Pyɛri wìla wi tangalɔmɔ pi yɛgɛ naga tagafɛnnɛ pe na wa Zheruzalɛmu
11
1 Pitunmbolo poro naa tagafɛnnɛ mbele pàa pye wa Zhude tara ti ni,
a pè sigi logo ma yo cɛnlɛ la yɛgɛ woolo yɛnlɛ ma Yɛnŋɛlɛ sɛnrɛ ti lɛ.
2 Naa Pyɛri wìla kaa sɔngɔrɔ wa Zheruzalɛmu,
Zhufuye tagafɛnnɛ pè suu jɛrɛgi ma yo fɔ:
3 «Mɛlɛ,
a mà si ye wa mbele pee kɛnrɛkɛnrɛ pe go ma li pe ni?»
4 Kì kaa pye ma,
a Pyɛri wì sigi yɛgɛ yo pe kan mari tanli,
ma yo fɔ:
5 «Mala ta wa Zhope ca ki ni mila yɛnri,
a mì si yaraga ka yan yariyanga ka ni.
Kìla pye paa parigbɔgɔ yɛn.
Kìla pye ma pɔ ki go tijɛrɛ ki ni fuun ki na.
A ki nɛɛ tinri ma yiri wa yɛnŋɛlɛ na,
ma pan le na tanla.
6 A mì silan yɛngɛlɛ ke kan ki na naga wele jɛŋgɛ,
mɛɛ tɔɔrɔ tijɛrɛ tijɛrɛ yaara naa yan woŋgaala,
naa nda ti maa fulolo lara na to naa naayeri sannjɛrɛ ti cɛnlɛ pyew ta yan wa ki nawa.
7 A mì si magala la logo,
a lìlan pye fɔ:
‹Yiri Pyɛri,
ma ta gbo mari ka!›
8 A mì suu yɔn sogo ma yo fɔ:
‹Ayoo,
we Fɔ,
katugu yaraga ŋga kii daga mbe ka,
nakoma ma pye fyɔngɔ ni ma yɛgɛ na,
ka fa ye wa na yɔn.›
9 A mì sigi magala li logo naa,
ma yiri wa yɛnŋɛlɛ na ma yo fɔ:
‹Yaraga ŋga Yɛnŋɛlɛ lì yo ki yɛn kpoyi,
ma kaa ki jate ki yɛn fyɔngɔ ni.›
10 A ki kala lì pye ma saa gbɔn fɔ taanri.
Kona,
a kì si yiri yaara ti ni fuun ti ni ma sɔngɔrɔ wa yɛnŋɛlɛ na.
11 Le ki yɔngɔlɔ nuŋgba ke ni,
mìla pye go ŋga ni,
a nambala taanri si gbɔn wa,
pàa pe tun na yeri ma yiri wa Sesare ca.
12 A Yinnɛkpoyi lì silan pye ma yo mbe pinlɛ pe ni mbaa kee,
mi ka kaa singi.
We sefɛnnɛ mbele,
a pe kɔgɔlɔni pè si saa na torogo,
a we ni fuun wè ye wa Kɔrinɛyi wi go.
13 A wì sigi yo we kan ma yo wì mɛrɛgɛ wa yan wa wi go,
a mɛrɛgɛ wìgi yo wi kan ma yo wi leele pele tun wa Zhope pe sa Simɔ yeri,
pe maa wi yinri naa Pyɛri.
14 Fɔ wi yaa sɛnrɛ ta yo wi kan,
ti yaa wo naa wi go woolo pe ni fuun pe shɔ.
15 Naa mìla kaa sɛnrɛ ti lɛ na para pe ni,
a Yinnɛkpoyi lì si tigi ma ye pe ni,
paa yɛgɛ ŋga na làa tigi ma ye we ni ki koŋgbanŋga ki na we.
16 Kona,
a mì si nawa to we Fɔ wi sɛnyoro ti na fɔ:
‹Zhan wìla pye na leele pe batize tɔnmɔ ni,
ɛɛn fɔ,
yoro wo na,
ye yaa ka batize Yinnɛkpoyi lo ni.›
17 Woro mbele wè taga we Fɔ Zhezu Kirisi wi na,
Yɛnŋɛlɛ lì yarikanga ŋga kan we yeri,
ko nuŋgba ko lì kan poro fun pe yeri.
Mi wo yɛn ambɔ mbe sila kendige woo Yɛnŋɛlɛ li ni?»
18 Naa pàa kaa ki sɛnrɛ ti logo,
a pe nawa pì si yinŋgi.
A pè si Yɛnŋɛlɛ li gbɔgɔ ma yo fɔ:
«Kaselege ko na,
mbe kapere ti jɛn mberi yaga,
Yɛnŋɛlɛ lìgi konɔ kan mbele pe woro Zhufuye pe yeri fun,
jaŋgo pe yinwege jɛŋgɛ ki ta.»
Legilizi ŋa wìla peli wa Antiyɔshi ca.
19 Etiyɛni gbosanga wi ni,
tagafɛnnɛ mbele pàa gbɔn ma jaraga jɔlɔgɔ ki kala na,
pè si kari wa Fenisi tara naa Shipiri lɔgɔ fugo tara to naa Antiyɔshi ca ki ni.
Pe sila pye na Yɛnŋɛlɛ sɛnrɛ ti yuun lere kpɛ kan naa,
na Zhufuye poro la ma.
20 Konaa ki ni fuun,
a Shipiri lɔgɔ fugo tara to naa Sirɛni ca tagafɛnnɛ pèle si kari wa Antiyɔshi ma saa we Fɔ Zhezu wi Sɛntanra ti yo ma leele mbele pe woro Zhufuye pele kan fun.
21 We Fɔ wi yawa pìla pye pe ni,
fɔ a lelɛgɛrɛ taga,
ma pe yɛɛ kan we Fɔ wi yeri.
22 Naa Zheruzalɛmu legilizi woolo pàa kaa ki wogo ki logo,
a pè si Barinabasi tun wa Antiyɔshi.
23 Naa Barinabasi wìla ka saa gbɔn wa Antiyɔshi ma duwaw ŋa Yɛnŋɛlɛ làa tirige tagafɛnnɛ pe na wi yan,
a wì si yɔgɔri,
mɛɛ kotogo kan pe ni fuun pe yeri ma yo pe koro we Fɔ wi ni pe jatere wi ni fuun wi ni.
24 Barinabasi wìla pye lejɛnŋɛ,
ma yin Yinnɛkpoyi li ni konaa tagawa ni.
Ki wogo ki na,
lelɛgɛrɛ la ta ma taga we Fɔ wi na.
25 Ko puŋgo na,
a Barinabasi wì si kari wa Tarisi ca mbe sa Sɔli wi lagaja.
26 Naa wìla kaa wi yan,
a wì si kari wi ni wa Antiyɔshi.
A pe ni fuun shyɛn pè yɛlɛ nuŋgba poni lo pye wa ki legilizi wi ni,
ma lelɛgɛrɛ naga Yɛnŋɛlɛ sɛnrɛ ti ni.
Pa pàa ki peli wa Antiyɔshi ca na tagafɛnnɛ pe yinri keretiyɛnye.
27 Ki piliye yi ni,
a Yɛnŋɛlɛ yɔn sɛnrɛ yofɛnnɛ pèle si yiri wa Zheruzalɛmu ma pan wa Antiyɔshi.
28 Pe ni,
nuŋgba la pye wa,
pàa pye naa yinri Agabusi.
A wo si yiri maga yo Yinnɛkpoyi li fanŋga na,
ma yo sanni jɛnri fuŋgo gbɔgɔ yaa to wa tara ti lagapyew ki ni.
Ki wogo kìla kaa pye wunlumbolo to Kulodi wi sɔnlɔ ki na.
29 A fɔrɔgɔfɛnnɛ pè si yere ki yerewe ma yo pe yaa sagawa pa torogo Zhude tara sefɛnnɛ pe kan,
ma yala lere nuŋgba nuŋgba pyew wi mbe ya ŋga kan ki ni.
30 Ko pàa pye,
mɛɛ ki yarikanra ti torogo legilizi lelɛɛlɛ pe kan.
Barinabasi naa Sɔli pàa kari ti ni.