔli wi wire ti na,
pàa pye na kee ma saa nari tari yambala pe na,
a paa sagala,
a yinnɛ tipegele kaa woo leele pe ni.
13 Zhufuye mbele pàa pye na yanri na toro,
na yinnɛ tipegele ke puro na ke woo leele pe ni,
a poro pèle sigi pye ma wele,
na kaa pye pe mbe ya we Fɔ Zhezu wi mɛgɛ ki yeri mbe yinnɛ tipegele purɔ mbe wɔ leele ni.
A pe nɛɛ yinnɛ tipegele ke piin fɔ:
«Zhezu ŋa Pɔli wila wi sɛnrɛ yuun,
waa ki yuun ye kan wi mɛgɛ ki na,
fɔ:
‹Ye wɔ yaa kee.› »
14 (Zhufuye saraga wɔfɛnnɛ to Seva wi pinambiile kɔlɔshyɛn poro pàa pye na ko piin ma.)
15 Ɛɛn fɔ,
a yinnɛ tipele lì si pe yɔn sogo ma yo fɔ:
«Mì Zhezu wi jɛn,
ma Pɔli wi jɛn fun,
yoro wo yɛn ambɛnɛ?»
16 Yinnɛ tipele làa pye naŋa ŋa ni,
wì si to pe na,
ma ya pe ni fuun pe ni,
ma pe wɛlɛgɛ,
fɔ a pè fe ma yiri wa ki go ki ni witiwaga.
17 Efɛzi ca fɛnnɛ pe ni fuun,
Zhufuye naa mbele pe woro Zhufuye,
pàa ki wogo ki jɛn.
A pe ni fuun pè si fyɛ nɛɛ we Fɔ Zhezu wi mɛgɛ ki gbogo.
18 Mbele pàa taga Zhezu wi na,
pe lɛgɛrɛ la pye na paan na kapyere nda pàa pye ti yuun nari finligi leele pe kan.
19 Taluguya pyefɛnnɛ pe lɛgɛrɛ la pan pe sɛwɛɛrɛ ti ni mari sogo lere pyew wi yɛgɛ na.
A pège sɛwɛɛrɛ ti sɔnŋgɔ ki jate maga yan kì warifuwe pyɔ waga kɛ (10 000) yɔn ko tin.
20 Pa we Fɔ wi sɛnrɛ tìla pye na jaragi yawa ni yɛɛn,
naa fanŋga ki nari.
Efɛzi ca fɛnnɛ pàa yiri ma je
21 Ko kagala koro pyeŋgɔlɔ,
a Pɔli wì si yere ki yerewe mbe Maseduwani kinda naa Akayi kinda wi pari mbe kari wa Zheruzalɛmu.
A wì sho fɔ:
«Na ŋga kari,
ki daga mbe sa Ɔrɔmu ca ki yan fun.»
22 A wì suu sagafɛnnɛ shyɛn tun,
Timote naa Erasiti wa Maseduwani.
A wo jate wì si koro wa Azi kinda wi ni naa,
ma wagati wa pye wa.
23 Ki sanga wi ni,
a yolɛgɛrɛ tà si yiri we Fɔ wi konɔ li kala na.
24 Warifuwe gbɔnfɔ wà la pye wa,
pàa pye naa yinri Demetiriyusi.
Wìla pye na warifuwe wi gbɔɔn tunmɔlɔwɔ naa gbegele paa yarisunŋgo jɛlɛ ŋga pàa pye na yinri Aritemisi wi gbɔgɔgo ki yɛn.
A wìla tɔnli gbɔɔ taa wa wi tunmbyeele pe kan.
25 A wì sigi tunmbyeele poro naa mbele pàa pye ki tunŋgo nuŋgba ki ni pe gbogolo,
mɛɛ pe pye fɔ:
«Na woolo,
yège jɛn ma yo pa waa we tɔnli wi taa wa ki tunŋgo ŋga ki ni.
26 Ye yɛn naga yaan,
naga nuru,
ŋga ki Pɔli wila piin we.
Wì yo yarisunndo nda leele kɛyɛn gbegele,
to woro yarisunndo jɛndɛ.
Wì ya ma lelɛgɛrɛ go jɔgɔ ma pe puŋgo laga Efɛzi,
ko nuŋgba ma,
ɛɛn fɔ,
wa Azi kinda wi lalɛgɛrɛ ni fun.
27 We yɛn na fyɛ fɔ paga ka we tunŋgo ki tifaga.
Ko nuŋgba ma,
ɛɛn fɔ,
yarisunŋgo jɛlɛ Aritemisi,
ki gbɔgɔgo paga kaa ki jate ki woro yaraga ka.
Pa ki gbɔgɔwɔ pi yaa to,
ko ŋga Azi kinda woolo pe ni fuun pe maa gbogo,
naa dunruya woolo pe ni fuun pe ni we.»
28 Naa ki leele pàa kaa ki sɛnrɛ ti logo ma,
a pè si nawa ŋgban,
nɛɛ gbele ŋgbanga na yuun fɔ:
«Efɛzi ca fɛnnɛ pe yarisunŋgo Aritemisi ki yɛn ma gbɔgɔ!»
29 A ca ki nɛɛ tinni lagapyew.
A leele pe ni fuun pè si gbinri ma kari wa pe gbogolosaga.
A pè si Pɔli tangayɛɛnlɛ Gayusi naa Arisitariki mbele pàa yiri wa Maseduwani kinda wi ni,
pe tilele ma kari pe ni wa.
30 Pɔli wìla pye na jaa mboo yɛɛ naga janwa wi na,
ɛɛn fɔ,
tagafɛnnɛ pe sila yɛnlɛ ki na.
31 Azi kinda legbɔɔlɔ mbele pàa pye Pɔli wi wɛnnɛ,
a poro si tunŋgo torogo wa wi yeri maa yɛnri ma yo wiga ka kari wa pe gbogolosaga.
32 Ki sanga wi ni,
janwa wi ni fuun wìla pye na tinni.
Pèle la pye na jɔrɔgi na sɛnrɛ nuŋgba yuun,
a pele na jɔrɔgi na ta yɛgɛ yuun.
Pe gbɔɔ sila pe yɛɛ gbogologo ki jɛn.
33 A leele pele nɛɛ ki kala li yɛgɛ yuun na Alɛgizandire kaan,
ma yala Zhufuye pàa pye naa wɔnrɔgi na kee wi ni wa yɛgɛ.
A wì si kɛɛ yirige janwa wi kan mbe ta mboo woyoro ti yo mbe pe yɛɛ go shɔ.
34 Ɛɛn fɔ,
naa pàa kaa ki jɛn ma yo Zhufuye woo lawi,
a pe ni fuun pe nɛɛ jɔrɔgi ja ma saa gbɔn fɔ lɛri shyɛn,
na yuun fɔ:
«Efɛzi ca fɛnnɛ pe yarisunŋgo Aritemisi ki yɛn ma gbɔgɔ!»
35 Ko puŋgo na,
a ca ki sekeretɛri wì si ya ma janwa wi pye,
a wì pyeri,
mɛɛ yo fɔ:
«Efɛzi ca woolo,
leele pe ni fuun pège jɛn ma yo Efɛzi ca ko ki yɛn yarisunŋgo gbɔgɔ Aritemisi ki gbɔgɔgo ki welefɔ,
naa ki cɛnlɔmɔ mba pìla yiri wa naayeri ma to laga tara pi ni.
36 Kì kaa pye lere se ya mbe kendige wɔ ki na,
ki kala na,
ye pyeri,
yaga ka kala la pye jatere mbapyewe.
37 Yè pan ki nambala mbele pe ni lagamɛ,
ma si yala,
pee yaraga ka yu wa gbɔgɔyinrɛ ti ni,
pee si we yarisunŋgo jɛlɛ ki mɛgɛ jɔgɔ.
38 Na kaa pye Demetiriyusi naa wi tunmbyeele pe ni,
paa jaa mbe baga lere wa na mbe yo wi kapege pye,
kiti kɔnpiliye yɛn ma tɛgɛ,
kiti kɔnfɛnnɛ yɛn wa fun,
poo yeri wa ki laga ki na.
39 Na kaa si pye kala la yɛgɛ wa ye yeri naa mbe gbegele,
li yaa gbegele ca woolo pe gbogolomɔ pilige ki ni.
40 Pe mbe ya mbege yo mbe yo wè kapege pye,
nala kala na wè yiri ma je li na;
katugu tanga woro we yeri we ya wege yo fɔ we sin wa we kapyege ki ni,
ki janwa ŋa wi gbogolomɔ pi na.»
Naa wìla kaa ko sɛnrɛ to yo,
a wì si janwa wi pye wi jaraga.