Ananiyasi naa Safira kala
5
1 Ɛɛn fɔ,
naŋa wà la pye wa,
pàa pye naa yinri Ananiyasi wo naa wi jɔ Safira,
a poro si pe kɛrɛ ta pɛrɛ.
2 A wì si ta wɔ wa ki penjara ti ni mari tɛgɛ,
ma yala wi jɔ wi yɛn ki jɛnmɛ,
mɛɛ saa ti sannda ti kan pitunmbolo pe yeri.
3 A Pyɛri wì suu yewe ma yo fɔ:
«Ananiyasi,
kì pye mɛlɛ,
a Sɔtanla wì si ya ma ye wa ma kotogo na nɔɔ yɛgɛ sinni,
a mà finlɛ ma Yinnɛkpoyi li kan,
mbege ta mà kɛrɛ ti pɛrɛ maga penjara ta wɔ ma tɛgɛ we?
4 Ki pye mɛɛ jari pɛrɛ,
ti se jɛn na koro ma woro le?
Ti pɛrɛŋgɔlɔ,
ki penjara ti woro ma woro mari pye ma pyewe le?
Kì pye mɛlɛ,
a mà sigi jate wa ma nawa mbege kala cɛnlɛ na li pye?
Mɛɛ finlɛ mbe leele kan,
ɛɛn fɔ,
mà finlɛ ma Yɛnŋɛlɛ lo kan.»
5 Naa Ananiyasi wìla kaa ki sɛnrɛ ti logo,
a wì si to mɛɛ ku.
Mbele fuun pàa ki kala li logo,
pàa fyɛ fɔ jɛŋgɛ.
6 A lefɔnmbɔlɔ pè si pan maa gboo wi fo paara ni,
mɛɛ kari wi ni ma saa wi le.
7 Kì kaa mɔ na kee lɛri taanri yeri,
a Ananiyasi jɔ wì si pan wa.
Kala na làa pye,
wi sila li jɛn.
8 A Pyɛri wì suu yewe maa pye fɔ:
«Ki yo na kan,
yɔn ŋga ko mboro naa ma pɔlɔ wi ni,
yàa ye kɛrɛ ti pɛrɛ ki na le?»
A jɛlɛ wì suu yɔn sogo maa pye fɔ:
«Ee,
ki yɔn koyi we.»
9 Kona,
a Pyɛri wì suu pye fɔ:
«Mɛlɛ,
a yè si yere ki na mbe we Fɔ wi Yinnɛkpoyi li wa mbe wele?
Ta nuru,
mbele pɔ̀ɔn pɔlɔ wi le pe mbele le go yɔn ki na,
pe yaa mboro fun ma lɛ mbe kari ma ni.»
10 Le ki yɔngɔlɔ nuŋgba ke ni,
a jɛlɛ wì si to le Pyɛri wi jegele mɛɛ ku.
A lefɔnmbɔlɔ pè si ye maa yan wì ku,
mɛɛ wi lɛ ma saa wi le wa wi pɔlɔ wi tanla.
11 A Legilizi woolo pe ni fuun,
naa mbele pàa ki kala li logo,
pè si fyɛ fɔ jɛŋgɛ.
Pitunmbolo pàa kafɔnŋgɔlɔ naa kagbɔgɔlɔ pye
12 Pitunmbolo pàa kafɔnŋgɔlɔ naa kagbɔgɔlɔ lɛgɛrɛ pye leele pe sɔgɔwɔ.
Tagafɛnnɛ pe ni fuun pàa pye ma gbogolo wa Salomɔ toŋgbo wi nawa,
ma pe yɔn ki wa nuŋgba.
13 Leele sanmbala poro na,
wa kpɛ sila soro mbe sa pinlɛ pe ni.
Konaa ki ni fuun,
leele pàa pye na pe sɔnni fɔ jɛŋgɛ.
14 Ɛɛn fɔ,
janwa lɛgɛrɛ la pye na tari we Fɔ wi na,
nambala poro naa jɛɛlɛ wele,
na pinlɛlɛ tagafɛnnɛ ŋgbelege ki ni.
15 Leele pàa pye na yambala pe lee na paan pe ni wa koŋgolo ke ni,
na pe teri sinlɛyaara naa fuuro na,
jaŋgo Pyɛri wi torosaga,
wi nunu wi ta wi to pele na.
16 Janwa wìla pye na yinrigi wa Zheruzalɛmu kanŋgara na cara ti ni fun,
na paan yambala naa yinnɛ tipegele fɛnnɛ pe ni,
a pe ni fuun pè sagala.
Zhufuye teele pàa pitunmbolo pe jɔlɔ
17 Kona,
a saraga wɔfɛnnɛ to wo naa wi woolo pe ni,
pè si yiri,
poro pàa pye Sadusiye wele.
A yenjara si ye pe ni pitunmbolo pe kala na.
A pè si yere ki yerewe mbe kala la pye pe na.
18 A pè si pitunmbolo pe yigi,
mɛɛ pe le wa kaso go gbɔgɔ ki ni.
19 Ɛɛn fɔ,
ki yembinɛ li ni,
we Fɔ wi mɛrɛgɛ wà si kaso go kɔɔrɔ ti yɛngɛlɛ,
ma pitunmbolo pe yirige wa funwa na,
mɛɛ pe pye fɔ:
20 «Yaa kee ye sa yere wa shɛrigo gbɔgɔ ki ni,
ŋga fuun ki yɛn na para yinwefɔnŋgɔ ki sɛnrɛ na,
ye saga yo ye leele pe kan.»
21 Naa pitunmbolo pàa kaa ki sɛnrɛ ti logo,
a pè si kari ki goto yirifaga ki na wa shɛrigo gbɔgɔ ki ni,
mɛɛ ki lɛ na leele pe nari.
A saraga wɔfɛnnɛ to wo naa wi woolo pe ni,
pè si kiti kɔnfɛnnɛ ŋgbelege konaa Zhufuye lelɛɛlɛ pe ni fuun pe gbogolo laga nuŋgba.
A pè si tun ma yo pe kari wa kaso go ki ni,
pe pan pitunmbolo pe ni.
22 Ɛɛn fɔ,
naa sorodasheele pàa ka saa gbɔn wa,
pe sila sa pitunmbolo pe ta wa kaso go ki ni.
A pè si sɔngɔrɔ ma pan maga yo kiti kɔnfɛnnɛ ŋgbelege ki kan,
23 ma pe pye fɔ:
«We saa kaso go ki ta sɔgɔsaga fɔ jɛŋgɛ.
Yeyɔngɔ welefɛnnɛ pe yɛn yeresaga le yeyɔnrɔ ti na.
Ɛɛn fɔ,
na wè kaa kɔɔrɔ ti yɛngɛlɛ,
lere pyɔ we si wo yan wa nawa.»
24 Naa shɛrigo gbɔgɔ sorodasheele to wo naa saraga wɔfɛnnɛ teele pe ni,
pàa kaa ki logo,
a kì si pe nawa pi wɔ pe na.
A pe nɛɛ pe yɛɛ yewe ki kala li kɔwɔ pi yaa ka pye yɛgɛ ŋga na ki ni.
25 A naŋa wà si ye wa pe kɔrɔgɔ,
mɛɛ pe pye fɔ:
«Ye wele,
leele mbele yè le wa kaso,
pe mbele wa shɛrigo gbɔgɔ ki ni paa leele pe nari!»
26 Kona,
a shɛrigo gbɔgɔ sorodasheele to wo naa wi sorodasheele pe ni,
a pè si kari mɛɛ pan pitunmbolo pe ni yɔɔrɔ;
katugu pàa pye na fyɛ fɔ leele paga ka poro jate pe wa sinndɛɛrɛ ni.
27 Naa pàa kaa pan pe ni,
a pè si pe yerege le kiti kɔnfɛnnɛ ŋgbelege ki yɛgɛ sɔgɔwɔ.
A saraga wɔfɛnnɛ to wì si pe yewe ma yo fɔ:
28 «Wège yo ye kan maga ŋgban ye ni,
ma yo fɔ yaga kaa leele pe nari ki naŋa ŋa wi mɛgɛ ki na naa!
Ɛɛn fɔ ye wele,
ye nagawa sɛnrɛ tì Zheruzalɛmu ca ki kɔ,
a yaa jaa mboo gbokala li taga woro na.»
29 A Pyɛri naa pitunmbolo sanmbala pe ni,
pè sho fɔ:
«Ki daga we Yɛnŋɛlɛ lo sɛnrɛ to lɛ we wɛ leele poro woro to na.
30 We tɛlɛye pe Yɛnŋɛlɛ lì Zhezu wi yɛn maa yirige wa kunwɔ pi ni,
wo ŋa yàa kan wa tiparaga ki na maa gbo we.
31 Yɛnŋɛlɛ lùu yirige maa tɛgɛ wa li kalige kɛɛ ki na,
maa pye wunlunaŋa naa Shɔfɔ,
jaŋgo Izirayɛli tara woolo pe ta pe pe kapere ti jɛn peri yaga,
pe pe kapere ti kala yagawa ta.
32 Woro wo na,
we yɛn ki kagala ke sɛrɛfɛnnɛ,
woro naa Yinnɛkpoyi li ni,
lo na Yɛnŋɛlɛ lì kan mbele pèli sɛnrɛ ti lɛ pe yeri we.»
33 Naa kiti kɔnfɛnnɛ ŋgbelege kìla kaa ki sɛnrɛ ti logo,
a pe nawa pì si ŋgban pe na fɔ jɛŋgɛ,
fɔ a paa jaa mbe pitunmbolo pe gbo.
34 Ɛɛn fɔ,
Fariziye naŋa wà la pye pe ni,
pàa pye naa yinri Gamaliyɛli.
Zhufuye lasiri sɛwɛ jɛnfɔ lawi,
leele pe ni fuun pàa pye naa gbogo.
A wo si yiri ma yere wa kiti kɔnfɛnnɛ ŋgbelege ki sɔgɔwɔ,
mɛɛ yo fɔ pe pitunmbolo pe yirige wa funwa na wagati jɛnri ni.
35 Kona,
a wì si pe pye fɔ:
«Izirayɛli tara woolo,
ye ye yɛɛ yigi ŋga yaa jate mbe pye ki nambala mbele pe na ki ni.
36 Ki fa mɔ ma,
Tedasi wìla yiri maa yɛɛ pye ma yo wi yɛn legbɔɔ.
A nambala cɛnmɛ tijɛrɛ (400) si wo taga wi na.
Ɛɛn fɔ,
pàa wi gbo,
leele mbele pàa taga wi na,
a pè gbɔn ma jaraga pe yɛɛ na.
A ki kala lì kɔ jaga.
37 Ko puŋgo na,
a Galile tara fɛnnɛ Zhudasi wì yiri ma je fun,
ma yala leele pe jirige wagati wi ni.
A wì lelɛgɛrɛ pye ma taga wi yɛɛ na.
Wo fun,
a pòo gbo,
mbele pàa taga wi na,
a pè gbɔn ma jaraga.
38 Ki kala na,
mi yɛn naga yuun ye kan,
koni wo ni,
yaga ka kapege pye ki nambala mbele pe na.
Ye pe yaga paa kee.
Na kaa pye ki kala na,
nakoma ki tunŋgo ŋga kì yiri leele yeri,
ki yaa ka jɔgɔ.
39 Ɛɛn fɔ,
na kaa pye kì yiri Yɛnŋɛlɛ lo yeri,
ye se ya mbege jɔgɔ.
Ye ye yɛɛ yigi,
kiga ka pye ndɛɛ yaa wiin Yɛnŋɛlɛ li ni.»
A kiti kɔnfɛnnɛ ŋgbelege kì si yɛnlɛ Gamaliyɛli wi sɛnrɛ ti na,
40 mɛɛ pitunmbolo pe yeri naa,
ma pe kan,
a pè pe gbɔn sapige ni,
mɛɛ ki yo maga ŋgban pe ni ma yo paga ka para Zhezu wi mɛgɛ na naa.
Kona,
a pè si pe wa ma yo paa kee.
41 A pitunmbolo pè si yiri ma kari,
ma yin nayinmɛ ni,
katugu Yɛnŋɛlɛ làa ki daga pe ni pe jɔlɔ Zhezu wi mɛgɛ ki kala na.
42 Kona,
a pè si koro na leele pe nari na Yɛnŋɛlɛ sɛnrɛ ti yuun pe kan pilige pyew,
fɔ Zhezu wo wi yɛn Kirisi we,
wa shɛrigo gbɔgɔ konaa leele pe lara ti ni.