Sumbyɔ ŋa wìla puŋgo ma kaa yan wi yomiyɛlɛ le
15
1 Nizara shɔfɛnnɛ poro naa kapere pyefɛnnɛ pe ni fuun pàa pye na fulo Zhezu wi tanla mbe logo wi yeri.
2 Ɛɛn fɔ,
a Fariziye poro naa lasiri sɛwɛ jɛnfɛnnɛ pe ni,
pe nɛɛ kɔngɔri na yuun fɔ:
«Ki naŋa ŋa wi yɛn na kapere pyefɛnnɛ pe yinri tiyɔngɔ,
na kaa pe ni
3 Kona,
a Zhezu wì sigi yomiyɛlɛ na li wa pe kan,
4 ma yo fɔ:
«Ye ni,
mì yo,
na sumbyɔ cɛnmɛ ka pye lere wa yeri,
wii nuŋgba puŋgo pe ni,
wi yaa nafa tijɛrɛ ma yiri kɛ ma yiri kɔlɔjɛrɛ sanmbala pe yaga wa pe kasaga,
mbe sa ŋa wì puŋgo wi lagaja fɔ wi saa yan!
5 Na wiga ka saa yan sanga ŋa ni,
wi yaa wi yigi mboo taga wi pajogo ki na nayinmɛ coli,
mbe sila kee.
6 Wiga ka sa gbɔn wa wi laga,
wi yaa wi wɛnnɛ naa wi cɛnyɛɛnlɛ pe yeri,
mbe pe pye fɔ:
‹Ye pan we yɔgɔri ja,
katugu na sumbyɔ ŋa wìla puŋgo,
mùu yan.›
7 Ki pyelɔmɔ nuŋgba pi na fun,
mila ki yuun ye kan,
na kapege pyefɔ nuŋgba kaa kapere ti jɛn mberi yaga,
nayinmɛ yaa pye wa yɛnŋɛlɛ na wi kala na mbe wɛ lesinmbele nafa tijɛrɛ ma yiri kɛ ma yiri kɔlɔjɛrɛ kala na.
Poro mbele pee jori mbe pe kapere ti jɛn mberi yaga we.
Warifuwe pyɔ yomiyɛlɛ
8 «Nakosima,
na jɛlɛ wa ka warifuwe pyɔ kɛ ta,
nuŋgba ka puŋgo pe ni,
wii yaa fitanla mu mbe go ki pɛ mboo wele yɛtogowo ni fɔ wi saa yan wi le?
9 Na wiga kaa yan sanga ŋa ni,
wi yaa wi wɔnlɔnjaala naa wi cɛnyɛɛnlɛ pe yeri,
mbe si pe pye fɔ:
‹Ye pan we yɔgɔri ja,
katugu na warifuwe pyɔ ŋa wìla puŋgo,
mùu yan.›
10 Ki pyelɔmɔ nuŋgba pi na fun,
na kapere pyefɔ nuŋgba kaa kapere ti jɛn mberi yaga,
nayinmɛ ma pye Yɛnŋɛlɛ li mɛrɛgɛye pe yeri wi kala na ma fun.»
Pinambyɔ ŋa wìla puŋgo ma kaa yan wi yomiyɛlɛ le
11 A Zhezu wì sho naa fɔ:
«Pinambiile shyɛn la pye naŋa wa yeri.
12 A pinambyɔ jɛɛ wì si kaa wi to wi pye fɔ:
Baba,
kɔrɔgɔ ŋga mi yaa ka ta wa ma yarijɛndɛ ti ni,
ki kan na yeri.›
Kì kaa pye ma,
a tofɔ wì si kɔrɔgɔ ki wali wi piile shyɛn pe na.
13 Naa piliye jɛnri la kaa toro,
a pinambyɔ jɛɛ wì suu kɛɛ yaara ti ni fuun ti gbogolo ti yɛɛ na,
mɛɛ kari ki penjara ti ni taleere ta ni,
ma saa naa yinwege ki piin wa kalikalawa pi ni,
maa penjara ti ni fuun ti jɔgɔ.
14 Naa wìla kaa ti ni fuun ti li ma,
a fuŋgo gbɔgɔ kà si to wa ki tara ti ni.
A fyɔnwɔ si to wi na.
15 A wì si saa ye tunŋgo ki tara ti woo wa yeri.
A wo suu torogo wi saa wi cɛɛlɛ kɔrɔsi wi kan wa wi kɛɛrɛ ti ni.
16 Yaakara nda cɛɛlɛ pàa pye na kaa,
to tari wìla pye na jaa mbaa kaa.
Ɛɛn fɔ,
pe sila yɛnlɛ mbaa ta kaan wi yeri.
17 Kona,
a wì si cɛn nɛɛ jatere piin wi cɛnwɛ pi na,
ma suu yɛɛ pye fɔ:
‹Wa na to wi yeri,
tunmbyeele pe ni fuun pe ma ka yaakara tila kɔ.
Ma si yala,
muu yɛn na kuun fuŋgo lagamɛ.
18 Mi yaa yiri mbe sɔngɔrɔ mbe kari na to wi kɔrɔgɔ,
mbe saa pye fɔ:
Baba,
mì kapege pye Yɛnŋɛlɛ li na,
ma ka pye ma na.
19 Mii daga paa na yinri ma pyɔ.
Tanla piin paa ma tunmbyeele pe yɛn.›
20 A wì si yiri nɛɛ sɔngɔrɔ wa wi to wi yeri.
«Maa ta wa lege wila paan,
a tofɔ wi suu yan,
a wi yinriwɛ suu ta fɔ jɛŋgɛ.
A wì si fe ma saa wi fili,
mɛɛ magala wi ni ndanlawa ni.
21 Kona,
a pyɔfɔ wì suu pye fɔ:
‹Baba,
mì kapege pye Yɛnŋɛlɛ li na,
ma ka pye ma na.
Mii daga paa na yinri naa ma pyɔ.›
22 Ɛɛn fɔ,
a tofɔ wì suu tunmbyeele pe pye fɔ:
‹Ye fyɛɛlɛ ye pan yanla derigbɔrɔ ti ni fuun tiyɔngɔ ki le wi kan.
Ye kannjinɛ le wi yombɛlɛ li na.
Ye sawira le wi kan.
23 Ye pan napige ŋga kì tɔrɔ ki ni,
yege gbo.
We nayinmɛ suro sɔgɔ,
24 katugu na pyɔ ŋa yɛɛn,
wìla pye ndɛɛ wì ku,
yiŋgɔ wì yɛn.
Wìla puŋgo yiŋgɔ mùu yan!›
A pè sigi lɛ na nayinmɛ fɛti piin.
25 «Ko sanga wo ni,
ki naŋa wi pinambyɔ koŋgbanŋa wìla pye wa kɛɛrɛ.
Naa wìla kaa pan ma yɔngɔ pe go ki ni,
a wi nɛɛ piŋge naa yɔrɔ tinmɛ taa wa go.
26 A wì si tunmbyee wa yeri maa yewe ki yɔrɔ ti kɔrɔ wi ni.
27 A tunmbyee wì suu pye fɔ:
‹Ma jɔnlɔ wo wì sɔngɔrɔ ma pan.
A ma to wì si napige ŋga kì tɔrɔ ki kan,
a wège gbo;
katugu wùu yan wì pan ŋgbaan.›
28 Kì kaa pye ma,
a pinambyɔ koŋgbanŋa wì si nawa ŋgban,
mɛɛ je ma yo wi se ye wa go.
A tofɔ wì si yiri ma pan maa sulu ma yo wi ye.
29 Ɛɛn fɔ,
a wì si tofɔ wi pye fɔ:
‹Ta nuru!
Malɛ wa,
yɛgɛlɛ lɛgɛrɛ kè toro,
mi yɛn na tunŋgo piin ma kan.
Mi fɔɔn sɛnrɛ ta kɛ.
Konaa ki ni fuun,
ali sikapile jate,
ma fa la kan na yeri mbe nayinmɛ suro sɔgɔ,
mbanla wɛnnɛ pe yeri.
30 Ɛɛn fɔ,
ma pyɔ ŋa yɛɛn,
wo kaa pan,
wo ŋa wɔ̀ɔn penjara ti ni fuun ti li nanjaala ni,
a mà si napige ŋga kì tɔrɔ ki kan,
a pège gbo wo kan.›
31 A tofɔ wì suu pye fɔ:
‹Na pyɔ,
ma yɛn laga na ni pilige pyew,
yaraga ŋga fuun ki yɛn na yeri,
ma wogo yi.
32 Ɛɛn fɔ,
we daga mbe nayinmɛ fɛti pye mbe pye yɔgɔrimɔ na,
katugu ma jɔnlɔ ŋa yɛɛn,
wìla pye ndɛɛ wì ku,
yiŋgɔ wì yɛn.
Wìla puŋgo,
yiŋgɔ mùu yan.› »