Finliwɛ mba pìla pye wa Zheruzalɛmu ca
15
1 Kona,
a leele pèle si pan wa Antiyɔshi ca ma yiri wa Zhude tara.
A pe nɛɛ tagafɛnnɛ pe nari na yuun fɔ:
«Na yee kɛnrɛkɛnrɛ mbe yala Moyisi lasiri wi ni,
ye se ya shɔ.»
2 A yolɛgɛrɛ naa kendige gbɔgɔ si ye poro naa Pɔli naa Barinabasi pe sɔgɔwɔ.
A pè si yere ki yerewe ma yo Pɔli,
naa Barinabasi,
naa leele sanmbala pele ni,
pe kari wa Zheruzalɛmu pe sa para pitunmbolo poro naa lelɛɛlɛ pe ni ki wogo ki na.
3 A legilizi wì si pe torogo.
Pe karisaga,
a pè si Fenisi naa Samari tara ti pari ma toro.
Mbele pe woro Zhufuye pàa taga Yɛnŋɛlɛ li na yɛgɛ ŋga na,
a pe nɛɛ ki yari na tagafɛnnɛ pe kaan,
fɔ a kì pye nayinmɛ gbɔɔ pe ni fuun pe yeri.
4 Naa Pɔli naa Barinabasi pàa ka saa gbɔn wa Zheruzalɛmu,
a legilizi woolo,
naa pitunmbolo pe ni konaa lelɛɛlɛ pe ni,
pè si pe yigi jɛŋgɛ.
Yɛnŋɛlɛ làa Pɔli naa Barinabasi pe saga,
a pè kagala ŋgele pye,
a pè si ke ni fuun ke yɛgɛ yo ma pe kan.
5 Kona,
Fariziye ŋgbelege ki ni,
mbele pàa pye tagafɛnnɛ,
a poro pèle si yiri ma sho fɔ:
«Ki daga tagafɛnnɛ mbele pe woro Zhufuye pe kɛnrɛkɛnrɛ,
ki yo pe kan paa tanri Moyisi lasiri wi na paa wi yɔn fili.»
6 A pitunmbolo poro naa lelɛɛlɛ pe ni,
pè si gbogolo mbege kala li yewe jɛŋgɛ.
7 Naa pàa kaa kendige gbɔgɔ wɔ ma kɔ,
a Pyɛri wì si yiri,
mɛɛ pe pye fɔ:
«Sefɛnnɛ,
yège jɛn ma yo Yɛnŋɛlɛ lìlan wɔ laga ye sɔgɔwɔ,
kì mɔ,
jaŋgo mbe Sɛntanra ti yo mbele pe woro Zhufuye pe kan,
pe ta peri logo,
pe taga we Fɔ wi na.
8 Yɛnŋɛlɛ na li yɛn ma leele pe kotoro ti jɛn,
lìgi naga ma yo lì yɛnlɛ pe na,
ma Yinnɛkpoyi li kan pe yeri paa yɛgɛ ŋga na làa li kan woro fun we yeri we.
9 Woro naa poro ni,
lii wa wɔ wa ni.
Lì pe kotoro ti pye kpoyi,
naa pè taga ki kala na.
10 Yiŋgɔ wo ni,
ki cɛn mɛlɛ,
a ye nɛɛ Yɛnŋɛlɛ li waa na wele?
Na tugugbɔrɔ tari tagafɛnnɛ pe go na,
nda we tɛlɛye o,
woro o,
wa si ya ti ni mberi tugo.
11 Wè taga ki na ma yo Yɛnŋɛlɛ li yɛn na we shoo we Fɔ Zhezu wì yinmɛ mba tirige we na po kala na.
Ko nuŋgba koyi pe wogo ye fun.»
12 Kona,
a janwa wi ni fuun wì si pyeri dinw nɛɛ nuru Barinabasi naa Pɔli pe yeri,
Yɛnŋɛlɛ làa pe saga,
a pè kafɔnŋgɔlɔ naa kagbɔgɔlɔ ŋgele pye wa mbele pe woro Zhufuye pe sɔgɔwɔ,
a pe nɛɛ ke yɛgɛ yuun.
13 Naa pàa kaa para ma kɔ,
a Zhaki wì si sɛnrɛ ti lɛ ma sho fɔ:
«Sefɛnnɛ,
yaa nuru na yeri!
14 Simɔ wìgi yɛgɛ yo paa yɛgɛ ŋga na maga lɛ wa faa,
Yɛnŋɛlɛ làa li jatere wi taga mbele pe woro Zhufuye pe na,
ma pele wɔ wa pe sɔgɔwɔ ma pe pye li woolo.
15 A Yɛnŋɛlɛ yɔn sɛnrɛ yofɛnnɛ pe sɛnrɛ tì saa pye nuŋgba ti ni,
paa yɛgɛ ŋga na ki yɛn ma yɔnlɔgɔ wa Yɛnŋɛlɛ sɛnrɛ sɛwɛ wi ni ma yo we Fɔ wì yo fɔ:
16 Ko puŋgo na,
pa mi yaa sɔngɔrɔ mbe pan,
mbe Davidi wi paraga go ŋga kìla toori ki kan naa fɔnŋgɔ.
Mi yaa kaga jɔgɔsara ti gbegele mbege yirige mbege sin;
17 jaŋgo leele sanmbala pe we Fɔ wi lagaja,
naa cɛngɛlɛ ŋgele fuun mì yeri ke pye na woolo ke ni.
18 We Fɔ wo wì yo ma,
wo ŋa wìgi kagala ke pye,
a kè jɛn,
maga lɛ wa faa we.»
19 A Zhaki wì sho naa fɔ:
«Ko kì ti mila ki jate fɔ mbele paa pe yɛɛ kaan Yɛnŋɛlɛ li yeri,
pe si woro Zhufuye,
waga ka kaŋgbanra taga pe na.
20 Ɛɛn fɔ,
ye ti we sɛwɛ torogo pe yeri,
fɔ paga kaa yarisunndo kara kaa mbe pe yɛɛ le fyɔngɔ.
Pe pe yɛɛ yigi kɛɛnrɛ limɛ pi ni.
Paga ka yaraga ŋga pe maga sere wa ki yɔlɔgɔ maga gbo ki kara ta ka.
Paga si ka kasanwa ka.
21 Katugu maga lɛ wa faa,
leele pe maa Moyisi lasiri sɛnrɛ ti yuun ca pyew ki ni,
nari kara shɛriyinrɛ ti ni cɛnpilige pyew ki ni.»
Sɛwɛ ŋa pàa torogo tagafɛnnɛ mbele pe woro Zhufuye pe kan
22 Kì kaa pye ma,
a pitunmbolo poro naa lelɛɛlɛ,
naa legilizi woolo pe ni fuun pe ni,
pè si yere ki yerewe mbe leele pele wɔ pe yɛɛ ni,
mbe pe torogo wa Antiyɔshi ca pe pinlɛ Pɔli naa Barinabasi pe ni.
A pè si Zhude ŋa pàa pye na yinri Barisabasi wo naa Silasi wɔ.
Pe ni fuun shyɛn pàa pye legbɔɔlɔ tagafɛnnɛ pe sɔgɔwɔ.
23 Sɛwɛ ŋa pàa kan pe yeri pe kari wowi ŋa:
«Pitunmbolo naa lelɛɛlɛ,
poro mbele pè pye ye woolo,
poro paa pe sharaga ki torogi yoro mbele ye woro Zhufuye,
mɛɛ pye pe woolo ye kan.
Yoro mbele ye yɛn ma cɛn wa Antiyɔshi,
naa Siri tara to naa Silisi kinda wi ni we.
24 Wège logo ma yo leele pèle yiri laga we sɔgɔwɔ ma saa ye jatere wi lɛgɛ ye na pe sɛnrɛ ti ni,
ma ye nawa pi piri ye na.
Woro ma we pe tun.
25 Ki kala na,
wège yan ki yɛn ma yɔn,
a wè yo ma fili ki na mbe leele pele wɔ mbe pe tun wa ye yeri.
Pe yaa ka pinlɛ mbe kari Barinabasi naa Pɔli pe ni,
poro mbele pè pye we wɛnnɛ jɛmbɛlɛ we.
26 Poro pàa pe yɛɛ go ki pɛrɛ we Fɔ Zhezu Kirisi wi mɛgɛ ki kala na.
27 Kì pye ma,
we yaa Zhude naa Silasi pe tun wa ye yeri.
Sɛnrɛ nda waa yɔnlɔgi laga,
poro jate pe yaa sari yo mbe ye kan.
28 Katugu Yinnɛkpoyi lo naa woro ni,
wège yan ki yɛn ma yɔn fɔ waga ka tuguro ta yɛgɛ taga ye go na mbe wɔ ki kagala ŋgele ke daga pyewe ni yɛɛn koro ni.
Ke ŋgele:
29 Yaga ka yarisunndo kara ka,
yaga ka kasanwa ka,
yaga ka yaraga ŋga pe maga sere wa ki yɔlɔgɔ maga gbo ki kara ta ka.
Ye ye yɛɛ yigi kɛɛnrɛ limɛ pi ni.
Na yaga ye yɛɛ yingiwɛ jɛn ki yaara ti ni,
ko kì yɔn.
We yɛn pilige ka.»
30 Kona,
a pè si leele mbele pàa tun pe yaga,
a pè kari wa Antiyɔshi ca,
mɛɛ saa tagafɛnnɛ ŋgbelege ki gbogolo maga sɛwɛ wi kan pe yeri.
31 Naa pàa kaa wi kara sanga ŋa ni,
a pe nɛɛ yɔgɔri ki kotogo kanga sɛnrɛ ti kala na.
32 Zhude naa Silasi poro kpaw mbele pàa pye Yɛnŋɛlɛ yɔn sɛnrɛ yofɛnnɛ,
pàa sɛnlɛgɛrɛ yo sefɛnnɛ pe ni ma pe kotogo kan,
ma fanŋga kan pe yeri wa tagawa pi ni.
33 A pè si wagati jɛnri pye wa.
Ko puŋgo na,
a tagafɛnnɛ pè si pe yaga paa kee nɛɛ pe piin ma yo pe sɔngɔrɔ pe gbɔn yinŋge wa pe tunvɛnnɛ pe na.
34 [Konaa ki ni fuun,
kìla Silasi wo ndanla wi koro wa pe ni.]
35 A Pɔli naa Barinabasi poro si koro wa Antiyɔshi.
Poro naa lelɛgɛrɛ pèle la pye na we Fɔ wi Sɛntanra ti yuun,
nɛɛ leele pe nari.
PƆLI WI KONDANGALA SHYƐN WOLO YƐNŊƐLƐ TUNŊGO KI NA WO NAA SILASI KONAA TIMOTE
15.36–18.23
Pɔli naa Barinabasi pàa laga pe yɛɛ na
36 Naa piliye yà la kaa toro,
a Pɔli wì si Barinabasi wi pye fɔ:
«Wè toro cara nda fuun ni ma we Fɔ wi Sɛntanra ti yo,
ti we sɔngɔrɔ wa ti ni,
we sefɛnnɛ pe wele,
pe yɛn yɛgɛ ŋga na we ta wege jɛn.»
37 Barinabasi wo la pye na jaa mbe Zhan ŋa pàa pye na yinri Mariki wi lɛ wi pinlɛ pe ni wi kari.
38 Ɛɛn fɔ,
a Pɔli wì sigi jate kii daga poo lɛ pe kari wi ni;
katugu wìla laga pe na wa Panfili tara,
wi sila yɛnlɛ mbe kari pe ni pe tunŋgo ki na naa.
39 A kendige gbɔgɔ kà si ye pe sɔgɔwɔ,
fɔ a pè laga pe yɛɛ na.
A Barinabasi wo si Mariki lɛ ma kari wi ni,
pàa ye tɔnmɔkɔrɔ ka ni ma kari wa Shipiri lɔgɔ fugo tara ti ni.
40 Naa tagafɛnnɛ pàa kaa Pɔli wi le we Fɔ wi kɛɛ wi yinmɛ tirige pe na,
a Pɔli wo si Silasi wo wɔ mɛɛ kari wi ni.
41 A wì si Siri tara to naa Silisi kinda wi yanri,
na fanŋga kaan legiliziye woolo pe yeri wa tagawa pi ni.